6
Ëye parkagaga tjwl̈ẽk l̈öng pjir wl̈eniyo ga woyde ga ba sogo bangkjre jl̈õkoyo ĩyado, Sbö l̈ãywëba l̇l̇ëm wl̈o, tjl̈õkwo l̈ëy l̈öng l̈i l̈ãywëba l̇l̇ëm wl̈o bakoe. Ba sogo, e Jesús tjl̈õkwo kjraga wl̈eni ga woyde ga bangkjre, parkë ba kong pjl̈ú anmoyõ, ba sogo kjimte shäng l̈i, e ba pjeyo Jesús tjl̈õkwo kjraga woyde ara wl̈eniyo kjĩshko. Tjl̈õkwo l̈ëp nopga kong wl̈o, shärye l̈ok wl̈o l̈i e.
L̇l̇ëbo tjwl̈õ ara
Tjl̈õkwo l̈ara bi Tjl̈apga Jesucristorë shäryëy wl̈o l̈i, e beke. Shji jëk pjl̈o bek Sbö bokso sorë l̈i miydëy e go. Ëye oba ping tjl̈õkwo obl̈ë bek l̇l̇ëm wl̈eniyo go ga krë ä wl̈eniyo, l̇l̇ëye miyde l̇l̇ëme. L̇l̇ëbo tjwl̈õ l̇l̇ëm wl̈eniyo l̈e ëng kong kar kar ä, go swl̈o wl̈eni. Tjl̈ẽ eni kjĩshko ga wotjl̈ĩk owa obl̈ë kong ba l̇l̇ëbo kjĩshko, ëng dboryë kar kar iir go, ëng l̈ãywë owa, «Kjl̈ara kjwe owa» l̈e ba pjl̈úshko ĩyado. Epga ëngkjwë ëng tjok l̈i pjir l̇l̇ëm, wotjl̈ĩk owa kjĩshko. Tjl̈õkwo bek l̈i miyde ame. Oba pĩya l̈ok Sbö tjl̈õkwo go, dbur shak e go wl̈o eröe.
6-7 Shji jëk pjl̈o bek Sbö bokso l̈i, e tjwl̈õ ara jl̈õkoyo. Gueniyo woyde ga shji l̈öng wopjl̈ú bi l̇l̇ëbo tjeng l̈i tjok bakoe. Shji weno bukshko ga l̇l̇ëye söroy tek bi tjok l̇l̇ëme. Shji wol̈onoshko ga l̇l̇ëye söy jek bi tjok l̇l̇ëm bakoe. E kjĩshko ga woyde ga shji l̈öng wopjl̈ú bi l̇l̇ëbo tjeng l̈i tjok. Eni ga shji shwong tjok, shji dl̈i tjok wl̈eni ga woyde ga shji l̈öng wopjl̈úe. Gueniyo ëye opyë woydë dbur ara ga l̇l̇ëbo owa shärye. Opsrek l̈öng ara ba wotjl̈ĩk owa l̈i go, gueniyo miyde l̈öng l̇l̇ëme. Eshko ga beno l̈öng song erä, to pjir wl̈o. 10 Ëye dbur woydë ara anmoyõ ga dbur wl̈ẽk wl̈o ga l̇l̇ëbo owa shärye l̇l̇ë pogo. Kjone kjone wotjl̈ĩk dbur wl̈ẽk erä kjĩshko ga beno l̈öng mär Sbö go ame, beno l̈öng song erä.
Pablo tjl̈ẽno Timoteo kong, Timoteo dbokjrë wl̈o
11 Gueniyo pja Sbö ĩ kuzong ga pja opkwos l̇l̇ëbo owa l̈ër shäng bop kong l̈i dwayo. L̇l̇ëbo pjl̈ú l̈i shäryopdë dey. Pja jëk shäng pjl̈o bek Sbö bokso. Pja mär Sbö go. No obl̈ë woydos ara. L̇l̇ëbo wen tjwe bop kong owashko ga pja wosonkë l̇l̇ëme. Pja l̇l̇ëbo shäryë obl̈ë kong yõtso. 12 Pja drön ëë, pja mär Sbö go wl̈o, l̈orop nopga ara kong dënashko sorë l̈i eni, pja ber shäng së ĩyado Sbö tjok wl̈o. Pja rokara Sbörë e kong wl̈o. 13 Rokër bop kong ga tjl̈õkwo l̈os bor kong jl̈õkoyo. Miydaga ber Sbörë, shji l̈öng së, l̇l̇ë pogo l̈öng së, e l̈aga erë. Miydaga ber Cristo Jesúsdë bako, era tjl̈õkwo l̈ono pjl̈ú, Poncio Pilato bokshto. 14 L̇l̇ëye l̈oror bop kong l̈i shäryos uunkong eni, äär jong bi Tjl̈apga Jesucristo tjwe iröng obi guing. 15 Dbaryo l̈i wl̈ẽna Sbörë om go, ga öötongshko ga tjwe eshko jã, ichak Sbörë.
Sbö, e wopjl̈úe.
Kjok ëre uunkong ichaga l̈i e eröe.
Pjl̈upga uunkong pjl̈uyo l̈i e.
No kägäyoga uunkong kägäyo l̈i e
16 Wol̈on l̇l̇ëm sök ĩyado l̈i e eröe.
Iök jong kjwara shjiy, kãl̈ã l̇l̇etl̇l̇et wl̈eniyo,
ëye äär eshko ga äe.
Sbö sök iök shjiy l̈i roshko.
Ëye omĩydë l̇l̇ëm,
ĩgöy l̇l̇ëm bakoe.
Poshrëkko ĩyado l̈i e.
Dbo ara ĩyado l̈i e.
Ber eni.
17-19 No kjone kjone dbur ara kjok ëreshko. Pja tjl̈ẽ ba kong ga «Bomi dbur kjĩshko ga pjãy tjwl̈õ ara, obl̈ë kjinmo l̈ëmi l̇l̇ëme. Dbur, e ĩyado l̇l̇ëm kjĩshko ga pjãy mär bomi dbur go dö l̇l̇ëme. Gueniyo Sbö, e sök ĩyado, l̇l̇ëbo twe bi kong ara, shji ber l̈öng wopjl̈ú wl̈o. E kjĩshko ga pjãy mär ba go erö dey. L̇l̇ëbo pjl̈ú shäryozĩa. Shäryoromi eni l̈i, e tjwl̈õ ara, bomi dbur kjinmo. Obl̈ë ĩmi ga song ga bomi l̇l̇ëbo shdözĩ ba tjok wopjl̈úe. Eni ga l̇l̇ëbo tjwl̈õ ara l̈i ber bomi kong kjok dogo, ga pjãy ie Sbörë ber l̈öng së ĩyado ba tjok» l̈ëp ba kong eni.
Kjibokwo pjirzl̈ong
20 Timoteo, pja iara Sbörë beno shäng ba tjl̈õkwo roy l̈ë oba kong wl̈o. Eni ga shäryos yõtso. L̇l̇ëbo tjwl̈õ l̇l̇ëm l̈anyotkëba l̈öng l̈i, e jyõ erä. Tjl̈ẽ l̈öng jl̈õ wl̈eni, gueniyo jl̈õkoyo ga kjok miyde l̈ok sira l̇l̇ëme. Ba tjl̈õkwo l̈i kup l̇l̇ëme. 21 No kjone kjone, tjl̈õkwo ëre kjrara, ga beno l̈öng mär Sbö go ame.
Rokër Sbö kong ga ba wopjl̈ú l̈i kjĩshko ga pja kjimte ara.