11
Pita Tóba Tórrmen Müsirrga Ninóp Yesun Amkoman Angun Pamkolpamdó, Zerrusalemóm
1 ⌊Apostol⌋ akó Yesun amkoman angun zonaretala Zudia prrobinsdü barrkrrurr wagó, Zu pamkolpam koke nidipko ta Godón bóktan kuri ipüdórre.
2 Pita Zerrusalem wirri basirrdü nóma wamórr, da ngibürr Yesun amkoman angun Zu pamkolpama oya murrkurr akrran kwarilürr
3 wagó, “Ma ⌊gyabi sopae singgalgórrón⌋-koke pamab müótüdü iade bangrirrü akó inkü iade elorró?”
4 Da Pita blaman bóktan morroal dümdüm müsirrga ninóp ibüka, tai zitüldügaba kókó alakón, ne klama tómbapónórr.
5 Wagó, “Ka wa Zopa wirri basirrdü tóre ako nóma namülnürrü, ka aerrde nuszan kla eserró. Ka darrü kla eserró kwitümgab abindi wamaka wirri mórrkenyórr pokoa. Ene wirri mórrkenyórr pokoan tokom kub amiógürrün kwarilürr. Tai tamórr kókó kürü minggüpanan.
6 Ka tai ngakarró, da ola oya kugupidü tokom wapórpükü lar asi kwarilürr, nurr lar, tüpdü ngübyón elklaza, akó kwitüm póyae.
7 Ka bóktan bómgól arrkrrurrü kürüka nóma tóbtanórr wagó, ‘Pita, ugó bupa; emkal da ugó elóng!’
8 A kagó, ‘Koke Lod, ka ngaen alóng-koke murr kokean elóngórró, marü ilküküpdü tómanpükü ne klamko!’
9 Bóktan bómgóla akó nis ngim tóbtanórr kwitümgab wagó, ‘God ne kla tómbapónórr i ⌊tóman-kokeako⌋, ma ini kla ngiblian-gu, igó, i tómanpükümako.’
10 “Ini klama aüd mün tómbapónórr, da ene mórrkenyórr poko we amurrutóp kwitüdü.
11 Da módóga, ene aüd pam nibiób zirrnapónóp Sesarriagab kürüka, dümdüman ogobórr, kókó ene müót minggüpanan bórrangórr, ki ne müótüdü ngyabenónóp.
12 Kürü Godón Samua we kyalórr abün-abün gyagüpitótók azebgum inkü tótókóm Sesarria wirri basirrdü. Ka kólba ini ne 6 Yesun amkoman angun zonaretalpükü tamórró Zopagab, da ki blamana we barrbürrü Koniliusün müótüdü.
13 Konilius kibü umulüm adrratórr wa, Lodón anerru ia esenórr tóba müótüdü zamngólde, akó bóktande wagó, ‘Ma ngibürr pam ugó zirrnapónónóm Zopa, Saemonka, oya darrü ngi módóga, Pita.
14 Wa marü Morroal Bóktan sab wató müzazile, da ene bóktana marü akó moba blaman müótan kolpam sab wató zid nirre.’
15 Ka bóktan nóma bókyarró, Godón Samua ibüka ugón tübangrinürr mibükazan tübangrinürr ngaen-gógópan,
16 da ka gyagüpi amanikürrü Lod ne poko bóktanórr wagó, ‘Zon pamkolpam nae-e ⌊baptaes bain⌋ yarilürr, a yabü ma sab Godón Samu-i nirre!’
17 Da God ibü dadan ⌊gyaur kla⌋ nókyenóp mibüzan tókyenóp, mi ngaen-gógópan amkoman nidi yangunóp Lod Yesu Kerriso. Ka wa nótókla, Godón zaget piküp ainüm?”
18 I nóma barrkrrurr ini bóktan, ibü myamem bóktan babul yarilürr, ama Godón agür kwarilürr bóktankü wagó, “Zu-koke nidipko, God ta ibü kwat kuri nókyerre ibü kolae tonarrdógab byalüngüm ama küsil arróldó.”
Yesun ⌊Morroal Bóktana⌋ Abzilürr Antioküm
19 Stibenón ne tonarr emkólóp, Yesun amkoman angun pamkolpama wirri müpdüma ogobórr. I blamana busuóp, da ngibürra tai busuóp kókó Ponisia kantrridü, Saeprrus kaodó, akó Antiok wirri basirrdü, bóktan büdrratkü wata Zu pamkolpamdó.
20 A ngibürr pam Saeprrus akó Saerrin wirri basirrdügab nidi togobórr, i ta Antiok ogobórr, da i ola Morroal Bóktan Lod Yesunkwata amgol kwarilürr ibüka, Zu-koke nidi kwarilürr.
21 Lodón tangbamtin asi yarilürr ibüka, da abün pamkolpama amkoman yangunóp ibü bóktan, da tübyalüngóp Lodka.
22 Inikwata bóktana tai abzilürr Zerrusalem sos pamkolpamdó, da i Barrnabasón zirrapónóp Antiok.
23-24 Wa nóma abzilürr, wa ola esenórr God ne kla tómbapónórr tóba ⌊gail tonarrdógab⌋. Da oyaka bagürwóm yarilürr akó wa ibü arüngan ngintinóp Lodón amkoman angunüm tibiób moboküpi. Wa morroal pam yarilürr, da Godón Samua oya wirri arüng ekyanórr tóba amkoman angundi Lodón, da abün pamkolpama Lodón mamoanóm bainóp oya bóktananme.
25 Ene kakóm, Barrnabas wamórr Tarrsus wirri basirrdü, Solón amkünüm.
26 Wa oya nóma esenórr, oya Antiok idódürr. Darrpan dudu pailüm, Barrnabas akó Sol Antioküm sos pamkolpampükü kwób bazen kwarilürr, da i ola umulbain namülnürri abün pamkolpam. Yesun umulbain olmal kipaman Antioküm igó ngiblianónóp wagó, “Krristión pamkolpam”.
27 Ene tonarrdó, ngibürr prropeta Zerrusalemgab tübabinürr ama Antiok.
28 Da ibükagab darrpan prropet asi yarilürr, ngi Agabus. Wa we zamngólórr Godón Samuan arüngi bóktanóm wagó, “Wirri kua sab tame blaman bwób-bwób ini tüpdü.” (Ene tonarra ugón tómbapónórr, Klodius Sisa nóma yarilürr Rromóm.)
29 Yesun umulbain olmala bóktan we tónggapónóp, tibiób Yesun amkoman angun zonaretal tangbamtinüm, Zudiam nidi ngyabenónóp, tibiób darrpan-darrpanab mórrel ngarkwatódó.
30 Da i ini kla tónggapónóp, ama zirrnapónóp Barrnabas a Sol ene mani küp amarrum sos alngomól byarrmarr pamdó.