98
Luhanga alemi̱ye nsi
Jabbu̱li̱.
1 Mulimbile Mukama kilimbo kihyaka,
nanga aakukolagha byakuswekani̱ya.
Ngalo yee yabuliyo kandi mukono ghuwe ghwabuliyo ghu̱hi̱ki̱li̱i̱ye,
byoleki̱ye maani̱ ghe ghaa kujuna.
2 Mukama aaleki̱ye bu̱si̱ngu̱li̱ buwe baabumanya
kandi ooleki̱ye bu̱hi̱ki̱li̱i̱le buwe mu mahanga.
3 Aasu̱ki̱ye kukunda kuwe kwamaani̱
kandi bwesighibuwa haa bantu baa I̱saaleeli̱.
Bantu baa munsi yoona baaboone
kujuna kwa Luhanga waatu.
4 Mulimbile Mukama nʼelaka lyamaani̱, enu̱we bantu baa munsi yoona.
Mumulimbile mu̱dheedheeu̱we bilimbo bya kusemeeleluwa.
5 Mulimbe nimusinda Mukama,
mulimbe nimuteela li̱kembe.
6 Muteele bi̱i̱di̱yo byamaani̱
kandi mu̱bu̱ghe nʼelaka lyamaani̱,
mu̱dheedheeu̱we mu maaso ghaa Mukama, mu̱lemi̱ waatu.
7 Oleke nanja na byona ebilimu bisinde Mukama nʼelaka lyamaani̱.
Oleke nsi, na ebilimu byona byomi̱i̱li̱ bimusinde.
8 Oleke maasi ghateele mu ngalo
kandi myena elimbile hamui edheedheeu̱we,
9 mu maaso ghaa Mukama.
Akwisa ku̱twi̱la nsi musango,
aku̱twi̱la nsi musango mu bwengani̱ja kandi mu majima.