15
Moaɓe yooi laalɔɠɔma
1 Keela wooi é wosu é lo Moaɓe ʋa.
Ungo, kpidi ɠila nɔ é ɠoloɠoloni!
Aal-Moaɓe ɲɛɛlɛni.
Ungo, kpidi ɠila nɔ é ɠoloɠoloni!
Kiil-Moaɓe ɲɛɛlɛni.
2 Diɓon nuɓusɛiti ta lɛɛzu ta-zalaɠa ɠulazuʋɛti,
ta-zalaɠa ɠula adaʋɛti, nii a kɛ ti saa wɔlɔi wo.
Moaɓe ɠa ɓainsu Neɓo ma ta Medeɓa.
Ungiti pɛ kpuyegɛ,
ti-ɓɛlɛiti pɛ bogɛ.
3 Peleiti su taazuʋɛ, saa wɔlɔ wo seɠei ɠa ti ɠɔba.
Fiilɛ zosuʋɛti pɛlɛ ɠɔmaʋɛti ta gaalɛba wosuʋɛti,
ɛsɛ pɛ ka kpalagi wosu, gaazuɗɛi ɗa ʋu gola.
4 Nuiti ta kpeei loozu Ɠɛsɛɓon ta Eleyalé,
nu ɠa ti-wooi mɛnisu Yaɠase zɔli.
Naa ɠa é ba, Moaɓe zalaʋusuiti ɓalaa ta kpeei loozu,
ti pɛ ti zasu ɠa ɓalizu.
5 Nà kpɔbai maalolisu Moaɓe ʋɛ,
ná-nuiti ta ʋelazu, ti ɗa lɔɔɠu Sowaal, eyɛsu Egelate-Selisia.
Ta lɛɛzu ga kpeei loa Luɠite nu lɛɛzuʋɛ.
Ta kidaaʋili kpee wolai loozu Ɠɔlɔnayime pelei zu.
6 Nimelime ziɛziɛ bosuʋɛ ɠaaʋalaga ba,
tufai vɔa ná, tufa wundui ɠoloɠolo,
tufa lɛnugi ɲɛɛlɛa ná.
7 Naa ɠa é ba nuiti ta ti-yeaɠɔligiti seɠezu nii yɛgai ti yea,
ti naati seɠe niiti ti ti makɛni,
ti li ga tiye sɔle guluiti ma ɠɔtuɗɛi ʋoluʋɛ.
8 Mazɔlɔɔ zɔngɔ wooi latini Moaɓe yooi ma,
gɔlɔ wooiti ta mɛnisu Egelayime,
gɔlɔ wooiti ta zeelizu Ɓeel-Elime.
9 Dimon ɗɛi ɠa ɓɔi ga ɲamai.
«Nà maanɔɠɔ ɠiligaa leʋesu mɔnɔ Dimon ma,
zala ɠila ka laalɛ Moaɓe nu vuluiti bu,
ta pela nuiti ti yɛsu zooi ɠa.»