2
Zonan Tóre
1 Tai auma wapian dupidü, Zona tóre olgab ekorr ⌊Lodka⌋, tóba Godka
2 wagó,
“Kólba ini müpdü, Lod, ka marü ngimliarró,
da ma kürü bóktan kuri salkomóla.
Ini büdülab bwóbdügab, ka marüka tangbamtinüm górrgarró,
da ma kürü kurrkrrua.
3 Lod, ma kürü kümaikürrü wirri buku bwóbdü,
tai kókó ka malu tüp emrrarró,
kürü blaman naea ne mamtae kotarr kónómórr,
ó blaman marü ne arüng goblol kwarilürr, kürü kwitana arrgrrat kwarilürr.
4 Kürü gyagüpitótók igó yarilürr kamaka, ‘Ma kürü metatómpükü alzizi kümanika mobakagabi,
ó ka marü ⌊Gyabi Müót⌋
sab myamem kokean eseno.’
5 Naea kürü ngakoklaorr, kürü ngónapükü batülürr.
Malua kürü metatómpükü küdarükürr
akó malu opopora kürü singül kórrgótónóp.
6 Ka abilürrü tai kókó podo zitülkus ne kwarilürr,
ene büdülab bwóbdü.
Da mató, Lod, kürü God,
ma kürü arról kalkomóla ene kukurru bwóbdügab.
7 Ka kólba nóma küp bamkórró, wa, kürü arróla blakónóm kain yarilürr,
da Lod, ka marüka tóre ekorró.
Ma kürü kurrkrrurrü moba Gyabi Müótüdü.
8 Obae küp-koke godóm nidi tóredako,
marü morroal tonarrbóka tai kuri imrükrre.
9 Ka sab marü wórri magürolo,
ó ka marü eso akyanóm lar emkolo,
ó ka sab kólba ⌊arüng alkamül-koke bóktan⌋ tórrmendó irrbuno.
Lod, zidbaina marükagabi tótókda!”
10 Da Lod wapi arüng bóktan we ekyanórr, Zonan müzi alkomólóm, kórrgópdó.