☰ 1 JON 2
2
Iesu Krɨsto in iətəmi rəha nasiruiən e tah
1 Rəhak mɨn kəlkələh mɨn,* iətətei natimnati mɨn u kəm təmah, mətəniəhu itəmah məmə onəsotoliən təfagə tərah. Mətəu nəmə iətəmi kəti otol təfagə tərah, rəhatah kəti əha ikɨn iətəm tətəghati rəhatah lan kəm Tatə Uhgɨn,† inu Iesu Krɨsto in Iətəmi Təhruahru. 2 In ko, iətəm təmol sakrifais aru e rəhan nəmiəgəhiən o rəhatah noliən tərah mɨn, kəni o nati u, niəməha otəsol mɨniən Uhgɨn.‡§ Kəni təməsoliən o rəhatah pɨsɨn əmə noliən tərah mɨn, mətəu rəha nətəmimi mɨn rəfin agɨn e nəhue nɨftəni.*
3 Kitah okotəhrun əsas məmə kotəhrun Uhgɨn† nəmə kitah kautol nəuian.‡§ 4 Iətəmi u tətəni məmə “Iəkəhrun Uhgɨn,”* mətəu təsoliən nəuian, in ieiuə, kəni nɨpəhriəniən tɨkə lan.†‡ 5-6 Mətəu iətəmi u tatol rəhan nəghatiən,§ nolkeikeiən rəha Uhgɨn təmatɨg mɨnpi vivi pəhriən e nɨkin.* Iətəmi u tətəni məmə tətəhtul=pən lan,† otəkeikei mɨtəu suaru kətiəh əmə iətəm Iesu təmɨtəu.‡ Noliən u tətəgətun əsas§ məmə kitah kautatɨg lan.*
Kitah kotəkeikei motol nolkeikeiən kəm tah mɨn
7 Nɨkik keikei mɨn, iəu iəsəteiən nəghatiən vi kəti kəm təmah məmə onəkotol, kəni mətəu iətətei in əuas† iətəm nəmotos rəkɨs e nətuəuiniən, nian nəmotətəu nanusiən təuvɨr;‡ nəghatiən əuas u in nəghatiən nɨnotəhrun rəkɨs məmə nəkotolkeikei itəmah mɨn. 8 Mətəu e neruhiən kəti mɨn, nəghatiən u iətəm iətətei tatuvnə o təmah məmə onəkotol, in tətəuhlin məmə nəghatiən vi,§ mətəu-inu kɨneruh e suaru vi kəti e nəmiəgəhiən rəha Iesu mɨne rəhatəmah. Mətəu-inu rəueiu, napinəpuiən tɨnətagɨm,* konu nəhagəhagiən pəhriən† tɨnətasiə rəkɨs.‡
9 Kəni iətəmi u tətəni məmə in tətatɨg e nəhagəhagiən mətəu tətəməki e pian,§ in tətatɨg əhanəh e napinəpuiən.* 10 Iətəmi u iətəm tolkeikei pian, in tətəhtul e nəhagəhagiən,† kəni nati kəti tɨkə e nɨkin məmə otapitətəl lan, morin.‡ 11 Mətəu iətəmimi u iətəm tətəməki e pian, in tətatɨg e napinəpuiən,§ kəni mətan e napinəpuiən, kəni məruru ikɨn tatuvən=pən ikɨn, mətəu-inu napinəpuiən tətəuveg nəhmtɨn.*
12 Rəhak kəlkələh mɨn, iətətei nauəuə u kəm təmah,
mətəu-inu Uhgɨn təmafəl rəkɨs noliən tərah mɨn rəhatəmah e nati u iətəm Iesu təmol.
13 Tatə mɨn, iətətei nati u kəm təmah,
mətəu-inu itəmah nəkotəhrun in, iətəm təmaupən matɨg e nətuəuiniən.†
Nətəm aluə mɨn, iətətei nati u kəm təmah,
mətəu-inu itəmah nəmotehpahu rəkɨs‡ iətəmi tərah, Setən.
14 Kəlkələh mɨn, iətətei nati u kəm təmah,
mətəu-inu nəkotəhrun Tatə Uhgɨn.
