3
Jesús tjl̈õkwo kjraga kägäyoga
1 Oba tjl̈ẽ ga «Ëye wotjl̈ĩk opyë ber sök Jesús tjl̈õkwo kjraga kägäyo ga wotjl̈ĩk l̇l̇ëbo shäryë pjl̈úe» l̈ëba eni. E eni jl̈õe. Tjl̈õkwo ëre kjrako.
2 Eni ga ëye pak ëre shäryë wl̈o ga woyde ga e l̇l̇ëbo owa shäryono l̈ëba ga äe. Woyde ga boy kjl̈araso. Woyde ga l̇l̇ëbo shärye ga woyotjl̈ĩya yõtso guing, jëk shäng yõtso, pjl̈o bek, bangkjrëba wl̈o. Woyde ga ëbo tjwe ba shwoy ga wl̈okjre sök wopjl̈ú ĩyado. Woyde ga oba ping pjl̈ú wl̈eniyo.
3 Woyde ga nel̈õtkë ä wl̈eniyo l̇l̇ëm, ëngkjwë ä wl̈eniyo l̇l̇ëm bakoe. Woyde ga shäng wopjl̈ú wl̈eniyo, ëng dboryë obl̈ë tjok ä wl̈eniyo l̇l̇ëm, dbur sĩyo l̇l̇ëm wl̈eniyo bakoe.
4 Woyde ga ba pjeyoga l̈öng ushko l̈i de sök pjl̈o bek. Woyde ga e kol̈e, bangkjre ba wapgarë pjl̈úe.
5 ¿Shärye ba ushko eni l̇l̇ëm ga Sbö tjl̈õkwo kjragaga de sorëro?
6 Jesús tjl̈õkwo kjragaga l̈öng kjwl̈ë jã wl̈eniyora, e iëy ber no kägäyo wl̈o l̇l̇ëme. L̇l̇ëm ga ioroy wl̈eni ga wotjl̈ĩk owa kjwe, «Tja tjwl̈õ ara» l̈e ba pjl̈úshko Ä dik, ga ber shdungko bakoe.
7 Woyde Ärë ga Sbö tjl̈õkwo iëba ber tjwl̈õ l̇l̇ëme. E kjĩshko ga woyde Sbörë ga tjl̈õkwo kjraga kägäyo l̈i, e bangkjre tjl̈õkwo kjragaga l̇l̇ëm wl̈eniyo l̈irë bako, l̈anyotke l̈ok owa ga ä wl̈o, Sbö tjl̈õkwo iëba ber tjwl̈õ ara wl̈o.
Jesús tjl̈õkwo kjraga kägäyo kjimtaga
8 Woyde ga Jesús tjl̈õkwo kjraga kägäyo l̈i kjimtagaga ber l̈öng eni bakoe. Woyde ga jëk l̈öng pjl̈o bek, bangkjrëba wl̈o. Woyde ga tjl̈ẽ bëy wl̈eniyo, nel̈õtkë ä wl̈eniyo l̇l̇ëm, dbur shak jyõ go ä wl̈eniyo l̇l̇ëm bakoe.
9 Woyde ga tjl̈õkwo pina Sbörë bi kong l̈i, e söya l̈ok jl̈õkoyo, jëk e go. Woyde ga l̇l̇ëbo pjl̈ú miyde l̈i shärye eni ĩyado bakoe.
10 Woyde ga tjl̈ĩy bäm go guing. Ĩnoy ga l̇l̇ëye owa shärye l̇l̇ëm ga ber tjl̈õkwo kjraga kägäyo kjimtaga eshko jã.
11 Woyde ga wal̈ëga ber l̈öng eni bakoe. Woyde ga jëk l̈öng pjl̈o bek, bangkjrëba wl̈o. Woyde ga no l̈ãywe owa ä wl̈eniyo l̇l̇ëme. Woyde ga l̇l̇ëbo shärye ga woyotjl̈ĩya yõtso guing wl̈eniyo. Woyde ga l̇l̇ëye l̈e ë kong ga shärye eni wl̈eniyo bakoe.
12 Tjl̈õkwo kjraga kägäyo kjimtaga l̈i, e woyde ga boy kjl̈araso. Woyde ga ba wapga, ba pjeyoga l̈öng ba ushko l̈i, e de sök pjl̈o bek.
13 L̇l̇ëbo pjl̈ú shäryara ba pakshko ga iëba ber tjwl̈õ ara. Eni ga shji mär Cristo Jesús go sorë l̈e oba kong, ga l̇l̇ëye bangkjre l̇l̇ëme.
Jesús tjl̈õkwo, e tjwl̈õ ara anmoyõ
14-15 Tja wotjl̈ĩk jek bop ĩk mal̈ing, gueniyo tja jek l̇l̇ono miydër l̇l̇ëme. E kjĩshko ga tja jek äär mal̈ing l̇l̇ëm wl̈eni ga kjibokwo ëre tër, ichër jek bop kong, woyde Sbörë ga ba wapga jëk sorë l̈i miydëp kjibokwo ëre go wl̈o. Shji Jesús tjl̈õkwo kjragaga, shji Sbö wapga. Sbö sök ĩyado. Ga ba tjl̈õkwo bek l̈i, e twara beno bi kong, söy wl̈o, e jl̈õe l̈ëy obl̈ë kong wl̈o bakoe.
16 Ba tjl̈õkwo jnena Sbörë l̈i, e pina bi kong. Tjl̈õkwo ëre tjwl̈õ ara anmoyõ jl̈õkoyo. Ëre eni:
Jesucristo, e weno shäng kjok ëre kjing go so no kjoyoe.
E beno pjl̈o bek Sbö bokso l̈i pina Sbö Sëyarë oba kong.
E ĩna Sbö parkagaga kjok dogo sorë.
Roy l̈araba tjëyoga obl̈ë obl̈ë kong kjok kjwang jĩkong.
Tjl̈õkwo kjraraba kjok ëre kjing go.
Ga söra Sbörë to jem kjok dogo.