21
Kona saʋagɔ ʋului loo vai
1 Davide ná-siɛgi zu, pului looni, é kɛ ga kona saʋagɔ. Davide Ɠɔoɠɔ GALAGI ɠaazaɠani, naa gooɠaaʋote, é ɠɛ ma: «Sayile maaʋele ʋe, ta ná-pɛlɛyeɠei, é ga ɲama ʋuu ʋɛlɛyeɠei, mazɔlɔɔ é Gaɓaɠɔn nuiti paani.»
2 Masagi Gaɓaɠɔn nuiti tolini. Ti la ɠɛni ga Izilayɛle nu, kɛlɛ Amool nuiti mɔtaiti ge ɠɛni de. Izilayɛle nuiti ti minazeɠeni ti ʋɛ ga ti la naati pa, kɛlɛ anɛɛ naa ʋe, Sayile ná-gaaɓaai é ɠɛni zea Izilayɛle nuiti ta Zuda nuiti bɛ, é ɠɛni ɠɛɛzu, é ti zuwuɠaaleʋe.
3 Davide ɠɛni Gaɓaɠɔn nuiti ma: «Lee ɠa nà kɛ wo ʋɛ? Lee ɠa nà kula ga zalaɠai niima ɠoto gba vai zu, nii a kɛ wo tuya loo Ɠɔoɠɔ GALAGI ná-nuɓusɛiti bɛ?»
4 Gaɓaɠɔn nuiti ti gooɠaaʋoteni, ti ɠɛ ma: «Kpɔɛi é gi yɔɠɔzu gá Sayile ta ná-pɛlɛyeɠei, su la ɓɛtɛa ga walii ɓaa zanugi, gá lɛi ɓalaa gá Izilayɛle nui tanɔpɛ paa.» Masagi ɠɛni ti ma: «Lee ɠa mu wo pɔ gè kɛ wo ʋɛ?»
5 Ti gooɠaaʋoteni, ti ɠɛ ma: «Tɛi zunui nii ɠɛa ɠɛɛzu, é gi undaaʋili, ta é gi zuwuɠaaleʋe Izilayɛle yooi ná pɛ su,
6 gi ɓɛdɛi ɠa mavofodai zu zunu lɔfela ʋa, gi ti zɛlɛ gului ʋa Ɠɔoɠɔ GALAGI ɠaazu, Sayile nii Ɠɔoɠɔ GALAGI yiimazeɠeni la, naa ná-taazuʋɛ Giɓea.» Masagi ɠɛni ma: «Nà ti lɔɔzu wo yeezu.»
7 Masagi Zonatan ná-doun zunui Mefiɓaale yɛni ná, tɔɔzei minazeɠegi ʋa, ti kɛɛni yɔɠɔzu ta Sayile ná-doun zunui Zonatan, Ɠɔoɠɔ GALAGI ɠaazu.
8 Kɛlɛ masagi Aya ná-doun anzanui Lisipa ná-doun zunu felegɔiti soni, niiti é ti zɔlɔɔni Sayile ʋɛ, Aalamoni ta Mefiɓaale, ta Sayile ná-doun anzanui Meelaɓe ná-doun zunu lɔɔlugɔiti, é ti zɔlɔɔni Meɠola nui Ɓaalazilayi ná-doun zunui Adiliyɛle ʋɛ.
9 É ti ve Gaɓaɠɔn nuiti zea, ti ti zɛlɛ gize unmaʋɛ Ɠɔoɠɔ GALAGI ɠaazu. Ti nu lɔfela pɛ ti zaani ʋɔɔma. Ti zaani nɔ é zoloo moloi nii daa ga wɔɔlezegi, naa leʋe volo mɔungi ma.
10 Aya ná-doun anzanui Lisipa saa wɔlɔ wo seɠei zeɠeni, é pɛɛ wu fasai ma, molo leʋe volo mɔungi, eyɛsu tonai ʋu ti ma, é ɠɛni wɔniiti kpɛɛzu poomaiti ma foloi, é ɗa dɔɓɔ zuaiti kpɛ kpidii.
