17
God ata Babilon kasel imi angtiil yol kuyinsa kaami sang kaata ko
Rev 14:8, 16:19, 18:1-24, 19:2-3
1 Kemin, ensel fetkal imi kabas kutal-fukubip imi iipyak tem kulu ensel ma tal bokop-na-lomda: Talawa alep din kukup-ti utamapla, God ayo sadikimin unang win so kesu umi angtiil yol ayo kuuwa kala kalan o. Weng kaa bakabi kaami miit kaali, sadikimin unang kuumi sang uyo faldak abip dukum Babilon umi diim kabak tii bakabi kemin, Babilon uyo ti wok teta unsu dakmat diim mepso kuluwu tiinsu te!
2 Am bokon kala dik-daa kulaasu kaami kamok kamok iyo sadikimin kukup ultap ke, unang kuuso kanu un-bam ale, kuno kewipya, uta taba-lomdu umi kukup mafak kaata kamok kamok imi unang tunum imi kukuyin-bulula, kanun-unbip kemin, tunum wok mafak ina-lomda babonba tap, tawaal kala dik-daa kulaasu kaami unang tunum iyo sadikimin kukup kaaltap kaata, unang kuuso duka-bom kanu-bam ale, umi kukup mafak uyo kutal-fuku-bomdiwa, babon-bam God ayo kela yang banip o, kala ensel ayo kanum bokop-nala no.
3 Kemin, God ami Sinik ata kukup-nam-balaya, lom tap ayo dakaan-um-bom utam talaaliya, Ensel kaali tal nam-tama umbilin am bokon disanang ma ka daala kaa kalile, ensel ayo kukup-na utam talaaliya, Unang ma talaba tam saak wolti isakfulut ami daang kun diim tiinbu kala utamile, saak wolti kaami dabom kaali, fetkal ale, dabom diim ayo kong nakalkal; God ami win ku-mafak-dakaalin kiita, imi angtiil diim kawu alik dolsip iyo itamila, kaali yol ok kumun tem kaami saak wolti fingim kalaali atami.
4 Kemin, kanola unang kuumi ilim kutam tinilu uyo, ti unang kamokan kwiin o, kala-laabip umi ilim miki-laabu tap ke, uyo ilim isakfulut tambal tambal alep kiita mikilu kemin, kiit kon kaali gol so, tuum titup-kup sipying-sapyang-tabin so, bukupsan aye, kiita miki-lomdu umi sikil diim kaali, gol ta kap dotusip ayo kutal-fukubu kabaak-ali sok wain ok daa, kabaak-ali mafek mafek ninak tiinsu kukup sadikimin aye, kukup mafak mafak kiita ulmi kap kaptoowu abuu kutii kutal-fukubu kala, kalali utami.
5 Kemin, unang kuuli ulmi win kuwaasu ayo ulmi dabal kun diim kulu dolnin: Nali abip dukum titil so abip Babilon, nali am bokon kala dik-daa kulaasu kalawaami unang tunum sadikimin kukup so, atin ti kukup mafak mafak fatom tabin kukup so, tabuusip alik imi awak o kala dolsip.
6 Kemin, Babilon iyo God ami weng kutal-fukulin unang tunum titil-biki Yesus ami diim fep-nin iyo anulip saaknip kala, kala-somdula, unang kuuli imi tong fakayim-bam ale, imi kiim ayo ina-lomdu, babon-bulula, utam-ilomdi suun-daa angtiil angkaal dap-tiip-na ko.
7 Ensel ayo bokop-na-lomda: Kabi kaa angtiil angkaal kemin daa; nali unang kanubu kaami miit ayo ku-fatap-daap-ta-som ale, mafek mafek dabom fetkal so, kong nakalkal so, ami daang kun diim tiinbu saak wolti ami miit ayo ku-fatap-daap-ta ke-lokomi kemin, weng san-ilapya.
8 Kaali yol ok kumun tem umi saak wolti ata siin kawu kamokim ke-lom unang tunum iyo tiin mo-bom ilsa. Yale, kamala kalawaatale, ali kamokim ke-lom tiin moba disa. Kemin, umbalaak tawaal tem, tem aalap dukum kaluusu kabaaku bombe, kemin, bii luuka-somdala asuk kabaak liip tiltam bom-ilala, God ayo atin an-kutiila disa ke-lokoma. Sawaayak, God ami tawaal kala dotuulin disa ilomdala, kabak itamala, tunum malo ma tawaal diim kala ilokomip ili nami tunum ke-lokomip disa kala, kala-somdaya imi win ayo sukon tem kabak-ali dol-yinsa disa. Ili ami suunkup abip uyo iso ilokomip dinim. Kemin, kunolin unang tunum iyo utamiwa yi, Yol ok kumun tem kaami saak wolti ayo asuk talba kala, kala-lomdip aket tam baneyulala, fiyaap duu-mokomip.
