10
Ku̱ku̱wa kwa Nadaabbu na Abbi̱hu̱
1 Nadaabbu na Abbi̱hu̱, batabani̱ baa Alooni̱, bu̱li̱ omui aakwata kibindi kiye aatu̱mi̱kamu mulilo kandi aataamu bubbani̱, baahonga mulilo mu maaso ghaa Mukama, atabalaghiiye.
2 Du̱mbi̱ mulilo ghwalu̱gha ewaa Mukama, ghwabooki̱ya kandi baakwi̱la mu maaso ghaa Mukama.
3 Musa aaghila Alooni̱ ati, “Kini niikiyo Mukama aabu̱ghi̱ye obu aaghi̱li̱ye ati,
“ ‘Boona abaku̱mpeeleli̱yagha,
bali na ku̱hu̱ti̱ya bu̱hi̱ki̱li̱i̱le bwanje
kandi nkwoleka bantu ki̱ti̱i̱ni̱sa kyanje.
Bantu boona bali na ku̱mpu̱ti̱ya.’ ” Bhaatu Alooni̱ aakala aholeei̱ye.
4 Musa aabilikila Misai̱li̱ na Elijafaani̱, batabani̱ baa U̱jeeli̱ mu̱ghenji̱ wa ese Alooni̱ kandi aabaghila ati, “Mwise hani, muheeke mi̱ku̱ ya baghenji̱ baanu, mughiiye mu maaso ghaa ki̱i̱kalo ki̱hi̱ki̱li̱i̱ye kandi mu̱ghi̱twesi̱ye enja ya hambali Banai̱saaleeli̱ baghooneeye.”
5 Du̱mbi̱ baasa kandi baaheeka mi̱ku̱ eghi enali mu bi̱lu̱waalo bya bu̱hongi̱. Baaghi̱twesi̱ya enja ya hambali Banai̱saaleeli̱ baghooneeye, ngoku Musa aabalaghiiye.
6 Musa aaghila Alooni̱ na batabani̱ be babili Eli̱yeeja na I̱tamala ati, “Mutaleka kucanula esoke lyanu kandi mutatemula ngoye syanu haabwa kweghunga, nanga naanu dhee mu̱ku̱ku̱wa kandi Mukama akusaaliluwa na ki̱bbu̱la kya Banai̱saaleeli̱ kyona. Bhaatu Banai̱saaleeli̱ baanakyanu boona, bakugubha kweghunga haabwa Nadaabbu na Abbi̱hu̱ aba Mukama aati̱ye na mulilo.
7 Mutalu̱gha haa mulyango ghwa weema ya kusanga-sangaanamu, nimwatooye mu̱ku̱ku̱wa, nanga mafu̱ta ghaa kusiigha ghaa Mukama baabasiighye ghanabaliyo.” Nahabweki Alooni̱ na batabani̱ be baakola ngoku Musa aabu̱ghi̱ye.
8 Mukama aaghila Alooni̱ ati,
9 “Uwe na batabani̱ baawe, mutaghendagha mu weema ya kusanga-sangaanamu munooye vi̱i̱ni̱ kedha maaluwa. Kaakuba mukola eki mu̱ku̱ku̱wa. Eki nkilaghilo kya bilo nʼebilo mu mijo yaanu yoona eghi ekwisa.
10 Muli na kumanya mbaghani̱ja haa bintu bi̱hi̱ki̱li̱i̱ye na bya bu̱li̱ kilo kandi mbaghani̱ja haa bintu byeli̱ye na ebi̱teeli̱ye.
11 Muli na kwegheesi̱ya Banai̱saaleeli̱ bilaghilo byona ebi Mukama aahaaye Musa kubaghambila.”
12 Musa aaghila Alooni̱ na batabani̱ be babili abaati̱ghaayʼo Eli̱yeeja na I̱tamala ati, “Kihonguwa kya bilimuwa eki ki̱hi̱ki̱li̱i̱ye. Mukwate ebyati̱ghaaye haa kihonguwa kya bilimuwa kya kihonguwa bookeei̱ye haa mulilo kya Mukama, mukiliye kitalimu ki̱tu̱mbi̱so haakpengbu̱ ya kyakuhongelʼo bihonguwa, nanga ni kihonguwa ki̱hi̱ki̱li̱i̱ye kwonini.
13 Muliile migaati̱ eghi mu ki̱i̱kalo ki̱hi̱ki̱li̱i̱ye, nanga ni mughabo ghwawe na baasukulu baawe ku̱lu̱gha haa bihonguwa ebi bookeei̱ye haa mulilo bya Mukama kandi eki niikiyo Mukama andaghiiye.
14 Bhaatu enu̱we, batabani̱ baanu na bahala baanu mukugubha kuliya mbanda na kibelo ebi baamu̱ki̱i̱ye ewaa Mukama. Bhaatu mubiliile mu ki̱i̱kalo kyeli̱ye, nanga ni mughabo oghu Mukama aahaaye enu̱we na baasukulu baanu ku̱lu̱gha haa bihonguwa bya bu̱si̱nge bya Banai̱saaleeli̱.
15 Kibelo eki baaleeti̱ye na mbanda eghi baamu̱ki̱i̱ye bali na kubileete na bisabu̱ bya bihonguwa bookeei̱ye haa mulilo, ku̱bi̱i̱mu̱ki̱ya mu maaso ghaa Mukama nga kihonguwa baamu̱ki̱i̱ye. Bintu ebi ghulabaagha mughabo ghwawe na baasukulu baawe bilo nʼebilo, ngoku Mukama aalaghiiye.”
16 Obu Musa aabu̱u̱li̱li̱li̱i̱ye bhyani ebikwetʼo mbu̱li̱ ya kihonguwa haabwa kibhi kandi naamanya ngoku baaghyokeei̱ye, asaaliluwa haabwa eki Eli̱yeeja na I̱tamala batabani̱ baa Alooni̱ baakoli̱ye kandi aabaghila ati,
17 “Nkiki kyaleki̱ye mbu̱li̱ ya kihonguwa haabwa kibhi mutaaghiliila mu ki̱i̱kalo kyʼomu ki̱i̱kalo ki̱hi̱ki̱li̱i̱ye? Mbu̱li̱ eghi ni kihonguwa ki̱hi̱ki̱li̱i̱ye kwonini kandi Mukama aaghihaaye enu̱we haabwa mukolo ghwa kughaniluwa bibhi bya Banai̱saaleeli̱.
18 Saghama ya mbu̱li̱ eghi ngoku mutaaghi̱leeti̱ye mu Ki̱i̱kalo Ki̱hi̱ki̱li̱i̱ye, mbu̱li̱ eghi mwangughiliiliiye haai na ki̱i̱kalo ki̱hi̱ki̱li̱i̱ye, ngoku naabalaghiiye.”
19 Bhaatu Alooni̱ aaghila Musa ati, “Obwalo bantu baaleeti̱ye kihonguwa kyabo haabwa kibhi na kihonguwa kyona kyokeei̱ye mu maaso ghaa Mukama. Bhaatu bintu bi̱bhi̱i̱hi̱ye byambaayʼo. Buuye Mukama angu̱dheedheeu̱we nguli obwalo naaliiye kihonguwa haabwa kibhi?”
20 Obu Musa aaghu̱u̱ye eki, aateekaana.