Leta I Wa Weŋgiya
Hibru
Jisas Gha Ghambu
Utuniye
Utu iviva
Letake iyake Jiu, iya thavala kaero thɨ loŋweghathɨgha Jisas, lenji leta. Jiu ghalɨŋanji vaŋa Hibru, iya kaiwae valɨkaiwae tembe raŋava thiye Hibru gharɨgharɨniye. Iyemaeŋge ma ra ghareghare thela va i roriya letake iyake na i variye weŋgi, na tembe ŋgoreiyeva ma ra ghareghare wagiyawe raloŋweloŋweghathɨko thiyako va inanji e the valɨvaŋga. Ghayamoyamo ŋgoreiya rarorori letake iyake va i rori theghathegha 60 na 70 A.D. e ghanjilughawoghawo, amba muyai Rom thɨ tagarakaraka Ŋgolo Boboma Jerusalem e tɨne. Mbaŋako iyako Rom i mbaroŋa yambaneko wolaghɨye.
Thiye Jiu raloŋweloŋweghathɨ thɨ vaidiya vɨrɨ lenji loŋweghathɨko kaiwae na vavana mbalama thɨ rakanjogha Jiu e lenji kururu na lenji vowo e Ŋgolo Boboma. Iya kaiwae rarorori i vaghareŋgi Jisas iye i laghɨye kivwalaŋgiya nyao thovuthovuye na amalaghɨniye Loi Nariye (Vaŋgothiye 1), ko iyemaeŋge amalaghɨniye i tabo na lolo ghinda kaiwanda (Vaŋgothiye 2). Na tembe ŋgoreiyeva, i laghɨye kivwalaŋgiya Mosese na Josuwa (3:1–4:13). I utuŋa na iŋa Jisas iye ravowovowo ŋgoreiya Melkisedek na le kaiwoko i thovuye kivwalaŋgiya ravowovowo me vivako lenji kaiwo. Jisas iye va i vamidiya dagerawe togha. Dagerawe teuye ma valɨkaiwae i vanamweŋgiya gharɨgharɨ na thɨ rumwaru Loi e marae, ko iyemaeŋge Jisas mbe ghamberegha vara e madɨbae i vanamweinda (4:14–5:10 na 7:1–10:18). Iya kaiwae renuwaŋake thiyake kaiwanji i vavurɨghegheŋgi na thava thɨ njogha e ghereinji, ko iyemaeŋge mbema thɨ ghataŋaghathɨ eŋge weinji lenji ghare matuwo thɨ roroghagha iya thovuyeko Loi va i dageraweko kaiwanji (6:11-12 na 10:35-36, 39). I dage weŋgi na valɨkaiwae ra vikikighathɨ na valɨkaiwae ra vareminja Loi (10:23), na e marandake mbe ra vonjimbughathɨ vara Jisas na ra ruku wagiyawe (12:1-3).
1
Jisas, Loi Nariye, i Laghɨye kivwalaŋgiya Nyao Thovuthovuye
1 Mevivako me mbaŋa tomethi na e kamwathɨ tomethi tɨnenji, orumburumbunda thɨ loŋweya Loi le utu weŋgiya ghalɨŋae gharautu,
2 ko iyemaeŋge e mbaŋake iyake, iye mbaŋa momouniye, ra loŋweya Loi le utu weya Nariye. Weya amalaghɨniye Loi va i vakathaŋgiya yambaneke na buruburu, na iye Loi kaerova i tuthi na bigibigike wolaghɨye inawe ne i mbaroŋa.
3 Iye Loi le vwenyevwenye manjamanjalawae na iye ŋgoreiye moliya Loi. Iye le utuutuko ele vurɨgheghe na i vakatha bigibigike wolaghɨye mbe inanjiwe vara. Amalaghɨniye i mare na i thavwiyathu gharɨgharɨ lenji tharɨ ko mbaŋa i vakathavao iyako, i voro e buruburu na i yaku Loi Vurɨvurɨghegheniye Moli valɨvaŋga e uneko.
4 Loi va i vakatha Nariye na i laghɨye kivwalaŋgiya nyao thovuthovuye, ŋgoreiya idako iya Loi va i unogiyakowe i laghɨye kivwala nyao thovuthovuye idanji.
5 Ŋgoreiyako kaiwae Loi mava mbaŋa regha i dage weya le nyaoko thovuthovuye regha na iŋa,
“Ghen Naruŋgwa ghen; na noroke ya tabona Ramanɨna ghino.”
Na amalaghɨniye utuniye Loi tembe iŋava:
“Ghino ne ya tabo Ramae na amalaghɨniye Naruŋgu.”
6 Tembe ŋgoreiyeva mbaŋa Loi i variya Nariye ghagamau e yambaneke, amba iŋa, “Lo nyaoko thovuthovuye wolaghɨye ne thɨ kururuwe.”
7 Le nyao thovuthovuye kaiwanji Loi iŋa:
“Ya vakathaŋgiya lo nyao thovuthovuye rakakaiwo ŋgoranjiya ndewendewe na ndɨghe mamiye.”
8 Ko iyemaeŋge Nariye utuniye iŋa:
“Mbema Loiya ghen, len ghamba mbarona i meghabana ma ele ghambako;
wein ghanɨthanavu rumwaru u mbaroŋaŋgi na thovuye len gharɨgharɨ.
9 U warariŋa thanavu i rumwaru na u botewoyathu thanavu raitharɨ,
iya kaiwae wein len warari laghɨye, ghino len Loi ya liŋgiya bunama e umbalɨna na ya vaŋguraweŋge u mbaroŋaŋgiya ghanunena.”
10 Loi tembe i dageweva Nariye iŋa:
“Giya, va i rikowe ghen u vakatha yambaneke, na buruburuko ghen nɨman muiye.
11 Yambaneke na buruburu ne thɨko, ko iyemaeŋge ghen u meghabana.
Thiye ne thɨ tharɨ ŋgoreiya kwama ghambɨghambɨ i ghambɨ na i vwatha.
12 Tene u vaghɨleŋgi ŋgoreiya thɨ senisiya ghanjikwama.
Ko ghen ma u totomethi, na yawalina ma ele ghambako.”
13 Loi ma mbaŋa regha i dage weya le nyao thovuthovuye regha na iŋa:
“U yaku gheke, valɨvaŋga e uneŋguke ghaghada ne ya biginjoŋaŋgiya ghanɨthɨghɨya e gheghenɨna raberabe.”
14 Ko nyao thovuthovuye thavalaŋgi? Thiye nyaoŋgi thɨ kaiwo weya Loi na i varivariye weŋgiya gharɨgharɨ kaero thɨ vaidiya vamoru na thɨ thalavuŋgi.