11 Ti liini, ti naa wo Davide ma, nii Aya ná-doun anzanui Lisipa kɛɛni, Sayile anzai nii é la ɠɛni vuluni ga zɔiti kɛʋele.
12 Davide liini naazu, é Sayile ma ɠaeiti ta ná-doun zunui Zonatan ma ɠaeiti maavali Yaɓese nuiti ma, Galaade yooi zu. Mazɔlɔɔ naati ka ti ti-ma ʋoomaiti seɠeni Ɓɛte-San taa zaamaʋɛ, ʋɛ Filisiti nuiti ti ti zɛlɛni ná, siɛgi zu ti vɔnini la Sayile ma Gileɓoa.
13 Ti zeɠeni miná ga Sayile ma ɠaeiti ta ná-doun zunui Zonatan ma ɠaeiti, ti ʋa ga tiye, ti kpɔ zɔiti ba, ti zɛlɛni.
14 Ti liini, ti Sayile ma ɠaeiti ta Zonatan ma ɠaeiti maaɠulu Sayile kɛɛɠɛ Kise ná-kabai zu, Sela, Ɓɛnzamɛn yooi zu. Ti masagi ná-deveiti pɛ daazeelini. Naa ʋoluma GALA ge zooi maawɔinɠaani.
Kɔɔi niiti ti ɠɔɔni
Filisiti nuiti daalɔɠɔma
(1 Dɔlɔ Sɛʋɛi 20:4-8)
15 Kɔɔi tɔɔzeini mɔnɔ Filisiti nuiti ta Izilayɛle yɔɠɔzu. Davide ta ná-kɔɔɠɔ nuiti ti liini, ti vala Filisiti nuiti ba. Davide ɓɔlɔa ɠɛni de niina.
16 Lafa mavofodai zu nui nii daa ɠɛni ga Yiseɓi-Ɓenɔde ɠɛni ɠɛɛzu, é Davide ʋaa. Boɠa zɔkpɔ niinɛi ɠɛni keelaʋɛ, kpɛɛin é ɠɛni zea, ma mɛɛngi ɠɛni ga kɔlu ɓɔigi, buɲɛgi ga kilo saʋagɔ ɠɛɠala.
17 Kɛlɛ Seluya ná-doun zunui Aɓisayi ʋaani, é ɓɔ Davide ʋa, é Filisiti nui ʋa. Davide ná-kɔɔɠɔ nuiti ti ɠɛni ma naazu: «È la mɔ ʋilɛga gi ʋolu kɔɔɠɔzuʋɛ, naa ɠa a kɛ Izilayɛle ná-lanboi mina za.»
18 Kɔɔi taɠili su mɔnɔ, Filisiti nuiti daalɔɠɔma Gɔɓe, Ɠusa nui Siɓekayi Safe ʋaani, naa ɓalaa ɠɛni ga Lafa mavofodai ta.
19 Naa ʋolu kɔɔi taɠili su mɔnɔ Filisiti nuiti daalɔɠɔma Gɔɓe, Ɓɛteleyɛme nui Yaalé-Wolegime ná-doun zunui Ɛlɛɠanan Gate nui Goliate ʋaani, nii ná-kpɛɛin ma wului wɔɔlɔni, eɠɛ seɠe vɛlɛ nui ná-gba gului.
20 Kɔɔi taɠili su mɔnɔ Gate, zunui ta ɠɛni ná, koozaai, zeeɓeɠaiti ta kɔɠɔɓeɠaiti ti ga dɔzitadɔzita, ti pɛ kpɔga ɠɛ ga puufele maazu naani (24). É ɠɛni ga Lafa mavofodai ta tɔ ɓalaa.
21 É malimasakɛɛi leʋeni ga Izilayɛle nuiti, Davide kɛɛɠɛloin Simeya ná-doun zunui Zonatan paani.
22 Lafa mavofoda naanigɔi niiti ti zɔlɔɔni Gate, ti pɛ ti zaani Davide ta ná-kɔɔɠɔ nuiti zeezu.