5
Kuhabula kwelinda bu̱syani̱
1 Mwana wanje, ote mutima haa magheji ghanje
kandi ooghu̱we kwetegheeleli̱ya kwanje.
2 Okumanya ngoku okwetwalikani̱ya kusemeeye
kandi bighambo byawe bikwoleka ngoku weetegheleei̱ye.
3 Ebi mukali̱ mu̱syani̱ aku̱bu̱gha bikugubha kunuliilila nga bwoki
kandi bighambo biye biheheele kusaali̱ya magita.
4 Bhaatu haakumaliilila aku̱ku̱ti̱ghi̱lagha,
kusaaliluwa kandi kubona-bona.
5 Akuleetelejagha bantu ku̱ku̱wa
kandi bikoluwa biye bitwala bantu mu lu̱ku̱.
6 Taakukwamagha kihanda ekikutwalagha mu bwomi̱i̱li̱,
akuhabagha, bhaatu atamanya.
7 Nahabweki baana banje, mu̱ntegheeleli̱ye
kandi mutaabululuwa ebi nkwete kubaghambila.
8 Mukali̱ ngʼoghu muukalaghe muselaanʼo naye
kandi mutaghenda haai na lwighi lwa numba yee.
9 Nimwaghendi̱yeyo, mukwehiyʼo ku̱hu̱ta kwanu banji bakutwale
kandi bantu batali na kisa bakubaata munali baana.
10 Buguudha bwanu bwona obu mwakoli̱ye na maani̱ ghaanu,
muntu onji akubutwala.
11 Oli̱ku̱wa nu̱weehu̱mi̱ya
kandi woolobeeye kimui.
12 Olighila oti, “Nkakola kubhi kwoha kumpana
kandi kubhenga kuhabuluwa.
13 Tanaaghu̱u̱ye beegheesi̱ya banje
kandi tanaategheleei̱ye ebi bangambilagha.
14 Nkaba ndi haai kuhemuka kwonini,
mu maaso ghaa bantu boona.”
15 Obe mwesighibuwa ewaa mukali̱ waawe omui
kandi okunde kulangaala naye enkaha.
16 Ngoku otangu̱bhi̱i̱ya maasi ghasemeeye kughaseesa mu luguudhe,
niikuwo otabhonganuuwe kulangaala na bakali̱ banji.
17 Odheedhuwaghe kulangaala na mukali̱ waawe enkaha,
Otalangaalagha na bakali̱ banji.
18 Odheedhuwe haabwa mukali̱ osweye mu buujongo bwawe,
oleke eye abe kudheedhuwa kwawe.
19 Omubonaghe asemeeye kandi mu̱dhooti̱ nga mpala.
Olekaghe mabeele ghe ghakumalaghe bwile bwona
kandi kukunda kuwe kukuleetelejagha kudheedhuwa.
20 Mwana wanje, otasi̱i̱ma mukali̱ mu̱syani̱ kukutwali̱li̱ja
kandi otakwata haa mabeele ghaa mukali̱ oghu atali waawe.
21 Mukama akubonagha byona ebi okwete kukola
kandi hoona hambali okwete kughenda, akuukalagha aku̱loli̱ye.
22 Muntu mubhi, bibhi biye niibiyo bikumukwatagha
kandi kibhi kiye kili nga mughuwo ghu̱mu̱bohi̱ye.
23 Aku̱ku̱waagha nanga taali na kwelinda
kandi abula nanga budhoma buwe.