10
Ki̱li̱si̱to niiye akaba kihonguwa mulundi ghumui aamala
1 Bilaghilo bya Musa tabyolekagha bilungi byonini ebyaghendagha kwisa, bhaatu byolekagha kisasani̱ kyabiyo kwonkaha, tabyabaagha majima ghoonini ghʼebi Ki̱li̱si̱to aatukoleeye. Bihonguwa bisusaane ebi, baabi̱hongagha bu̱li̱ mwaka, bhaatu tabyagu̱bhi̱ye bwile obu kufoola abaasagha kulami̱ya kuba bantu abatali na kabhi.
2 Buuye nguli bihonguwa byagubhagha kubafoola abatali na kabhi, bangubiikaliililagha kubihonga? Nanga byangubaaye mulundi ghumui bifooye abaasagha kulami̱ya kuba abatali na kabhi, kandi tabangu̱todhi̱ye baba abali na musango haabwa bibhi byabo.
3 Bhaatu bihonguwa ebi bu̱li̱ mwaka byasu̱ki̱yagha bantu aba bibhi byabo,
4 nanga takikugubhukana saghama ya nte na ya mbu̱li̱ kuuyʼo bantu bibhi byabo.
5 Nahabweki obu Ki̱li̱si̱to aasi̱ye munsi muni, aaghila Luhanga ati,
“Tawaabbali̱ye kukuhongela bihonguwa bya bisolo na bya bilimuwa,
bhaatu okampa mubili.
6 Bihonguwa bya bisolo byokeei̱ye
na bihonguwa binji baahongagha haabwa kibhi
tabyaku̱dheedhi̱ye.”
7 Niibuwo aatodhi̱ye aaghila ati,
“Luhanga wanje, ndi hani,
naasi̱ye munsi kukola ngoku ntegheka yaawe eli,
ngoku kyambu̱ghi̱yʼo mu Ebyahandi̱i̱ku̱u̱we.”
8 Ki̱li̱si̱to akadu̱bha aaghila ati, “Tawaabbali̱ye kukuhongela bihonguwa bya bisolo na bya bilimuwa, kedha bya bisolo bookeei̱ye na bihonguwa binji baahongagha haabwa bibhi, bihonguwa ebi tabyakudheedhagha.” Nankabha bilaghilo mbyalaghilagha bantu kuhonga.
9 Du̱mbi̱ aaghila ati, “Luhanga wanje, ndi hani, naasi̱ye munsi kukola ngoku ntegheka yaawe eli.” Aayʼo ndaghaano yʼoku̱du̱bha, kandi aatʼo yaakabili.
10 Ti̱ haabwa ntegheka yee eghi, tukafooka bahi̱ki̱li̱i̱ye mulundi ghumui twamala kukwama mu kihonguwa kya mubili ghwa Yesu Ki̱li̱si̱to.
11 Bu̱li̱ kilo bu̱li̱ mu̱hongi̱ mukulu eemililagha kukola mulimo ghuwe ghwa bu̱hongi̱; kandi aakaliilila kuhonga bihonguwa ebitaakugubha kuuyʼo bibhi.
12 Bhaatu obu Ki̱li̱si̱to mu̱hongi̱ mukulu oghu eehaayeyo kuba kihonguwa mulundi ghumui kuba kya bilo nʼebilo haabwa bibhi bya bantu, aasitama haa luhande lwa mukono ghwabuliyo ghwa Luhanga.
13 Ti̱ ku̱lu̱gha bwile obu analindiliiye ku̱hi̱ki̱ya ngi̱ghu̱ basitaaye hansi ya bighele byawe,
14 nanga haabwa kihonguwa kimui eki, aafooye abakwete kufooluwa bahi̱ki̱li̱i̱ye kuba abatali na kabhi bilo nʼebilo.
15 Mwoyo Ahi̱ki̱li̱i̱ye naye akutughambilaghʼo kini. Akadu̱bha aaghila ati,
16 “Mukama aaghila ati, eni niiyo ndaghaano
nkukola na bantu banje mu bwile buliisa:
Nkuta bilaghilo byanje mu mitima yabo
kandi mbihandiike mu byeli̱li̱kano byabo.”
17 Aatodha aaghila ati,
“Tanditodha kuusuka bibhi byabo
kandi bikoluwa byabo bi̱bhi̱i̱hi̱ye.”
18 Kandi Luhanga akaakughanilagha bantu bibhi byabo, taakwetaaghisibuwagha kutodha kubʼo bihonguwa byabiyo bbaa.
19 Nahabweki, bahi̱ki̱li̱ja baanakyanje, tukimani̱ye ngu kukwama saghama ya Yesu eghi ekaseeseka haabwatu niikiyo kikuleka tu̱gu̱mi̱ye ngoku tulitaaha mu Kisiika Ki̱hi̱ki̱li̱i̱ye Kusaali̱ya byona mu maaso ghaa Luhanga.
20 Kandi tumani̱ye ngoku aatuteeleeyʼo mulingo ghuhyaka oghukukola haabwa kuhaayo mubili ghuwe kihonguwa niikuwo batatutanga kutaaha hambali Luhanga ali, ngoku baataagha kateni̱ mu weema kutanga bantu kutaaha mu Kisiika Ki̱hi̱ki̱li̱i̱ye Kusaali̱ya byona.
