9
Izelayɛle ɠoba yooiti tukpɔɠaaleʋe vai ta ti ɠizo fai
1 Ɠɔoɠɔ GALAGI ná-keela wooi.
Daawooi Ɠadelake yooi zoga,
é ɠwɛ Damase taazuʋɛ.
Mazɔlɔɔ nu vului pɛ ka ga Ɠɔoɠɔ GALAGI nɔnɔ,
ʋelei nɔ Izelayɛle wolodaiti pɛ ti la.
2 É Ɠamate ɓalaa zoga,
niiti ti zeiɗai la ta Damase,
é zeeli Tiil, ta Sidɔn ma,
niiti ti wola ɠoozuɠeleai.
3 Tiil siɠi gaaɠooza toga ɓɔɠɔ ʋɛ,
é walii ɠaalɛa ba eɠɛ fufiligi,
é zanugi ɠaalɛ ba eɠɛ koi yɔɠɔzu ʋalaʋalai.
4 Kɛlɛ Maliɠii ɠa ti pɛ kula zea,
toɠa ná-siɠigiti toka kpoloɗɛi wu,
toɠa ɠala ga abui.
5 Asekalɔn ɠa naa ɠa, é lua,
Gaza ɓalaa zu ɠa ɓali ga duai,
Ekelɔn ɓalaa ka ɠɛ ɠana nɔ,
tɔɔzei kitosuʋɛ ɠa ɠula zea.
Masa ge la mɔ ɠɛa Gaza,
nu vulu nɔpɛ ge la mɔ ɠɛa Asekalɔn.
6 Nu zupuiti ta zei Asedɔde.
Nà Filiseti nuiti ta-wasogi zuɠoloɠolo.
7 Nà ɲamasu zuai ɠula ti-la,
gè kɔɔɠɔ gani kɔɔ laamianigiti kula ti-ɲiiga yɔɠɔzuʋɛti.
Ta-nuɓusɛi mɔtai ɠa ɠɛ ga gá-ƓALAGI nɔnɔ.
Toɠa losu zɔlɔɔ Zuda wolodamaiti saama,
Ekelɔn nuiti ɓalaa ti ɠɛ ga Yeeɓuse nuiti kɛʋele.
8 Nà ɠɛ nà-zooi maaɠoolii zu,
gè makɛ kɔɔɓɔgiti daalɔɠɔma, ti leʋesu,
suɲɔu nui tanɔpɛ ge la mɔ nà-nuɓusɛiti kpɔlɔa,
mazɔlɔɔ gàazu ɠa ɠɛ ti ʋa niina.
Ziilɛi masagi ʋaa vai
9 Ee, Siyɔn nuɓusɛi, ɠɔkɔ ga koozunɛɛi!
Ee, Zeeluzalɛme nuɓusɛi, wooɠula ga koozunɛɛi!
Wɛlɛ ɗa-masagi ʋa, é ʋaazu è ʋɔ,
telebogɛ, pilɛ sɔlɔɔdai veeʋɛ bɛ,
toɠa ga ɓɔɠɔmaayei nu, é zeini soovalegi ɠɔma,
soovale saai ma yiʋoi ɠɔma.
10 Nà kɔɔɠɔ wotoloiti kulazu Efelayime ʋa,
gè kɔɔɠɔ zooiti kula Zeeluzalɛme ʋa,
kilɛgi nii kɔɔi ɠɔɔzu la, naa zu ɠa ɠaleɠale.
Masagi naa ɠa ziilɛigi lɔ zii ɠiligiti saama,
ná-masadai ɠa zo kpoloɗɛi zɔi ma, é zei zɔi ʋa,
é zo ziɛ wolai Efelata ma, é li zou ɓela ga.
Duɔiti unmɔɔ fai
11 Ɗɔun ɗɔnɔi, minazeɠegi maaʋele ma,
é de yɔɠɔzu, nii kɛai ga ɲamai maaʋele,
nà ɗa-luɔiti unmɔɔsu,
gè ti ɠula zeɠei zu, nii ziɛ la su.
12 Kasoɠa nuiti wɔiti kitogi wo ʋɛ,
à ɠale ma wa-laazu ziɠi gaaɠoozagi zu!
Nà nii wosu za ga:
Nà wo ɠaazumaawɔinɠa ga seizu felegɔ.
13 Mazɔlɔɔ gè Zuda ɠɛa ga nà-kilɛgi,
gè Efelayime ɠɛ ga ná-mɛɛin.
Ee, Siyɔn, nà è-loun zunuiti teʋesu,
ti vala ɗɔnɔ ma loun zunuiti ba Yavan,
nà è ɠɛ ga kɔɔɠɔ woɠa zɔkpɔi.
14 Ɠɔoɠɔ GALAGI ɠa ɠula kɛlɛma ti maazu,
ná-mɛɛin ɠa ɓizɛ eɠɛ mainmain.
Maliɠii Ɠɔoɠɔ GALAGI puʋugi vɛ,
toɠa ʋaazu lɛkpɛma ʋelei nu yeezazu lonavifigi wu.
15 Ɠɔoɠɔ GALAGI Fai-Pɛ-Maliɠii ɠa ɓaa ná-nuiti maazu.
Ta daami wo, ti fɛlɛvɛlɛ kɔtuiti golowolo.
Ta ɓɔɔle, ti ɗa zɔngɔ,
eɠɛ dɔɔ ɠa ti zo,
ti laa ɠa ve eɠɛ ɲama vaza aniɲakai,
ti maa ɠa ɓɔɔle eɠɛ zalaɠa ɠulazuʋɛ ma woizuʋɛti.
16 Ta-ƓALAGI, Ɠɔoɠɔ GALAGI, ɠa ná-nuɓusɛiti kizo naama voloi,
eɠɛʋelei nɔ baala makɛ nui,
a ɗa ná-baala kpulugi ɠizo da,
ti ɗa volo ná-zooi zu,
ʋelei kɔtu zɔngɔ ɓaaɓaagiti ta ɗa volo la.
17 Ee, ti wola undaa ɠa nɛ!
Ee, ta ʋapa ga gola!
Moloi ɠa zɛbɛi ve zunu loungoiti zea,
dɔɔ niinɛi zɛbɛi ve anzalopoiti zea.