127
Kusinda Mukama haabwa bulungi buwe
Kilimbo kya kukoma Yelusaalemu kulami̱ya. Jabbu̱li̱ ya Solomooni̱.
1 Mukama ataakweye numba,
abakwete kughikwela bakuba mbatalibanila busa.
Mukama ataali̱ndi̱ye kibugha,
abakwete kukilinda bakuba mbalindila busa.
2 Takili na mughaso kuumuka nkyambisi cu̱i̱-cu̱i̱
kandi kulangaala okeesekeleeuwe mukilo
noonatalibana kutunga byokuliya.
Aba Mukama aku̱ndi̱ye akubahaagha byokuliya nankabha baba baghwesaghiiye.
3 Majima, baana ni bugwetuwa ku̱lu̱gha ewaa Mukama
kandi ni mpeela eghi akuhaagha.
4 Baana aba muntu aku̱byalagha anali mutabhana,
bali nga bimala ebi muusilikale akwete mu ngalo.
5 Ali na mu̱gi̱sa oghu ali na bimala bikani̱ye ebi.
Naatongaane na ngi̱ghu̱ siye haa geeti̱,
tabaku̱mu̱si̱ngu̱la bbaa.