3
1 Pero ja huenlex quermano jumasa, mi bob cala huabyex ja jastal huax cal yab ja quermanotic ja ma' huan xa jeejel yi yuj ja Espíritu Santo. Como ja huenlexi, ja hua pensarexi, t'usan mi oj slaj jastal ja spensar ja ma' mi sc'uan ja Diosi. Lajanex soc jastal jun yal untic. Jel to ni coel juntiro ja hua pensarex soc ja Cristo.
2 Jayuj jlea modo jastal oj cala huabyex ba mas claro. Porque q'uelahuil jun yal alatz ja ba huan to chuuneli. Mi ni modo oj aaxuc yi ja suael jastal huax yiaj jun nihuan cristiano. Ja' to ni mero amojex ja huenlexi porque mi tox bob ahuabyex sbej ja yabal ja Cristo ja ba mas huocol huax c'ulaxi entenderi
3 Porque mi tox tucbi ja hua pensarexi. Jel najat ay ja hua pensarexi soc ja jastal huas sc'ulan pensar ja Espíritu Santo porque jel to ni envidioso ayex tac. Ja' mero huajel ac'ujolex soc ja pleito. C'olan c'olan xta huaxa huiaj abajex. ¿Yuj ama jach huas sc'ana ja Dios ja jastal huanex sc'ualjel ba? Ja jastal jahui, ja' ni smodo ja ma' mi huas sc'uan ja Diosi.
4 Porque ay ma' huax yala huujilex: Ja queni ti ayon soc ja Pablo, la chiyex. Ay ma' huax cho yala: Pero ja queni, ti ayon soc ja Apolosi. Ja jastal jahui, ti huax ilxi lec que jun xta hua modoex soc cualquiera cristiano.
5 Porque ja Apolosi soc ja Pablo, mi sbejuc huaxa toyohuex porque ja quenticoni, quechan yuj ja yatjumoticon ja Diosi, yuj ja jecubaloticon ja quenticoni, jayuj ja c'uanex ja Dios ja huenlexi. Cada jujuneoticon, ac'ubal jcholticon yuj ja Cajualtiqui.
6 Ja jchol ja queni, lajan soc jastal jtz'unu jun inat, jaxa quermanotic Apolosi, lajan soc yen huax ya och yaalel. Jachuc ja xchol ja yeni. Jaxa Diosi, yen huax ya q'uiuc.
7 Ja quenticoni, huas tz'unuticon soc huax ca ochticon yaalel, pero lec moc to jauc ja Dios huax ya q'uiuqui, lom nia. Ja quenticoni, lomoticon nia.
8 Porque ja ma' huas stz'unu soc ja ma' huax cho ya och yaaleli, jun xta ni yabalea. Jaxa Diosi, yen oj yaa ja jtz'acolticoni, pero chican jastal ay ja atel cada jujunei.
9 Ja quenticoni, jmoj ni jbajticon atel ja ba yatel ja Diosi. Jaxa huenlexi, lajanex soc jastal jun luum, jaxa Diosi, ti huax jac atjuca. Oj cho lajex jastal jun naitz huan q'ueel, pero ja' ni huan q'ueel yuj ja Diosi.
10 Jaxa queni, lajanon soc jastal jun maestro albañilon porque yala cab ja Diosi jastal oj tz'un can lec ja oyi. Pero tuc xa ma' oj ch'ac sc'uluc ja naitz jahui. Chican ja ma' huan ateli, sbej ni oj yaa scuidado jastal huan q'ueel yuji.
11 Pero ja syojyal tz'unubali, mi ni june ma' oj bob stucbes ja oy jahui, porque yena ni ja Jesucristo.
12 Pero ja atjum jumasa, chican jastal huas sc'ana smacba ja yibel ja naitz jahui. Ay ma' huax ya och oro, ma chican jas taq'uinil, ma tzamal ton, ma aq'uinte, c'aem, ma ac. Pero ja ma' huax ya och c'aem ma ac, ja' ni smoj ja jas huas sea huilex ja tantic ja maestroex jahui.
13 Pero cuando huax jac ja c'ac'u oj ch'ac yaa cuenta ja Diosi, ti oj ch'ac chijcajuc jastic ja catelticon huanticoni. Porque ja c'ac'u jahui, oj jacuc jun nihuan c'ac'. Ti oj chijcajuc bay ja oj sc'ul ahuantar ja c'ac' ja cateltiqui.
14 Jaxa cateltic ja ba jnajtiqui, ta huan c'a sc'ulan ahuantar ja c'aq'ui, entonces oj ni jc'ultic recibir ja jtz'acoltiqui.
15 Pero ta mi c'a tojbeluc lec ja ateli, oj ni ch'ac c'ac'a. Juntiro telan coc jc'abtic oj cancotic. Huocol xta oj cancotic sac'an ja ora jahui.
16 ¿Mi ma huaxa naahuex que huenlex ni ja stemplo ja Dios ba? ¿Jaxa Yespíritu ja Diosi ti ni culan ja ba templo jahui?
17 Pero ta huanex c'a sc'uajel ja jas huas sea huilex ja tantic huinique jumasa jahui, gana ni juntiro huaxa joma bajexa. Ti oja huilex que ja Diosi oj xch'ay snaajele porque yena ni stemploexa. Jaxa templo jahui, mi cualquierauc huax yila ja Diosi, como huenlex nia.
18 Mi lom xa lola bajex que jel huaxa naahuex. Mas lec, c'ulan abajex que mi jas huaxa naahuex, ti oja huilex que ay jas jel oja naex ja smeranili.
19 Porque ja ma' jel ja jas huas snaa ja tiempo iti, jaxa Diosi, mi ni jas vale huax yila. Jach ni huax yala ja yabal ja Dios tac:
Ja ma' jel huas snaa huax yala, pero soc ja svivoil jahui, oj aaji co trampa yuj ja Diosi.
20 Huax cho yala ja ba otro parte:
Ja jastal jel nihuan ja spensar ja ma' jel vivo, ja queni, lom ni juntiro huax quilaa,
xchi ja Cajualtiqui.
21 Jayuj mi sbejuc oja toya bajex yuj ja lajan huala bejyiyex soc jun huinic porque ja quenticoni, quechan ni yuj ja yatjumoticon ni ja Diosi.
22 Huanoticon atel pero ja' ba hua lequilex ja huenlexi. Jach ni ja quermanotic Apolosi soc ja quermanotic Pedro. Spetzanil ja ba hua lequilex ja huenlexi, chican jastal huan eq'uel ja mundo ja huego, sea ta huala ajyitic sac'an ma huala chamtic,
23 Como ti xa ni aytic ja ba slado ja Cristo, jaxa Cristo, sbaj ni Diosa.
Ja yatel ja secabanum jumasa ja Diosi