3
Wanthantharr kunanpunirr Pam Porka curc naŋan
1 Ŋul yarr i'i, naŋanma Jesus Christmam, ŋay Paul wuun prisonak nurruntam pam Gentilantam.
2 Anth okun nurr kana ŋeeyir Pam Pork nul ŋeeŋkmam minc ŋathun mit ŋathanmantam nurrnuŋun.
3 Nul meer rirrkan rirpinirr ŋathun warrmin ith ŋay pam ŋooŋkom niinim kar ulp ŋay kanpa ratan yumpirr ritar nurrnuŋun.
4 Ŋul ith nurr leta ŋathan naath-hat ulp, nurr aŋarr kaaluŋeeyih ŋay kuthip naŋan Christak walmeerem mincmin.
5 Pam kanaŋkarr pam ŋooŋkom minc, pelnan kaarp kunanpunum raakun. Ulp Ŋeeŋk-rithurr-minthurr yorrnurr meer rirrkan rirpinirr pam prophetak pam apostulak ith nul ŋanc wenehanirr yarr i'i:
6 peln pam Gentile thurmthurma wun-hatath pilun pam Jewthak pam-minc thonthak naŋun Christak ŋul ŋamp pam moŋthurr pit-hatath ith Nul man ke'err kuthip min naŋanmak.
7 Ŋul ŋah kunmicarr mit naŋan rirk-hatha ŋul Nul Pam Pork piinthaarrn minc-thurr ŋah kaalpiinth wenehanirr mit naŋanmak. Pam Pork-thurr ŋah mincthaaw naŋanmantam Nul piinthaarrn wenehanirr.
Pam Pork nul ŋan kaaluŋeeyim
8 Ŋawoy, ŋenem, ŋay pam ŋooŋkom niinam ith pam mantam minc pelnuŋun pam kaalaathim moŋthak ŋul Nul ŋah kunmicarr ŋay kuukmin wacwacirr naŋan aŋarr kunanpunuh pam korrpalak, yarri'i, Christ Nul pam thakiraaw wacwacirr pamal nuh kaarp koop kaaluŋeeyih.
9 Ŋay ak meer rirrkan yikir pam moŋthak Pam Pork Nul ŋeeŋkmam minc pam Gentilak pelnan kunk thanan-hatha. Peln ih'h kanaŋkarr pam ŋooŋkom minc niinim, yorr kana; Pam Pork riiran walmeerem ith Nul warrmin koop yumpirr thurmthurma naŋanman Jesus Christunthurr.
10 Ŋul ŋene? Pam Pork nul kaalpiinth wacwacirr ŋul yorrnurr ih'h ŋamp pam kaalaathiman yarr i'i aŋarr meerenah pelnuŋun pam thulumak, mih punth-kokon, pam porkthak raakumunak.
11 Ŋul nul Kotunthurr kookanpantam kun-micarr nuh Jesus Christ Pam Pork ŋamplin yomparrnan-natha raak ŋuul.
12 Ŋul naŋanma Christmam ŋamp naŋun aŋarr rokuh ŋul Nul ŋamplin muukur minimnanir, maŋmaŋal, iiwurr weneth-kaar ŋul ŋamp yorr pam kaalaath wuun naŋanma.
13 Ŋay yarri'i yik — meerkunwarr oŋkorr wun ŋathanma ith ŋay kaalmeer kenceyir nurruntam. Nurrnun min wacwacirr yup yomparrnanurrtha.
Kuukmin pam kaalaathim aŋarr mincmin yancih yorr
14 Ŋul yarri'i ŋay ulp puŋkumun niinir ruwunanpa Pam Naŋanip naŋanman Mih Puth Jesus Christak.
15 Ŋul pam moŋthurr raakumunak raakun namp kumun naŋan Pam Porka ŋamp wanurrur.
16 Ŋul ulp Pam Pork ith raak warrmin moŋ-kokonak kar paath therper rancirr, Nul nurrnun piinthaarrn aŋarr wenehanan Ŋeeŋk-rithurr-min naŋanman man ŋeeŋk paman.
17 Ŋul ulp Christ nul ak wunur man ŋeeŋk nurrnuntaman nurrŋun pam kaalaathamak ŋul nurr pam ŋeeŋkmam aŋarr niinah kar yuk yukumun thaarrnkak irrkop piinthirr raakun.
18 Nurr yarri'i kar yokun peln pam kaalaathim korrkanpa nurr aŋarr kaaluŋeeyhan Nul Kot wuun thampurr minc, wuun thorkorr minc, wuun iikop minc, wuun yuukan minc raak moŋthak.
19 Ŋul ulp nurr aŋarr kaaluŋeeyih mincminc Christ nul ŋeeŋkmam wacwacirr minc pama ŋul nurr aŋarr wun thurmthurma naŋun Kotak man ŋeeŋkan, thaathaarrn mincip.
20 Nul ŋamplin min yompomparr-nanancih, ŋamp wuump pokon raŋkaŋkuh iiwurr kaaluŋeeyih thil naŋanma. Nul mit pork wuump aŋarr rirkuh ŋampulŋun ŋul nul piinthaarrn wacwacirr.
21 Namp naŋan ak porkpunur pam kaalaathimak naŋanma Christ Jesusuntam, thonomarr raak meer-ŋuul ŋoontma. Ŋawoy kana.