9 Kanolin kemin, dok kanolin kapta tunum aket fukunin tangbal namti, nami weng miit uyo, utam dok ami miit kaata bakaba kala kalalap utam bam-daa kaal-kelon o kalap namti, kabi kabak dotu aket fukunan! Yol ok kumun saak wolti fetkal uyo faldak muk akiim fetkal unang o, kala abip awaalik dukum buu kaami diim tii-som ale, mafek mafek fetkal kulaa faldak kamok kamok fetkal abip sakbaalim kaptam-ami king fetkal imi diim tii kelu ko.
10 Kamok kamok o, kala king awakal kiili, isiik unang tunum tiin mo bii taana-taana-ke-silipla, kamala kalawaata kamokim king maakup ata-kup tunum unang iyo tiin moba. Kemin, ilom am ma daanokomu am mafiing diim kulaata, tiltam kamokim mafiing king ke-lomda, ata unang tunum iyo tiin molokoma. Ami tiltam king ke-lokoma kaali, God ali kuno kelaya, ayo king ke, ilomda ilanin tap ke-lokoma no.
11 Kamosinim yol ok kumun kayaak kaami saak wolti ayo kamokim ke-lom unang tunum iyo tiin mo ilsa. Lale, kamala kalawaata, ali kamokim ke-lom tiin moba disa; ali king fetkal imi iipyak tem kawu tunum maakup ata-kup bom-ilomdala taanse. Lale, ilom alta asuk tam tiin daa, ata asuk king kela, tunum unang kii tiin mo bom-ilala, God ayo taba atin aala disa ke-lokoma no.
12 Kong nakalkal ultap kaali, faldak-tii am ma daanokomu kawu, tunum nakalkal ita tiltam king ke-lokomip kiimi diim tiilu. Kemin, iso, yol ok kumun tem saak wolti aso, iyo titil kuluu-lomdipla, akal almi abip e kala tiin mola tiin mola ke luuk daalin tap so ke-lokomip.
13 King nakalkal kiili, aket maakup ke-lomdip imi tunum unang iyo yim-baalip yak yol ok kumun saak wolti ami unang tunum alik keliwale, king bom-bilip ita, ilmi titil uyo ok kumun kayaak ami kolaliwa, ata tunum unang iyo tiin mo ke-lokoma.
14 Yol ok kumun kabaak-ami saak wolti so, king nakalkal so, iyo Sipsip Man Yesus aso, waasi dinokomip. La, Sipsip Man ata kamok kamok alik imi dabom keba-kup, ata atin kamokim titil-kup tabasa. Kemin, ami titil kaata king alik imi titil kuluu kulaak banu keya-lomda ata ata ke-lokoma. God ali Sipsip Man ami tunum unang ita-kup ulelna tiltam ami okok kemin tunum ke-lom titil-fak-daa ami diim kawu fep-niwa, Sipsip Man so, ami tunum unang iso, iyo yol ok kumun kayaak so, king nakalkal so, imi tunum unang iso, dinokomip kaali, Sipsip Man alimal nikil ita ita ke-lokomip kayi! kala ensel ayo kanum bokop-na ko.
15 Ma kaata ensel ayo bokop-na-lomda: Sadikimin unang o, kala abip Babilon ayo ok teta taban-unsu wok dakmat diim mepso kulu tiinsu kala, kalbap kaami miit kaali, tawaal kala dik-daa kulaasu kaami abip ma ma kaami unang tunum so, tunum miit kusnum ma iso, ma tunum angtiil akal kusnum kusnum aye, tunum miit yakal ilmi weng kusnum bakamin iso, iyo Babilon kasel imi minlo tem unipla, tiin molip bilip.
16-17 Kemin, God ami aket fukunin kaali, Kanolin o, kalala, yol ok kumun tem saak wolti so, king nakalkal iso, iyo maaklo kanolum o, kala king nakal iyo aket maakup ke-lomdip imi tunum unang iyo yim-baalip yak yol ok kayaak ami unang tunum alik-daap kelipla, king ita ami okok kemin tunum kela-som; ok kumun kayaak ata king nakalkal imi kamok ke-lomda, ami tunum unang iyo tiin molokoma. Kemin, ok kumun kayaak aso, king nakalkal iso, ili unang sadikimin o, kala abip Babilon umi waasi kela, aket atul kola ke-lom unang umi mafek mafek tangbal uyo alik kukan-tiiwa, disa angtiil fatap kewa-lomdiwa, umi tiil uyo bakela ina-lom as kuyak daalip kiin abam-nokomu umi kanolokomu kaali, abip Babilon umi mafek mafek tangbal kaami sang kemin, alik kukan-tii duula kutii as kuyak daalip kiinbi tip fal-daa disa sang dinim keluya, God ami weng kaata abuulokomu no.
18 Kemin, unang utamap kuuli, faldak abip awaalik win naanin kaami diim tiilu kemin, sawaayak kawu abip kasel imi king o, kala kamok kamok ita ita ke tawaal kala dik-daa kulaasu imi king kusnum kuliili kulaak banipla, keya-lom ita tawaal kala dik-daa kulaasu kaami abip malo ma uyo tiin mo bii taana-taana-kem-tabasip o kala, ensel ayo kanum bakayila ko.