21 Ti̱ ngoku tuli na mu̱hongi̱ mukulu ahu̱ti̱ye, oghu alemi̱ye bantu baa Luhanga boona,
22 oleke tumwebinge na mitima yamajima kandi tumani̱ye kwonini ngoku tu̱mu̱hi̱ki̱li̱i̱je kandi twamisangililuwa na saghama yee kutuuyʼo kwehi̱ghu̱wa musango ghu̱tu̱si̱ngi̱ye, kandi aba mibili yaatu yaanabi̱buuwe na maasi gheeli̱ye kwonini, nahabweki oleke twebinge Luhanga tu̱gu̱mi̱ye mu mutima kandi tumwesi̱ghi̱ye kwonini.
23 Muleke tuukalile kimui tunagumiiye haa kunihila oku tukughilagha tuti tuli nakuwo, nanga Luhanga oghu akatulaghani̱ja ni mwesighibuwa.
24 Kandi muleke tuusuke ngoku tubhonganuuwe bu̱li̱ omui kwekambi̱i̱si̱ya muunakiye haa kukundangana kandi kukola bikoluwa bilungi.
25 Tutaleka kusanga-sangaana hamui kulami̱ya, ngoku bahi̱ki̱li̱ja banji bakwete kukola, oleke bu̱li̱ omui agu̱mi̱ye muunakiye kukila munu ngoku kilo kya kukuuka kwa Mukama waatu kili haai ku̱hi̱ka.
26 Ntwatu̱u̱yemu kweyongela ku̱si̱i̱sa haanu̱ma ya ku̱twegheesi̱ya majima haa Ki̱li̱si̱to, taaliyo bihonguwa binji ebikutodha kukoluwa kutuuyʼo bibhi bbaa.
27 Bhaatu eki tukulindilila twobahi̱ye ni Luhanga ku̱tu̱twi̱la musango kandi kulaghila ati batukube mu mulilo ghwamaani̱ oghu̱ku̱hwelekeeleli̱ya ngi̱ghu̱ sya Luhanga syona.
28 Ti̱ weena oghu aaghayagha bilaghilo bya Musa, haakabaaghʼo baakai̱so babili kedha basatu abakughila bati aabighai̱ye, muntu oghu baamwitagha hataliyo kisa kyona.
29 Buuye nkifubilo ki mu̱kweli̱li̱kana muti muntu alitunga oghu akughaya Mwana wa Luhanga kandi eeli̱li̱kana ati saghama yee ya ku̱gu̱mi̱ya ndaghaano eghi ekufoolagha bantu kuba bahi̱ki̱li̱i̱ye, teeli na mughaso, kandi oghu akwambulagha Mwoyo Ahi̱ki̱li̱i̱ye oghu akutughililagha ngughuma?
30 Nanga tumani̱ye oghu akaghila ati, “Ni̱i̱si̱ye nkuhoolagha ngi̱ghu̱ kandi nsasula haabwa ebi bakubakolʼo.” Aatodha aaghila ati, “Mukama alifubila bantu be.”
31 Nkintu kyakabhi munu Luhanga mwomi̱i̱li̱ kukufubila.
32 Muusuke bwile butimbiikaane mwasaaliiyemu mu bwile obu mwahi̱ki̱li̱i̱je Ki̱li̱si̱to, obu mwamiliiye na maghulu ghaanu abili mu bwile obu baababona-boni̱yagha kwonini.
33 Bunji nʼobunji baabambulilagha haagati ya bantu kandi baabahuula, kandi bunji nʼobunji mwakoonelagha aba bakwete kubona-boni̱ya ngʼanu.
34 Mwaghililagha kisa abali mu nkomo haabwa ku̱hi̱ki̱li̱ja, kandi mwasi̱i̱magha mu̱dheedheeu̱we bantu banji kubanyaghʼo bintu byanu, nanga mukaba mumani̱ye ngoku mulitunga ebisaahi̱yʼo kandi ebitaakuhuwo.
35 Nahabweki mutalu̱gha haa kwesigha kwanu Mukama, nanga kikubaha mi̱gi̱sa ekani̱ye.
36 Mukwetaaghisibuwa ku̱gu̱mi̱si̱li̱ja niikuwo haanu̱ma ya kukola ebi Luhanga abbali̱ye, mugubhe kutunga byona ebi aalaghi̱i̱sani̱i̱ye.
37 Nanga mu bwile butaseli̱ye,
“Oghu mulindiliiye akwisa kandi taakukeesekeeleluwa bbaa.
38 Muntu akuukala ahi̱ki̱li̱i̱ye ewaa Luhanga haabwa ku̱hi̱ki̱li̱ja.
Ti̱ naanalu̱ghi̱ye haa ku̱hi̱ki̱li̱ja kuwe
tankudheedhuwa naye bbaa.”
39 Etu̱we tatuli nga abaalu̱ghagha haa ku̱hi̱ki̱li̱ja kwabo kandi abakuhwelekeelela, bhaatu tuli nga abaku̱hi̱ki̱li̱ja kandi bamanya ngoku baju̱nu̱u̱we.