2
Nii ɠa wosu Zuda ma
1 À wɛlɛ keelai ʋa, é gizeiti ma,
é ɗa ʋa ga woo niinɛ ʋagɔi,
é ziilɛi fai laazeelizu.
Zuda nuiti, à GALA fai ma vɛtiiti kɛʋele ɓɛtɛ,
wo wa-minazeɠegiti daazeeli GALA bɛ!
Mazɔlɔɔ nu ɲakai la mɔ ziaa wo zaama pɛ,
é ɠoloɠologa mɛtu.
Ninive wolo vai ma ɠulakɛlɛmai
2 È ɠoloɠolo nui ɠana ʋa è laalɔɠɔma.
Ɗa-ada ɓiigiti makɛ!
Ɠaaɓa, è wɛlɛ peleiti ma,
zaamaɠili, è ɠaaɓa ga zɛbɛi pɛ!
3 Mazɔlɔɔ Ɠɔoɠɔ GALAGI ɠa Zakɔɓe mavofodaiti ta-lɛbiyai veezu ti ya ʋolu,
é Izilayɛle ná-bɔɔlɔlai ve zea ʋolu.
Toosu nuiti ti ti ɠaaʋalani ba,
ti ta-leezɛn ɓelei ɠoloɠolo.
4 Ani ɓɔigi ɠa siaai kɔɔɠɔ nuiti ta-ɠɔɔɠɔ zɛpɛgiti ma,
ta-zalaʋusuiti maaɠiliʋɛ ga seɠe ɓɔigiti.
Siɛgi zu ti ɠɛʋele ɓɛtɛai la kɔɔɠɔ vai ma,
kɔɔɠɔ wotoloiti kpɔiʋɛ eɠɛ abui,
kpɛɛinti ti ɗa ɓali.
5 Kɔɔɠɔ wotoloiti ti ɗa ɓizɛ taazuʋɛ ga ziiɠaawanai,
ti ɗa ɓizɛ adaʋɛti,
ɗa ti ɠa nɔ ga sɔmɔgiti ti ɠaazogai,
ti ɗa ɓizɛ mini-o-mini eɠɛ mainmain.
6 Ninive masagi ɠa ná-kɔɔɠuluɓaiti tolisu,
kɛlɛ ta ziɛzu, ti zu ɗa ɓali.
Ti zo nuiti ta ɓizɛzu ga lia siɠigi ʋɔ bɛ,
ɓɔɠɔ maalobosuʋɛ ɓɛtɛʋɛ miná.
7 Ziɛ wolai luɠɔlosuʋɛ laaʋɛ vieni,
masa pɛlɛi woloni!
8 Ti anzanu masagi maaɲakai ʋilɛga, ti lia la,
ná-botiɠɛ anzanuiti ta kpalagi wosu eɠɛ poopogiti,
ta-yiiɓɔlɔi zu, ta ɠekegiti suloɠazu.
9 Ninive ɠɛni ga ziɛ makɛ diɠi wolai,
kɛlɛ ziɛi pɛ ge ʋua ya, é ɠula su.
«À lo, wa ʋe! À lo, wa ʋe!» Kpeei ɠana é loozu,
kɛlɛ pela nui tanɔpɛ ge la ɠaleni ma.
10 À ná-waliiti zɛʋɛ, à ná-zanugiti zɛʋɛ!
Taai ná-naavoloi la ɓega pɛ,
ani ʋagɔi letele ka é ʋuuni ná.
11 Tooma vai, ɲama ʋuu vai, ta nu ʋaa vai!
Nuiti iɲɔteʋeʋɛ ti-yiimaʋɛ,
ti-ɲiibiiti su ɗa ɓali,
ti lɔtɔzuleʋea, ti-ɠaazuʋɛti maavala.
Fɔnimai woga ga zalai
12 Leeni ɠa kɛai ga zalai ná-zeɠei?
Ʋɛ zala yiʋoiti ti ɠɛni ɠɔnɔgi zɔlɔɔsu ná,
nu nɔpɛ ge la ɠɛni ti ɓɔlɔzu ná,
zala zinɛi a la liina ti-ɠɔnɔ gaiziɛzuʋɛ.
13 Zala zinɛi ɠɛni suai zosu ma yiʋoiti bɛ,
é ɗa tanigaa ɠɔdaaleʋe zala zaaiti bɛ,
é ná-zeɠei laave su ga daamianigi,
é sulaave ga suaiti, é ti ʋaliʋaliai ga.
14 «Wɛlɛ, nà ɠa gè è laalɔɠɔma,
nà ɗa-ɠɔɔɠɔ wotoloiti kɛɛzu ga zuʋui,
ɗa-zala yiʋoiti kpein ta za kɔɔmaʋɛ.
Toomai è kɛɛzu eteai zu, nà ɠa gè naa ɓesu,
nu la mɔ ɗa-ɠeelaiti goomɛniga,»
Ɠɔoɠɔ GALAGI, Fai-Pɛ-Maliɠii wooi ɠana.