Tatə mɨn, iətətei nati u kəm təmah,
mətəu-inu itəmah nəkotəhrun in, iətəm təmaupən matɨg e nətuəuiniən.§
Nətəm-aluə mɨn, iətətei nati u kəm təmah, mətəu-inu itəmah nəkotəsanən,*
kəni nəghatiən rəha Uhgɨn tətatɨg e nɨkitəmah,
kəni nəmotol win e iətəmi tərah, Setən.†
Sotolkeikeiən natimnati rəha nəhue nɨftəni
15 Sotolkeikeiən nəhue nɨftəni‡ uə natimnati mɨn rəha nəhue nɨftəni. Nəmə iətəmi kəti tatolkeikei nəhue nɨftəni, kəni nolkeikeiən rəha Tatə Uhgɨn təsatɨgiən e nɨkin.§ 16 Mətəu-inu natimnati rəfin u rəha nəhue nɨftəni, ilah u, kəsotsɨpəniən o Tatə Uhgɨn, mətəu kautsɨpən e nəhue nɨftəni əmə. Natimnati rəfin u rəha nəhue nɨftəni, ilah u, nolkeikei pɨkiən natimnati rəha nəhuvegɨn əmə,* kəni nolkeikeiən natimnati iətəm tatiuvirəkɨs nəhmtɨtəmi,† mɨne nəfəriən o rəhalah nautə, mɨne nepətiən. 17 Kəni nəhue nɨftəni u otəpanɨkə. Kəni nolkeikei pɨkiən nautə mɨn otəpanɨkə. Kəni nolkeikei pɨkiən o noliən mɨn rəha nəhue nɨftəni iətəm kautiuvi nətəlɨgiən rəha nətəmimi otəpanɨkə.‡ Mətəu iətəmimi iətəm tatol nəuia Tatə Uhgɨn,§ in otətatɨg itulɨn.
Tɨkɨmɨr mɨn rəha Krɨsto kɨnəhuva rəkɨs
18 Kəlkələh mɨn, kɨnotevɨg=pən e naunun nian.* Nəmotətəu məmə Tɨkɨmɨr rəha Krɨsto† otuva.‡ Kəni rəueiu tɨkɨmɨr mɨn rəha Krɨsto tepət, kɨnəhuva rəkɨs.§ Tol lanəha, kitah kotəhrun məmə, kɨnotevɨg=pən e naunun nian. 19 Nətəmi mɨn u, kəmotəpəh rəhatah niməfaki mɨn* mətəu ilah səniəmə rəhatah agɨn mɨn, aupən agɨn mətəuarus=pa u rəueiu mɨne. Nəmə rəhatah agɨn mɨn, kəməsohietiən e tah. Mətəu ilah kəmohiet e tah, kəni tətəgətun məmə ilah səniəmə rəhatah mɨn əhruahru.
20 Mətəu itəmah ko, Iətəmi Əhruahru, in təmalɨku=pɨnə† kəm təmah e Narmɨn Rəha Uhgɨn,‡ kəni itəmah rəfin nəkotəhrun nati u. 21 Iətətei nati u kəm təmah, səniəmə nəkotəruru nɨpəhriəniən, mətəu itəmah nɨnotəhrun rəkɨs nɨpəhriəniən, kəni motəhrun məmə nɨpəhriəniən təsəuəiən e neiuəiən.§ 22 ?Pəh u in ieiuə? Iətəmimi u iətəm tətəni məmə Iesu səniəmə in Krɨsto iətəm Uhgɨn təməni məmə otahli=pa. Iətəmimi u inu, tɨkɨmɨr rəha Krɨsto. In təsəniən nɨpəhriəniən e Tatə Uhgɨn mɨne Nətɨn.* 23 Iətəmi təsəniən nɨpəhriəniən e Nətɨn təruru nosiən Tatə. Iətəmi tətəni nɨpəhriəniən e Nətɨn, in tatos mɨn Tatə Uhgɨn.†
24 Otaskəlɨm tiəkɨs mautol nati nak nəmotətəu e nətuəuiniən, nian nəmotətəu nanusiən təuvɨr. Nəmə nautol, kəni itəmah onəkotəhtul=pən e Nətɨn, mɨne Tatə Uhgɨn.‡ 25 Kəni nati u inu, nəmiəgəhiən itulɨn, in təməni əskasɨk məmə otəfa kəm tah.
26 Iətətei nəghatiən mɨn u kəm təmah mətəni pətɨgəm nətəmimi mɨn u nətəm okotiuvi rəkɨs itəmah.§ 27 Mətəu Narmɨn Rəha Uhgɨn iətəm nəmotos e Krɨsto,* in tətatɨg əhanəh e nɨkitəmah. ?Tol lanəha, pəh mɨn təhrun nəgətuniən nati vi kəti kəm təmah? Narmɨn Rəha Uhgɨn tətəgətun natimnati rəfin kəm təmah,† kəni nəgətuniən əha rəhan, in nɨpəhriəniən, səniəmə neiuəiən. Tol lanəha, otəhtul=pən əskasɨk e Krɨsto,‡ təhmen=pən əmə məmə Narmɨn rəhan təməgətun itəmah məmə nəkotol.
28 Kəni rəueiu əha, kəlkələh mɨn, otəhtul=pən lan, məmə nian in otuva§ kəni kitah kəsotəgɨniən məsotaulɨsiən e nəhmtɨn* e rəhan nuvaiən.
