19
Eli ʋela vai Zezaɓɛle ʋa
1 Akaɓe liini, é naa kpein suɠula Zezaɓɛle ma, nii Eli kɛɛni, ʋelei ti Ɓaale ná-gala goo wo nuiti paani la ga boɠa zɔkpɔi.
2 Zezaɓɛle keela leʋeni Eli ma, é ɠɛ ma: «Lina, ni gè la è ʋaani, ʋelei è gala goo wo nui niiti paai la, naa a ɠɛɛna, galagiti ti sò ta-yiiɠaawanai pɛ su.»
3 Eli luani, é ʋela ga é zɛnvui ɠizo. Seeliai ma Ɓeel-Seɓa, Zuda yooi zu, é ná-botiɠɛ nui yɛni miná.
4 É folo ɠila kɛɛni, é ɗa ziɛ teʋebai zu, é li, é zei gului ta wu, daa ga zenɛ. Saa wɔin soni, é ɠɛ ma: «Ɠɔoɠɔ GALAGI, zɛ̀nvui zeɠe niina, kpɔlɔi kula ɠɛa ga ze, mazɔlɔɔ gè la vizɔni mɛ̀mɛwolani ba.»
5 É laani gului wu, é ɲi. Gaamago geezuɠeelai gila ge ʋaani, é maaloɠa, é ɠɛ ma: «Wuzeɠe, è daamii wo.»
6 É wuzeɠeni, é wɛlɛ, é ɓulu laalii ɠaa, nii mɔgai kɔtu ɓadii ma, naa unbuaʋɛ, ta ziawɔ ɠila, ziɛi fegɔ. É daamii wogai ma, é ɓɔɔle, é laani ʋolu gului wu.
7 Ɠɔoɠɔ GALAGI ná-geezuɠeelai ʋaani ʋolu, é maaloɠa, é ɠɛ ma: «Wuzeɠe, è daamii wo, mazɔlɔɔ siɛ ɠooza ka è ya.»
8 É wuzeɠeni, é daamii wo, é ɓɔɔle. Zɛbɛi nii daamianigi naa feeni zea, naa yɛni ba, é kɛ ga folo ʋuunaanigɔ (40), kpidi ʋuunaanigɔ (40) siɛi ɠa, eyɛsu é zeeli GALA ná-gizei ma, Wolɛɓe.
GALA ge iɲɔdɔɔi vee vai ʋolu Eli ya
9 Eli lɔɔni miná pugi zu, é ɲi ná piin. Ɠɔoɠɔ GALAGI ɓɔɛni pɔ miná, é ɠɛ ma: «Lee ɠa è kɛɛzu ʋɛ, Eli?»
10 Eli gooɠaaʋoteni, é ɠɛ ma: «Gè sùvikɛi pɛ kula Ɠɔoɠɔ GALAGI ʋɛ, Fai-Pɛ-Maliɠii, mazɔlɔɔ Izilayɛle nuiti ti ɠɛlɛa ɗa-minazeɠegi ʋa, ti ɗa-zalaɠa ɠulazuʋɛti koloɠologa, ti è-laawoo wo nuiti paa ga boɠa zɔkpɔi. Nà ɠila ka niina zɛ̀gai ʋoluzu, nà ɓalaagi ta pɔ ga ti pàa.»
11 Ɠɔoɠɔ GALAGI ɠɛni ma: «Ɠula, è lo gizei ma nɔ̀un gaazu.» Gaamago nɔ, fiilɛ wolai lokoleʋeni, é ɗa ʋa ga zeeɠaaɓaai, sɛbɛ wɔɔlɔ ʋelei ma é ɠɛni gizeiti ta fasaiti golozu Ɠɔoɠɔ GALAGI luɠɔ, kɛlɛ Ɠɔoɠɔ GALAGI la ɠɛni fiilɛi zu. Fiilɛi leʋegai ma, zou ɓalii ɠɛni, kɛlɛ Ɠɔoɠɔ GALAGI la ɠɛni zou ɓalii zu.
12 Zou ɓalii ʋoluma, abui ʋa, Ɠɔoɠɔ GALAGI la ɠɛni abui zu. Abui ʋoluma, fiilɛ lɛilɛi ko lugi ɠulani fɛɛ, gaanɛai.
13 Eli tugi mɛnigai ma, é ɠaazuʋɛ maaveleveleni ga ná-seɠe wolai, é ɠulani pugi zu, é lo daaʋɛ. É woo mɛnini, é ɗa ɠɛ ma: «Lee ɠa è kɛɛzu ʋɛ, Eli?»
14 Eli gooɠaaʋoteni, é ɠɛ ma: «Gè sùvikɛi pɛ kula Ɠɔoɠɔ GALAGI ʋɛ, Fai-Pɛ-Maliɠii, mazɔlɔɔ Izilayɛle nuiti ti ɠɛlɛa ɗa-minazeɠegi ʋa, ti ɗa-zalaɠa ɠulazuʋɛti koloɠologa, ti è-laawoo wo nuiti paa ga boɠa zɔkpɔi. Nà ɠila ka niina zɛ̀gai ʋoluzu, nà ɓalaagi ta pɔ ga ti pàa.»
15 Ɠɔoɠɔ GALAGI ɠɛni ma: «Ɠale ma ga teʋebai zu ʋelei nii nɔ è ʋaai la. Li Damase, è gulɔi ziɛ Ɠazayɛle ma, é ɠɛ ga Siili masagi.
16 È gulɔi ziɛ Nimesi ná-doun zunui Zewu ma, é ɠɛ ga Izilayɛle masagi, è gulɔi ziɛ Aɓɛle-Meɠola nui Safate ná-doun zunui Elizé ma, é ɠɛ ga GALA goo wo nui è-ʋotogi zu.
17 Naazu zɔi Ɠazayɛle ná-boɠa zɔkpɔi a ʋoola ba, Zewu ɠa naama nui ʋaa, nii Zewu ná-boɠa zɔkpɔi a ʋoola ba, Elizé ɠa naama nui ʋaa.
18 Kɛlɛ nà nu waadɔfela (7.000) makɛsu Izilayɛle nuiti saama, niiti ti la ʋilɛni ɲiibiɠa Ɓaale ʋɛ, ta ti la laaʋɛɛni komaga, ti ʋa nɛɛnɛ.»
Elizé loli fai
19 Eli zeɠeni miná, é li, é Safate ná-doun zunui Elizé ɠaa, naa ɗa wozai ʋili, woza ʋili nikɛ velefelegi ɠɛni kakala ga puugɔ maazu felegɔ (12), puugɔ maazu velesiɛi (12) ɠa é ɠɛni zea. Eli leʋeni Elizé ɠoba, é ná-seɠe ɠula ɠɔba, é pili Elizé ma.
20 Elizé ná-nikɛiti zɛni ná, é ɓizɛ Eli ʋolu, é ɠɛ ma: «Ɓɛ gè kɛ̀ɛni ta dèe nɛɛnɛ, gè vali ti ma. Naa ʋoluma nà ʋa niina, gè ʋilɛ è ʋolu.» Eli gooɠaaʋoteni, é ɠɛ ma: «Li, è ʋa, ɠizɛ naa zu, nii gè kɛai ga ɗe.»
21 Ta Eli ti baligai ma ma, é liini ga ʋoluʋelei, é nikɛ felegɔ zo, é kɛ ga zalaɠai, é ma unbawului ɠɛ ga koʋii, ti suai ɠili la, é fe nuɓusɛiti zea, ti mi, é wuzeɠe, é ʋilɛ Eli ʋolu, é ɠɛ ga naa ná-botiɠɛ nui.