GALA Sɛʋɛi 1 Samiyɛle 27

Davide lɔɔɠu vai ʋolu
Filiseti nuiti pɔ bɛ

1 Davide ɠisiɛni, é ɠɛ ɓɔɠɔ ma: «Yeeta Sayile ɠa ʋaazu vɔnisu mà, é pàa. Nii pagai ga gè kɛ, naa ɠa ga gè ʋela, gè li, gè lɔɔɠu Filiseti nuiti ta-yooi zu, nii a kɛ Sayile looɠo gàiziɛzu Izelayɛle yooi zu, naazu kùla ɠana zea.» 2 Davide wuzeɠeni, ta nu undɔzitai (600) niiti ti ɠɛni ba, ti li Maoke ná-doun zunui Akise ʋɔ bɛ, Gate masagi. 3 Davide ta ná-kɔɔɠɔ nuiti ti liini, ti zei Gate masagi Akise ɠoba, ɛsɛ pɛ ta ná-pɛlɛyeɠei, Davide ɓalaa, anza felegɔiti ti ɠɛni zea, Ayinoame Zizeleyɛle nui, ta Kaalemɛle nui Aɓigayile poanzai, nii Naɓale zɛni. 4 Ti liini, ti naa laazeeli Sayile ma, ga Davide ʋela, é li Gate. Sayile looɠoni Davide ɠaiziɛ vai ʋa.

5 Davide ɠɛni Akise ma: «Ni ɗa kɛ è faaɓɔɠɔ ɠɛ bɛ̀, seizu ve zèa dɔɓɔzu laai ta zu, ʋɛ nà li, gè zei ná. Mazɔlɔɔ é la ga faa ʋagɔ ga nɛ̀i gè ga ɗa-wotiɠɛ nui, gè zei è ɠoba, masa taai zu.» 6 Naama voloi nɔ Akise Sikelage laai veeni zea. Tɔ ɠa é kɛa Sikelage ɠɛni la ga Zuda masagiti tɔnɔ eyɛsu za. 7 Davide kɛɛni Filiseti yooi zu ga kona gila, alu naanigɔ.

8 Davide ta ná-kɔɔɠɔ nuiti ti ɠɛni liizu, ti ɗa kɔɔi ʋɛɛ Gesuul nuiti ba, ta Giileze nuiti, ta Amalɛke nuiti, nuɓusɛi niiti ti ɠɛni zooi naazu kaite Suul letegi, é zeeli Ezipete yooi ɠwɛpelemaʋɛ. 9 Davide ɠɛni naama yooi zuɠoloɠolosu, é la ɠɛni zunu ɓaa anzanu yɛsu vulua. É ɠɛni ʋaazu ga baalagiti, boliiti, nikɛiti, soovalegiti, ɲɔmɛiti, ta seɠeiti, a la ɠalena ma, é ɠɛni liizu Akise ʋɔ bɛ. 10 Akise ɓena Davide ɠaazaɠa, é ɠɛ ma: «Ɓɛni ka za wo kɔɔi ʋɛai ti ʋa?» Davide ɠɛni gooɠaaʋotesu, é ɠɛ ma: «Zuda yooi lɛkpɛmaʋɛ nu yeezazuʋɛ,» ɓaa «Yelaameyɛle yooi lɛkpɛmaʋɛ nu yeezazuʋɛ,» ɓaa «Ken yooi lɛkpɛmaʋɛ nu yeezazuʋɛ.» 11 Davide la ɠɛni nu nɔpɛ zɛsu vulua, é ɠɛni ga zunu, ɓaa anzanu, é ʋa lii la Gate ʋɔ, mazɔlɔɔ é ɠɛni ɠɛɛzu ɓɔɠɔ ma: «Ti mina poluvaawo bo ga sɔ̀gi ɠa nii ɓaa nii.» Naa nɔ ɠa Davide ɠɛni kɛɛzu, yeeɠɛɠalai pɛ daawu, nii é kɛɛni Filiseti nuiti ta-yooi zu. 12 Akise laani Davide la ga gola, é ɗa ɠɛ ɓɔɠɔ ma: «Davide ɓɔɠɔ wɔinzeɠea ná-nuiti ma, Izelayɛle nuiti, toɠa yɛsu bù ɠɔ, é ɗa botii ɠɛ bɛ̀.»