Nis Ngim Peba Igó Ngiliarróna,
Samuel
7:1-5, 8-17
7
⌊Lodón⌋ ⌊Alkamül-koke Bóktan⌋ ⌊Deibidka⌋
1 Lod Deibidün aurdü amanikürr ibükagab, wankü nidi gazirr kwarilürr. Da módóga, wa paude we mórran-mórran bainürr tóba morroal wirri müótüdü.
2 Kinga ⌊prropet⌋ Neitónka we bóktanórr wagó, “Ka inamüla ini agurr sida nugupi aelórrón müótüdü, a Godón bokos ama gyaurka ⌊Palae Müótüdüma⌋.”
3 Neitón bóktan we yalkomólórr kingdü wagó, “Marü ne gyagüpitótóke, wam da tónggapó, zitülkus Lod mankü asine.”
4 A ene irrüb Lod Neitónka we tóbtanórr wagó,
5 “Ugó wam kürü zaget olom Deibidka, da igó yalke magó, ‘Lod igó bóktóne: ma sab ngyaben müót koke elo kürünkü.’ ”
8 “Wam, da kürü zaget pam yalke magó, ‘Wirrian Arüng Lodón bóktan yóni wagó, “Ngaen-gógópan ma enan ⌊sip⌋ ngabkan pam namülnürrü, da ka ma marü kuri murruna sipab alo bwóbdügab kürü Isrrael pamkolpam balngomólóm.
9 Ka mankü asi namülnürrü ma ene iazan wamnórró. Akó ka ibü marükagab amarró mankü nidi gazirr kwarilürr, ama kolaedó simarrurr. Da ka sab marü ngi wirri ino ngibürr ini tüpdü wirri pamzan.
10 Akó ka sab kólba Isrrael is ngyaben bwób nókyenónómo. Ka sab ibü ola irito, igósüm i sab tibiób bwóbdü ngyaben kwarile. Ibü sab myamem koke nunurre, kolaean pamkolpama ngaenzan bangón kwarilürr,
11 ka ibü zaz ne tonarr irrbürrü, tai kókó errkya. Akó ma sab paudüdü ngyaben namulo. Mankü nidi gazirr kwarilürr, i marü sab kokean munurre. Akó ka, Lod, ka marü amkoman igó milo, Deibid: Ka sab müót elo marünkü.
12 Marü arróla nóma blakóne, ó tüpdü nóma müngrirre marü abalbobatal negako, ka sab darrü küp marükagab ipudo marü pabo apadóm, akó ka sab oyankü pabo tónggapono wa sab metat nólgabi ne balngomól yarile kingzan.
13 Kürü ene müót sab wató ele, kürü sab nóla kagürnórre. Kürüme sab metat darrü küp asi yarile, sab metat-metat nótó balngomól yarile kingzan.
14 Ka sab oya Ab namulo akó wa sab kürü olom yarile. Wa ne kolae nóma tónggapóne, ka sab oya wirri bidam ekyeno, aba tóba olomzan bidam akyanda.
15 A ka sab kólba morroal tonarr koke agino oyakagab, ka Solkagabzan agirrü, ka marüme noan amaikürrü, ama marü müngrirrü.
16 Marü müóta sab kokean bülgüte akó marü kingzan balngomóla sab kokean blakóne. Marü olmalbobatal sab metatómpükü king korale Isrrael bwób alngomólóm.” ’ ”
17 Ene kakóm, Neitón blaman ini poko Deibidka we büdrratórr, Lod ne kla okaka sizazinürr.