4
Doun kɛɛɠɛi ná-tɛnɛ gooiti
1 Dòun zunuiti, à woilo ɠɛɛɠɛ lɛnɛ gooiti ma,
à woilo ga pagɔ, wo keleɠelegi ɠwɛɛ.
2 Nà kala pagɔ veezu wo ya,
à mina nà-kala gooiti pili ya.
3 Gè ɠɛni kɛ̀ɛ ya, ga doun zunu ɠilagi,
dèe nɛ̀ɛni ʋɛ gola, eɠɛ doun zunu ɠila kpegi.
4 Kɛ̀ɛ ɠɛni kàlasu, é ɗa ɠɛ mà:
«Dàawooiti so ga è-yii pɛ,
nà-deveiti so, ɗa zɛnvui wo.
5 Ɠimalai ɠaiziɛ, ta keleɠelegi,
mina yeema dàawooiti ma, mina zeɠe ti ʋa.
6 Mina ɠɛlɛ ɠimalai ʋa, toɠa ɓɔ è ʋa,
nɛɛ ʋɛ, toɠa ɓaa è maazu.
7 Wɛlɛ ɠimalai lɔɔzeigi ʋa: Ɠimalai ɠaiziɛ,
keleɠelegi ɠaiziɛ ga è zɔlɔɔ ganii kpein.
8 Bɔɔlɔ, toɠa è wuzeɠe,
ni ɗa ɠilina ba, toɠa ɠɛ ga lɛbiya è ʋɛ.
9 Toɠa bɔɔlɔ pagɔi lɔ è unba,
é è maaɠili ga masa bɔɔlɔ maayikiai.»
10 Woilo dòun zunu, dàawooiti gaaɠa,
naazu, ɗa è-zii zuɠooza.
11 Gè è ɠalagɛ ga ɠimalai ma ʋelei,
gè lo è luɠɔ telebo peleiti su.
12 Ni ɗa ɠɛna ziaa ɠana, è-ɠɔɠɔ zu la ɠataga,
ni ɗa ɠɛna ɓizaa, è-ɠɔɠɔi la ziɠaa.
13 Ɠili kpaan è maaɠolo vai ʋa, nii è sɔlɔɔgai, mina too ya,
yɛ ɠilini ba, mazɔlɔɔ naa ɠa è-yɛnvui su.
14 Mina ziɛ ga nu ɲɔiti ta-ʋelei,
mina ʋilɛ naati kɛʋelei ʋolu, niiti ti faa ɲɔi ɠɛɛzu.
15 Maaɠooza ta-ʋelei ʋa, mina ziɛ la,
zeɠe ba, è ziɛ yɛ.
16 Mazɔlɔɔ faa ɲɔu ɠɛ nui naati, ti la ɲia, ni ti la faa ɲɔi ɠɛɛni,
ta ʋala ɲiimɛnii ma, ni ti la nui ta looni.
17 Mazɔlɔɔ ti-ɠɔnɔgi ɠa ga faa ɲɔi,
ta-ɓɔɔle lɔɔi ɠa ga suɲɔulai.
18 Telebo nuiti ta-ʋelei ɠɛɛʋɛ eɠɛ, geelaalaosu wozakalagi,
nii ma wozakalagi ɠaa yɛsu wɔɔlɔzu, eyɛsu foloi tɛ.
19 Faa ɲɔu ɠɛ nuiti ta-ʋelei ɠɛɛʋɛ eɠɛ kpidii,
ti la ti ɠɔɠɔziɠa ani ɠwɛɛ.
20 Dòun zunu, woilo dàawooiti ma,
woilo ga pagɔ kpɔ̀ɛ wooiti ma.
21 Mina yeema ti ma,
kɛlɛ makɛ ti ma è-yiimaʋɛ.
22 Mazɔlɔɔ niiti ti yeezeizu ti wu, ta ʋa ga zɛnvui naati pɔ,
ti kɛdɛyai ve ti-ɓusɛi ya.
23 Makɛ è-yii ma, é leʋe anii pɛ ba,
mazɔlɔɔ toɠa zɛnvui wo fai ma ungi su.
24 Mina ɓe è-laaʋɛ ʋa, é ʋa ɗa zɛɛiti bo,
mina è-lakɔlɔgiti zɛ ná, ti ʋa ɗa yaava ɓɔɛiti bo.
25 Ɠaazulo ɠakala ʋelei ʋa,
wɛlɛ ɠakalaʋɛ ga pagɔ.
26 Pelei zuɓɛtɛ, ʋɛ è ziɛzu ná,
pelei è laai da, ziɛ ga naa.
27 È mina zeɠe ba, è ʋa li ga yeezazu ʋelei, ɓaa ɠɔʋɛzu ʋelei,
ɠɔɠɔɠula faa ɲɔu ɠɛɛ vai zu.