11
Jon nöbö nuŋ bli yad abmɨn, Jisas nuguba dumä
(Luk 7:18-35)
1 Jisas nöbö nuŋwa akuyöbö möl sö piaku ñɨgö al aliö rɨmɨdɨŋ, me rön, yad nöl ri abön, mögörɨb aku röböxön, taun hör il mebla aku duön, nöbö mö akuyöbö ñɨgö mönö yad nölöŋa.
2 Makwam röbö pal nölɨb nöbö Jon naga mɨdön, Krais agö magɨm röŋ mönö aku nugwön, nöbö nuŋ bli yad abmɨn, Krais mɨdöŋ yöra uröpɨnön,
3 nugwo yad nugwön yadmä, “Anɨŋ yad nölö, naŋ nöbö ‘Krais’ me rön, öim pöx mɨdmɨdöl akwör hölanö owa an nöbö hör i keir pöx mɨjnɨŋö?” rɨmä.
4 Aliö rɨmɨn, Jisas ñɨgö yadöŋa, “Ñɨŋ Jon mɨd yöra duön yajöña, ‘An duön mämäg ana keir nugwön, an keir rɨmɨj palön yöxöla,
5 nöbö aku nöbö mö mämäg we wöl bla rɨmɨn, mämäga ix nugwöia. Nöbö mö yödpɨlö gwogwo rɨ bla rɨmɨn, ödöia yön ri aböia. Nöbö mö uj höpebö nɨg bla rɨmɨn, wä ra. Nöbö mö rɨmɨj möl idɨxön rɨ bla rɨmɨn, rɨmɨj möla börmɨn mönö yöxöia. Nöbö mö wöröxöi bla rɨmɨn, höbkal öbɨlöia. Nöbö mö lɨblɨb mɨdö bla algör Krais mönö waiö aku yadmɨn nugwöiŋö,’ cöña.
6 Makwam mönö i yajöña, ‘Nöbö mö nɨ nugw pön, rɨb i rɨb i yöx nugweñ bla, mɨ ödöriö wahax pɨmɨjɨnö,’ rɨ gö,” me röŋa.
7 Aliö rɨmɨn, Jon nöbö nuŋ bla dumɨn nugugɨrön, Jisas nöbö mö hö mɨdim akuyöbö ñɨgö Jon mönö mag aku yadön yadöŋa, “Ñɨŋ höd mögörɨb rɨg kap mibɨl piaku duim wop aku, agapɨm nuguba duim? Mugumö yöd paŋyöbö i hödal öñöña pɨ pikwo pik rɨ i nuguba duim?
8 Owa agapɨm nuguba duim? Nöbö wölɨj wä wä akwör yömöi nöbö i nuguba duim? Nöbö wölɨj wä wä pɨnɨŋö, rön nugwöi bla, nöbö dib ram kɨtɨb wä akuyöbö hölɨmmɨdöia. Ñɨŋ Jon mɨdmɨd mögörɨb ör mibɨl yöra hölɨmmɨdölöi.
9 Makwam ap agapɨm nuguba duim? Hör duölim. God mönö yadɨb nöbö Jon nuguba dumä. Nöbö God mönö yadɨba hönɨŋö, rön, pöx mɨdmɨdöi nöbö aku maku pal. Makwam Jon nuŋ God mönö yadɨb nöbö akwör yöi.
10 Jon nugwo rɨbyöx nugwön, maduar ör God nuŋ Ha nuŋwa nugwo mönö yadöŋ mönö aku, God Mönö mag bö kai kɨtön yadmä,
‘Mönö yadɨb nöbö na aku,
yad abmön höd duön,
nöbö mö piaku yad nöl ri abaŋ,
mai naŋ keir dinaŋö,’ rön kai kɨtmä.