29 Nəmə nəkotəhrun məmə in təhruahru,† onəkotəhrun əsas məmə nətəmimi rəfin nətəm kautol noliən əhruahru, ilah u, nenətɨn mɨn.‡
* 2:1 1Təs 2:11 † 2:1 Rom 8:34; 1Tim 2:5; Hip 7:25 ‡ 2:2 Rom 3:25; 1Jon 4:10 § 2:2 Iesu in təmol sakrifais aru e nəmiəgəhiən rəhan o rəhatah noliən tərah mɨn, kəni nati əha, niəməha təsoliən mɨniən Uhgɨn. Iesu in sakrifais, kəni in pris mɨn iətəm təmol sakrifais u. Iesu təsətapuəhiən o Uhgɨn məmə otəni məmə kitah kəməsotoliən noliən tərah kəti, mətəu təmətapuəh o Uhgɨn məmə oteruh itah məmə kitah nətəmimi rəhalah noliən tərah mɨn kəmotos rəkɨs nalpɨniən. Inu nətəlɨgiən mɨn rəfin rəha Uhgɨn, kəni nati u, in təməhmen. * 2:2 Jon 3:17 † 2:3 1Jon 4:13; 5:2 ‡ 2:3 Noliən nəuian u, təsoliən itah kotəhruahru, mətəu tətəgətun əmə məmə kitah kotəhrun Uhgɨn. § 2:3 Jon 14:15 * 2:4 Tait 1:16; 1Jon 3:6; 4:7,8 † 2:4 Nətəmimi nətəm kəutohtəu=pən Nostisisɨm, kəutəni məmə ilah kəutəhrun vivi Uhgɨn, mətəu noliən rəhalah təsəhruahruiən. Afin-to e Nəghatiən Əkuəkɨr Rəha Nauəuə u 1 Jon məmə nəkəhrun nətəlɨgiən rəha Nostisisɨm. ‡ 2:4 1Jon 1:6,8 § 2:5-6 Jon 14:15 * 2:5-6 1Jon 4:12 † 2:5-6 Nian tətəni məmə suah iətəmi kəti tətəhtul=pən e Iesu, nɨpətɨn u məmə in tətatɨg lan məsietiən, tatsɨpən lan, tatos rəfin nəsanəniən rəhan ohni, tətahgəl lan, tatɨlpɨn ilau min. ‡ 2:5-6 Mat 11:29 § 2:5-6 1Jon 2:3 * 2:5-6 Jon 15 † 2:7 Dut 6:5; Lev 19:18 ‡ 2:7 1Jon 2:24; 3:11,23; 4:21; 2Jon 5,6 § 2:8 Jon 13:34 * 2:8 Rom 13:12 † 2:8 Jon 1:9 ‡ 2:8 Efəs 5:8; 1Təs 5:5 § 2:9 1Jon 3:10,15,16; 4:20,21 * 2:9 1Jon 1:5 † 2:10 1Jon 3:14 ‡ 2:10 Sam 119:165 § 2:11 1Jon 1:6 * 2:11 Jon 11:9; 12:35 † 2:13 Jon 1:1 ‡ 2:13 Jon 16:33 § 2:14 Jon 1:1 * 2:14 Efəs 6:10 † 2:14 1Jon 2:13; Sam 119:9-11; Jon 5:38; Hip 4:12; 1Jon 1:10 ‡ 2:15 Rom 12:2 § 2:15 Jem 4:4 * 2:16 Jen 3:6; Rom 13:14; Efəs 2:3 † 2:16 Prov 27:20 ‡ 2:17 Hip 12:27 § 2:17 Mat 12:50 * 2:18 Rom 13:11 † 2:18 Tɨkɨmɨr rəha Krɨsto in “antichrist” e Inglɨs. ‡ 2:18 1Jon 2:22; 4:3; 2Jon 1:7 § 2:18 1Jon 4:1 * 2:19 Uək 20:30 † 2:20 Nətəm Isrel kəutalɨku=pən e rəhn-kapə pris mɨn e oiel, mautol kəni tətəgətun məmə ilah u, səniəmə nətəmimi əpnapɨn əmə, mətəu ilah u, nətəmimi rəha Uhgɨn əmə, nətəm in təmɨtəpɨn o noliən uək u. Kəni e noliən əhmen əmə, Iesu in tətəfa Narmɨn Rəha Uhgɨn kəm nətəmimi mɨn əha nətəm kəutəni nɨpəhriəniən lan, mətəgətun məmə Krɨsto təmɨtəpɨn ilah məmə rəhan əmə. Nətəmimi mɨn u nətəm kautos nalɨkuiən e Narmɨn Rəha Uhgɨn, in təhmen e nəmtətiən kəti məmə ilah u, rəhan mɨn nətəmimi. Tətalɨku=pən e Narmɨn Rəha Uhgɨn e lah məmə ilah kotəhmen o noliən uək rəhan. ‡ 2:20 1Jon 2:27; 2Kor 1:21-22 § 2:21 2Pitə 1:12 * 2:22 1Jon 4:3; 2Jon 1:7 † 2:23 Jon 8:19; 14:7; 1Jon 4:15; 5:1; 2Jon 1:9 ‡ 2:24 Jon 14:23; 15:4; 1Jon 1:3; 2Jon 9 § 2:26 1Jon 3:7 * 2:27 1Jon 2:20 † 2:27 1Kor 2:12 ‡ 2:27 Jon 15:4 § 2:28 1Jon 3:2; Kol 3:4 * 2:28 Efəs 3:12 † 2:29 1Jon 3:7 ‡ 2:29 Jon 1:13
☰