12
⌊Büdül Kórzyón Tóre⌋
Lod⌋ bóktanórr Moses akó Erron, ibüka Izipt kantrridü wagó, “Ini melpal, sab metat wata yabü blamanabkü ngaen-gógópan melpal yarile, blaman pailzan. Nüzazilamke blaman Isrrael basirr pamkolpam magó, ini 10 ngim ngürrdü, ini melpal, pama darrpan-darrpan ⌊sip⌋ kupo ó ta ia ⌊gout⌋ kupo tibiób olmalkolabkü ki yazebnóm, darrpan-darrpan müótankü. A oya olmalkol ne abün koke nóma kwarile ene dudu lar alóngóm, wató akó oya minggüpanan müótüdü ne pame, ene lar usakü arrgrrüti. Da wata we ngarkwatódó syórr yangórre, i ne ngarkwat olmalkolako, akó darrpan-darrpana ne ngarkwatódó elóngórre. Da i wata darrpan pail sip kupo ó ta ia gout kupo simanal korale, gülüng akó gao koke. Da morroal ngabkan koralónke kókó 14 ngim ngürr ini melpal. Blaman Isrrael basirr pamkolpama ene lar ugón ki okrralón, irrüba küp nóma sirrbüle. Da pamkolpama ngibürr óe ki yazebnóm da mamtae talkum ki nóngangonóm akó kwitana mamtae nugup, i ene lar ne müótüdü elóngórre. Ene dadan irrüb, i ene lar murr ki bamngulnüm birrdü, da ki elóngnóm kapan bókónpükü akó ist-koke bamngulürrün brredpükü. Lar murr alónggu kókres akó urur nae bamngulürrün, a wata dudu birrdü bamngulürrün, singülpükü, wapórpükü, akó aumana büb kugupidü murrpükü. 10 Ngibürr murr arrbün-gu sab irrbim; ngibürr murra ne nóma bamirre, da urdü yamselamke. 11 Da e inzan elóngamke: yabiób tumum mórrkenyórr belte barümürrün, yabiób wapór kla bamelórrón, akó tupuru tangdó korale. Büsai-büsai elóngamke, ene Lodón Büdül Kórzyón Tóre-e.
12 “Ene dadan irrüb, ka blaman Izipt kantrri sab ugón arrgrrat namulo, dakla akrrankü blaman ngaensingül babótórrón simanal olmal, pamkolpam akó ngabyón lar. Ka ta blaman Izipt god sab zaz ninünümo. Ka Lodla. 13 Da óe igó timama, müót bómzyatóm e ne ngyabendakla. Ka óe nóma nósenónómo yabü müótüdü, ka sab kwitana bórrgrrat namulo, da darrü büdülan kolae bain klama yabü koke namurrórre, ka ne Izipt pamkolpam wirri azid aeng nóma nókyenónómo. 14 E wata metat gyagüpi amanik koralónke ini ngürr, akó e ini ngürr tórezan amanik koralónke Lodónkü. Ene metat ódód gida-a.”
⌊Ist-koke Brred Tóre⌋
15  Lod bóktanórr wagó, “7 Ngürr kugupidü, e sab istpükü aungürrün brred alogu; wata ist-koke brred ololónke. Ngaen-gógópan ngürrdü, e blaman ist amónamke yabiób müótüdügab. Darrü oloma ene 7 ngürrdi istpükü aungürrün brred nótó nóma elo-e, oya sab metatómpükü zirrapórre Isrrael pamkolpamdógab. 16 Ngaen-gógópan ngürr akó 7 ngim ngürrdü, e kwób bazen koralónke kürü ⌊ótókóm⌋. Darrü zaget tónggapón-gu ene nis ngürr kugupidü, a wa taia ene ngürrankü ngarkwatódó alo kla tómbapónóm blamanab alom. 17 E amanik koralónke Ist-koke Brred Tóre, zitül ka ini ngürrdü simarrurrü yabü Isrrael zitül pamkolpam Iziptgab. Amanik koralónke ini Tóre, zitülkus ini bóktan sab metat mumyamón bóktana, yabükagab solkwat ne olmalbobatala tóbabótóle.”
Ngaensingül Babótórrón Simanal Olmalab Büdül
29 Irrüb zokrrok, Lod ngaensingül simanal olmal ugón ekrranórr Izipt kantrridü, tai parraoan ngaensingül siman olomdógab, sab solkwat aban mórran pabodó nótó mórróne, kókó tümün müótüdü pamab ngaensingül simanal olmaldó. Akó blaman ngabyón larab ngaensingül simanal kupo ta inzan ekrranórr. 30 Ene irrüb parrao, oya zaget pam, akó blaman Izipt kolpama ugón tübarsinürr. Da kari yón taegwarr koke yarilürr blaman Izipt kantrridü, zitülkus ola darrü popa müót babul yarilürr, a blaman wata büdülpükü müót kwarilürr. 31 Ene dadan irrüb, parraoa Moses akó Erron ibü nginaunürr tóbaka, da bóktanórr wagó, “Bazeb! Kürü pamkolpam elókam, yadipa akó Isrrael pamkolpam! Ogob ótókóm Lodón, e enezan kümtirri kürü. 32 E yabiób sip a gout akó ⌊kau⌋ yazebam da ogob! Da e dakla kürünkü tóre bako kwarilünke kürü ngyaben morroal ainüm.” 33 Izipt pamkolpama wirri arüngi nilóp Isrrael pamkolpama büsai-büsai bazebóm ibü kantrri amgatóm. I bóktónóp wagó, “Ki kubó blamana kena nurrbarinünüm, e ne koke nóma bazebo!”
Isrrael Pamkolpama Izipt Amgütóp
37 Isrrael pamkolpama we bazebórr wapórane Rrameses wirri basirrdügab ama Sukot wirri basirrdü. I aprrapórr 600,000 pam koralórr; kol akó olmal koke etóngóp, i nisakü bazebórr. 38 Akó abün mogob pamkolpam akó abün sip a gout yabül akó kau yabüla ta inzan bazebórr usakü. 39 I Iziptgab ne kókres plaoa barrmülürr, i kwat-kwat ist-koke pólan brred bamngulóp. Ene plaoa ist-koke yarilürr, zitülkus ibü Iziptgab wata büsai-büsai zirrnapónóp. Ibü gaodó ngarkwat koke yarilürr Iziptüm, kwat-kwat alom alo kla bamngulüm akó istpükü plaoa azebóm ene tonarr. 40 Isrrael pamkolpama Iziptüm 430 pailüm ngyabenónóp.