11 Ñɨgö yadmɨdla, nöbö mö mögörɨb mɨgrö kɨ mɨdöi bla i Jon röxg mɨdölöi. Makwam God nöbö mö hör pön du adöx yöd röul adö kau sö nugwidɨx mɨjön akuyöbö, ñɨŋ Jon röxgɨba mɨdeñɨm; God nuŋ nöbö mö hör ödöriö bla pɨ ri abön raŋ, nöbö mö wä nuŋwa mɨjöña.
12 Röbö pal nölɨb nöbö Jon hön mönö wä yad nölöŋ wop aku ila nɨgön, nöbö mö piaku, God anɨŋ pön du adöx yöd röul adö kau sö nugwidɨx mɨjönɨŋö, rön, mönö aku mɨ ususör rɨp duön duön, weik kwo algör mɨ ususör rɨmɨdöia.
13 “God mönö yadɨb nöbö kai kɨtim mönö aku aipam, Mosɨs God lo mönö kai kɨtöŋ aku aipam, ila makwam, God Mesaia nugwo yad abmɨn, nuŋ nöbö mö piaku ñɨgö pön nugwidɨx mɨjöna. Mönö aku algör yadɨp hön hön rɨba Jon höŋa.
14 Makwam mönö yadɨba rɨmɨdɨl kɨ pöñɨŋönö wöhö nɨ nugwöi. God Jon nugwo yadmɨn, hön nöbö mö piaku ñɨgö mönö yad nölöŋ aku, God Mönö kai kɨtön, rɨg cönɨŋö, rim mag akwör röŋa. Kai kɨtön yadmä, God mönö yadɨb nöbö Ilaija röxgɨb nöbö i hönɨŋö, rɨmä.
15 Ñɨŋ nöbö mö rɨmɨj möla mɨjön bla, mönö yadmɨdɨl kɨ rɨmɨj pal nugw ri aböña.
16 “Nöbö mö wopik wop kɨ mɨdöi bla nɨ nugula, ñɨŋ halöu ha kiai bli ap sɨmaim röi yöra römɨdön, halöu ha kiai bli ajmöla aj halön ñɨgö yadöi mag akuyöbö röxg mɨdöia.
17 Ñɨŋ yadöia,
‘An namö pɨrmɨn,
ñɨŋ pödpöd rɨmɨn höx wödölöi?
An wopal imbä akuyöbö yadmɨn,
ñɨŋ pödpöd rɨmɨn imölöiŋö?’ rɨmä.
18 Mag akuyöbö, God Jon nugwo agal abmɨn hön, wop bli ap maga nɨmölön, röbö wain nɨmölön rɨm, yadöia, ‘Nöbö kɨ nuŋ agapɨm yöj nɨgɨm akuyöbö al?’ röia.
19 Makwam Nöbö Ha aku höm yadöia, ‘Nöbö ap diba nɨmön, röbö wain nɨmön, nöbö takis pöi bla pɨsaŋ yönön, nöbö mö ap kib mag gwogwo röi bla pɨsaŋ yönön rö,’ röia. Makwam nöbö mö God Mönö aku nugw pön, ösös rɨ ri abön, wä mɨd ri abön rɨmɨjöñ aku, nöbö mö piaku nugwön yajöña, ‘God Mönö aku mönö mag wä mɨdö,’ me cöñɨŋö,” röŋa.
Mönö diba nugwöña
(Luk 10:13-15)
20-21 Jisas taun diba höd rɨ yönön, ap rölɨbä mag cɨmala mɨga akwör rɨmɨn, nöbö mö akuyöbö nugumä aku, jɨ ñɨŋ pödpöd rɨmɨn ap kib mag gwogwo rölɨŋö, rön, ap kib mag gwogwo rɨmɨdöi mag aku röböxön, Jisas nugw pölim. Akuyöbö almɨdmɨn, Jisas ñɨgö yadyöxön yadöŋa, “Korasin taun nöbö mö bla! Betsaida taun nöbö mö bla! Ap rölɨbä mag cɨmal bla rɨmön nugumä. Makwam ap kib mag gwogwo röi aku röböxön nɨ nugw pölöi. Akuyöbö alöi aku, ñɨŋ mönö diba ödöriö yöxöña. Taun dib Taia Juda nöbö mö yöi piaku, taun dib Saidon Juda nöbö mö yöi piaku, ap rölɨbä piaku ñɨgö algör ör rɨmɨdlöx aku, ñɨŋ ap kib mag gwogwo rɨmɨdöi bla röböxön, yogw lɨdu gɨb bli yömön, rɨn haui nɨg gɨr mɨdöyɨxa.
