Bbaluwa yʼoku̱du̱bha eghi
Yohaana
Aahandi̱i̱ki̱ye
Kwanjula
Mukwenda Yohaana akahandiikila Baki̱li̱si̱taayo aabaagha aku̱ndi̱ye nga baana be. Aabeekambi̱i̱si̱ya kuukala banali mu bumui na Luhanga hamui na Yesu Ki̱li̱si̱to. Aabahabula kwelinda beegheesi̱ya baa bisubha abali mu bi̱bbu̱la bya bahi̱ki̱li̱ja.
Yohaana aasu̱ki̱yagha bahi̱ki̱li̱ja ngoku eye aakaayʼo na Yesu, nahabweki amani̱ye ngoku Yesu aabaagha muntu kwonini kandi Mwana wa Luhanga. Aabagu̱mi̱ya ati bakutunga bwomi̱i̱li̱ butahuwʼo mbaakaaye baneesi̱ghi̱ye Yesu. Aabaghambila ati ebo nga Baki̱li̱si̱taayo babhonganuuwe kukunda Luhanga kandi kukunda baanakyabo.
1
Kighambo kya bwomi̱i̱li̱
1 Tulimabahandiikila haa bya Kighambo oghu akuhaagha bwomi̱i̱li̱, oghu akabʼo ku̱lu̱gha mu ntandiko, oghu twaghu̱u̱ye, oghu twaboone na maaso ghaatu, oghu twaloli̱ye, kandi twamu̱ku̱mʼo na ngalo syatu.
2 Bwomi̱i̱li̱ oghu tukamwolekuwa, twamubona, niiye tukwete kuheela buukai̱so kandi kubalangilila haa bwomi̱i̱li̱ butahuwʼo, obwali buli na Eseetu̱we, bwatwolekuwa,
3 obu twaboone kandi twaghu̱wa, niibuwo tukubalangilila dhee, niikuwo mube mu bumui naatu, ngoku naatu tuli mu bumui na Eseetu̱we kandi na Mwana wee Yesu Ki̱li̱si̱to.
4 Tukwete kubahandiikila bintu bini, niikuwo etu̱we boona tudheedheluwe kimui.
Kulubhatangila mu kyeleeli̱
5 Buni niibuwo butumuwa obu twaghu̱u̱ye naabu̱gha kandi niibuwo tukubalangililagha tuti: Luhanga ni kyeleeli̱, kandi muli eye taalimu mweli̱ma ghwona.
6 Kaakuba tughila tuti tuli mu bumui na Luhanga, bhaatu ntunalubhatangila mu mweli̱ma, tukuba ntuha bisubha kandi tutaakukola byamajima.
7 Bhaatu ntwalubhatangiiye mu kyeleeli̱, ngoku naye ali mu kyeleeli̱, tukuba tuli mu bumui, kandi saghama ya Yesu Mwana wee ekutunaabi̱yaghʼo bu̱li̱ kibhi kyona.
8 Bhaatu nitwaghi̱li̱ye tuti tatuli na kibhi, tukuba nitwedimaaga, kandi majima ghatatulimu.
9 Bhaatu nitwatuuye bibhi byatu, eye ni mwesighibuwa kandi mwengani̱ja, akutughanila bibhi byatu kandi atunaabi̱yʼo butahi̱ki̱li̱i̱ye bwona.
10 Kaakuba tughila tuti tatukasi̱i̱sagha, tukuba ntumufoola mu̱hi̱ wa bisubha, kandi kighambo kiye kitatulimu.