13
Kɔɔɠɔ gani kɔɔ nuiti tukpɔɠaaleʋe vai
1 Naama volo ná, ziɛungi laa ɠa lao Davide ná-pɛlɛyeɠei ʋɛ ta Zeeluzalɛme nuiti bɛ, é ta-ɠotoiti ta ta-ɠɔzɔba vaiti gba.
2 Ɠɔoɠɔ GALAGI Fai-Pɛ-Maliɠii wooi ɠaa: «Naama volo ná, nà kɔɔɠɔ ganigiti folo zooi ʋa, nu nɔpɛ ge la mɔ ti-laasei boga. Nà ma ɠala goo wo nuiti ɓalaa kula zooi ʋa, ta kɔzɔba ɠisiɛiti pɛ.
3 Naazu, zɔi nɔpɛ é ɠɛɛzu GALA goo wosu, sɔlɔɔ kɛɛɠɛi, ta sɔlɔɔ deei ta ɠɛ ma: ‹È la mɔ yɛga vulua mazɔlɔɔ zɛɛ ɠala gooi ɠa è bosu Ɠɔoɠɔ GALAGI lɔɠɔi zu.› Sɔlɔɔ nuiti ɓɔɠɔgo ɠa naazu ti bɔɔzu, siɛgi zu é ɠɛɛzu GALA gooi wosu da.
4 Naama volo ná, ma ɠala goo wo nuiti ti pɛ ti laa ɠa ve ga unfegi, siɛgi zu ti gala gooi wosu da, ti sɔlɔɔsu ta-ɠulakɛlɛmaiti su. Ti la mɔ kɛa pɛ, ti ʋa sua leɠa zeɠe wolai ta loo ɠɔba, ti ʋa ɗa nuiti yaava.
5 Ti ɠilagilagi a ɗa ɠɛ ma: ‹Gè la ga GALA goo wo nu, nà ga tii ɠɛ nu nɔ, tii ɠɛ yooiti ta zèa kaite mà nu niinɛ ziɛsu.›
6 Ni ta gaazaɠana, ti ɠɛ ma: ‹È palai niiti sɔlɔɔgɛ ɠale, ti è-ɠɔlɔgi ma?› Toɠa ti wooɠaaʋote, é ɠɛ ma: ‹Gè ti zɔlɔɔgɛ nɛ̀ɛɲɔɠɔiti ta-ʋɛlɛi wu.› »
Minazeɠegi niinɛ vai ʋolu
7 Ɠɔoɠɔ GALAGI Fai-Pɛ-Maliɠii wooi ɠaa:
«Boɠa zɔkpɔi wuzeɠe nà-baala makɛ nui laalɔɠɔma,
nɛ̀ɛɲɔɠɔi laalɔɠɔma!
Baala makɛ nui loɠa,
baalagiti ti zuvaza,
nà ma goiti ɓalaa doɠa.
8 Zooi zu nuɓusɛiti gaa ɠa ɠwɛsu saʋa,
seizu felegɔi ɠa za, ti undaaʋili,
kɛlɛ seizu ɠilagi ɠa yɛ vulua zooi zu.
Ɠɔoɠɔ GALAGI wooi ɠana.
9 Nà seizu ɠilagi naa lɔ abui zu,
gè gaawun kɔzɔi ɠula ba,
ʋelei nu a ɗa walii ɠaawun da kɔzɔi ɠula ba,
nà nɔɠɔi ɠula ba,
ʋelei nu a ɗa zanugi ma ɠɔzɔi ɠula la ba.
Naazu ta fàli, gè ti wooɠaaʋote.
Nà ti loli ga: ‹Nà-nuɓusɛiti.›
Tiya ma, ta ɠɛ ma: ‹Ɠɔoɠɔ GALAGI ɠa é ga gá-ƓALAGI!› »