22 Makwam, mönö diba yadɨb wop aku, Taia nöbö mö aipam, Saidon nöbö mö aipam, mönö ulmɨdö mɨŋi yöxöña; makwam ñɨŋ Korasin nöbö mö aipam, Betsaida nöbö mö aipam, mönö diba yöxöña.
23 “Kapaneam nöbö mö bla, wop aku ñɨŋ adöx yöd röul adö kau sö dueñ; mɨ aŋadö rɨn hör yönmɨd möl bö diöña. Ap rölɨbä mibɨl ñɨŋ yörɨk rɨm aku, taun dib Sodom rɨmɨdlöx aku, ñɨŋ ap kib mag gwogwo rɨmɨdöi akuyöbö röböxön, wopik kömö mɨdöyɨxa.
24 Adakwör nɨ ñɨgö mi yadmɨdla, mönö diba yadɨb wop aku, Sodom nöbö mö piaku mönö ulmɨdö mɨŋi yöxöña; ñɨŋ Kapaneam nöbö mö mönö diba yöxöñɨŋö,” röŋa.
Nɨ pöl hön aŋöi nɨgöña
(Luk 10:21-22)
25-26 Wop aku Jisas nuŋ Nuö yadöŋa, “Acö, nɨ ib nagö yadmön bɨl sö duaŋ. Naŋ Nöbö Dib, adöx yöd röul adö kau sö aipam, mögörɨb il kɨ aipam nugwidɨx mɨdlö aku, rɨb naŋ keir yöx nuguman wä rɨ mag akuyöbö, nöbö mö rɨb wä yöx nugwön nugwölɨŋö, röi akuyöbö, ñɨgö mönö nɨ yadmɨdɨl il aku yad nölöiö; makwam nöbö mö halöu ha kiai röxgɨba mɨdöi akuyöbö ñɨgö rɨb wä nölman, mönö na yadmɨdɨl il aku yad wöxnö nɨglö aku, nagö wä rö rɨlaŋö,” röŋa.
27 Jisas aliö rön yadöŋa, “Acö ölɨsö nuŋwa mɨd aku döŋö, nɨ nöla. Nöbö mö bli nɨ nugw ri abön rölöi; Acö nuŋwör nɨ nugwa. Nör Acö nugwo nugw ri abla. Makwam nöbö mö rɨb wä nöinö, rön, nugun akuyöbö, ñɨgö rɨb wä nölmön, Acö nugwo nugwöñɨŋö,” röŋa.
28 Jisas aliö rön yadöŋa, “Ñɨŋ nöbö mö ap yogw diba ömörö ipɨtmɨn öim rag yönön rɨb mɨga yöxön mɨdöi bla, nɨ pöl höŋ nugwön ap yogw dib ömörö ipɨtmɨn öim rag yönmɨdöi aku, nɨ keir öröu pɨmön aŋöi nɨgöña.
29 Nɨ nöbö höimölɨb wä mɨda tar mɨdla; ölɨsö rödöin; makwam, nɨ pöl höñ aku, mabö na rɨ nöiöña, höbwab rɨb madmag ñɨgö yuö kwo aŋöi nɨgöna.
30 Ñɨŋ nɨ pöl hön mabö na rɨmɨjöñ aku, pɨ ömörö rɨ nölen; womiöx nöiöna.