7
God ayo taba Israel unang tunum ilmi-kup 144 tausin ulelna tiltam almi unang tunum kesip kiimi sang kaata ko
Rev 3:12, 9:4, 14:1-5, 22:4
1 Nami lom tap ayo kanumsi disa kelule, kulaa lom tap kusnum ma duuli kaali, ensel atalingkal iyo tawaal kala dik-daa kulaasu kaami yaang atalingkal kawu tolna-tolna-keliwa, inim dulul aalap ma kutaltam daa-lom tawaal kalaaso, yol ok so, as aye uyo ku-mafak-daalamu no, kala-lomdip alik ti maakup maakup ita inim ayo ilela ilela ke-lom tolna-tolna-kebip kala, kalaali itami.
2 Kulaa atam talaalila, Ensel kusnum ma atan talebu lo kawu talaba kala atamile, ami sikil diim uyo God ali suunkup ilin tunum ami mafek mafek tunum unang imi angtiil diim dolmin ayo kutal-fuku-som ale, kulaata taba aptum kusal atalingkal ma God ayo ulelna yam-titil-diila tika-lom tawaal so, yol ok so, uyo ku-mafak-daalokomip kayi! kala, ulelsa imi dukum-kup naan-daa bokoya-lom,
3 tawaal so, yol ok so, as aye, kaa ku-mafak-dakamin daa; kano bom-ilip, naso nami naktum kusal ensel inang nuli nulmi God ami win ayo almi bon tem ti kutam daa bom ilin tunum unang God ulelna almi kesip imi tibi kun diim kawu dolilup disa kelula o, kalba-kup;
4 fal-siki taba nami bokop-na ko: God ami unang tunum alik ulelna almi kensip ili 144 tausin kemin, nuta imi tibi kun diim kawu God ami win ayo dol-ila-sulup. Kemin, unang tunum 144 tausin kiimi awaalik kaali, Israel kemin, kaami win kusnum ma kaali Jekop o, ken-umbip ami man ayo talangkal kemin,
5-8 fik diilim ami win kaali Juda, ami tamon kaa Ruben, toop Gat, Asa, Naptali, Manase, Simeon, Livai, Isaka, Sebulun, Josep, ken yakaba butoop Benjamin kulaata afung, nikil kalanolin ita foko-tiisa. Kemin, God ayo tunum talangkal alik iyo maakup maakup kiimi tunum miit kaptoop imi iipyak tem kabaku tunum unang almi 12 tausin ulduu-ulduu-ke-bi-lomdala, tiltam almi tunum unang kesip o, kala ensel ayo bokop-na ko.
Unang tunum yaapkan abiil kawu God ami lotu ke-bam fiyaap duumsip kiimi sang kaata ko
Rev 3:4-5, 6:9-11, 7:13-17, 12:10-11,17, 13:10, 14:12-13, 15:2-4, Rev 16:5-7, 17:6, 18:24, 19:2,7-8, 20:4,12,15
9 Kulu utami disa kelu tal-unule, ilanin tap ke talaalila, God almi sia diim tiinba so, Sipsip Man Yesus aso, alim imi dabaal kun diim kawu tunum unang yaapkan o, kala-som disa akal ma tunum ayo ma ding bokolama dinim, iyo tolbip kala itamile, tunum miit disa yakal ilmi angtiil kusnum kusnum so, tunum miit yakal abip ma abip ma unang tunum miit yakal ilmi weng kusnum bakamin iso, iyo tolbip kala itamile, alik kiili ti almi ilim namaal batbat-kup miki-miki-ke-lomdip, God ami fiyaap dolum o, kala as bapliim ayo fakabi fuku-bom fiyaap duu-bam dukum-kup bokolip ko:
10 Numi God Dukum almi baan diim tiinba so, Sipsip Man so, alim ili ita ita ke-lom numi waasi uyo ita welip kulaak bana dabaak-mo kela-lomdip numi iliim uyo boya-silip kemin, nuli fiyaap-kup duu-bam ami win ayo kufolum o, ke-bam kanu-biliwale,
11 ensel-miin yakal God ami sia diim mepso kulu falala kuyak mobip kemin iso, kamok kamok ilimi-kup 24 kiiso, tam God ami mafek mafek tunum tap tiinbip atalingkal iso, iyo alik God ami dabaal kun diim kulu tilik-duung fakela daak tiin-ilom imi tiin matum uyo ukdaalip tawaal unala, God ami lotu kamaan-bam ami win ayo kufon-bam bokola-lomdip:
12 Faneng taa! Nokol yaap keyula numi God ami fiyaap ayo duu-bam ale, yaap ke yo, ke-bam ale boko-lom: Kabi sakbaalim ale, kabi ti aket tambal-kup fukunin ale, kabi ti titil so, kaluung so, imi miit kayaak kemin, kabi kapta kapta kesap o, kala suunkup kapni tong bakamum o, kalalupla kanu-mokomup kemin, fan ko, ke-bam kemip ko.
God ami unang tunum imi angtiil yol kuyak tii-yinsa kiimi sang kaata ko
Rev 3:4-5, 6:9-11, 12:10-11,17, 13:10, 14:12-13, 15:2-4, Rev 16:5-7, 17:6, 18:24, 19:2,7-8, 20:4,12,15
13 Kulaali, kamok kamok 24 imi maakup ma dik-daap-na-lomda: Kapyo, kabi tunum unang ilim namaal tuuptuup mikibip kiili, itamap kii, dok ami unang tunum o kalbap i? nakale,
14 nayo bokoli ko: Kiili ma itamsi daa. Kiili kamokim kaltapta-kup itamsap kemin, bokop-nan o, akila, ayo bokop-na ko: Kiili, angtiil yol awak dukum kaami diim tabemin kuyaku God ami unang tunum waasi ta angtiil yol awak dukum uyo kukaayim-bilip, aket uluum tabemsip. Lale, ili ti mamdet dabak-daa God ami lak-kup duu-bilipla, bii imi angtiil yol awaalik uyo disa kelula, Sipsip Man Yesus ata taan-ilomdala, ami kiim kaata sing-tam-daa-lomdu unang tunum kiimi ban kemin ayo diing daayimulula, ilim namaal dildaak tinilin tap ke-lom kutookso-kup keliple,
15 God Dukum ayo itamala, Ti yaap ma kelip kala, kala-somdala, iyo ulelnala almi tiin diim uyo suunkup kutamiip so, am taap so, ayo liip fen-bam bomdipya God ami okok kamaan-bam, sawaayak pris imi tawaal diim lotu am awem kaptam-ami okok kemsip tap kamaan-bilipya, Dukum almi baan diim tiinba ali tunum unang iso, suunkup bomda buku tiin moba.
16 Kemin, kiili asuk maso ma ima tinap keyokomu disa. Ok del ma dap-tii-yokoma disa. Kiili, atan mamin aa, wing mamin diim ayo maso ma kiin-abam-nokomip disa yo.
17 Sipsip Man ata taba-lom Dukum ami tiin-bom ilin baan iip kulu tolba kulaata, ili sipsip tiin molin tunum almi sipsip tangbal-kup tiin mo-laaba ultap yaap-kup tiin mo-lomdaya, yim-tamala din tuum tem wok bina talemin suunkup ilin wok inin kawu im-din daalaya, ina-lomdip suunkup ilokomip. Kiimi angtiil yol so, imi aket uluum so, uyo disa kelula, God ami tiin ok ayo alik maakup dilit moyokoma no kala-lomda, kamokim maakup ma ata kanum bokop-na ko.