21
1 ʻOku kikite ʻa ʻIsikieli ki Selūsalema mo e fakaʻilonga ʻoe toʻetoʻe. 8 ʻAe heletā ngingila mo māsila, 13 Ko e meʻa ki Selūsalema. 25 Ki he puleʻanga, 28 Pea ki he kakai ʻAmoni.
1 Pea naʻe hoko mai kiate au ʻae folofola ʻa Sihova, ʻo pehē,
2 “Foha ʻoe tangata, fakahangatonu ho mata ki Selūsalema, pea tuku hoʻo lea ki he ngaahi potu tapu, pea kikite ki he fonua ʻo ʻIsileli,
3 Pea ke lea ki he fonua ʻo ʻIsileli, ‘ʻOku pehē ʻe Sihova; “Vakai, ʻoku ou tuʻu au kiate koe, pea te u unuhi ʻae heletā mei hono ʻaiʻanga, pea te u motuhi meiate koe ʻae māʻoniʻoni, pea mo e angahala.
4 Pea ko ia, ko e meʻa ʻi heʻeku motuhi meiate koe ʻae māʻoniʻoni pea mo e angahala, ko ia, ʻe ʻalu atu ai ʻae heletā mei hono ʻaiʻanga, ki he kakano kotoa pē, mei he feituʻu tonga ʻo aʻu ki he tokelau:
5 Koeʻuhi ke ʻilo ʻe he kakano kotoa pē, ko au, Sihova, kuo u unuhi ʻeku heletā mei hono ʻaiʻanga: pea ʻe ʻikai toe foki mai ia.” ’
6 “Ko ia ʻe foha ʻoe tangata, ke ke toʻetoʻe ʻi honau ʻao, ʻi he langa ho fatu pea mo e mamahi.
7 Pea ʻe pehē, ʻoka nau ka lea kiate koe, ‘Ko e hā ʻoku ke toʻe ai?’ Te ke tali, ʻo pehē, ‘Koeʻuhi ko e ongoongo; koeʻuhi ʻoku haʻu ia: pea ʻe molū ʻae loto kotoa pē, pea ʻe vaivai ʻae nima kotoa pē, pea ʻe pongia ʻae laumālie kotoa pē, pea ʻe hangē ko e vai ʻae tui kotoa pē: vakai, ʻoku haʻu ia, pea ʻe fakahoko ia,” ʻoku pehē ʻe Sihova ko e ʻOtua.’ ”
8 ¶ Pea naʻe toe hoko mai kiate au ʻae folofola ʻa Sihova, ʻo pehē,
9 “Foha ʻoe tangata, kikite, pea ke pehē, ‘ʻOku pehē ʻe Sihova; Lea,
“ko e heletā, ko e heletā,
kuo fakamāsila,
pea kuo fakangingila ia foki:
10 Kuo fakamāsila ia ke tāmate fakamanavahē; kuo fakangingila ia koeʻuhi ke ulo; pea ʻoku taau ai ia koā mo ʻetau fakavā? ʻOku taʻemamae ia ki he tokotoko ʻa hoku foha ʻo hangē ko e ʻakau kehe kotoa pē.
11 Pea kuo ne ʻatu ia ke fakangingila,
koeʻuhi ke ngāue aki:
kuo fakamāsila mo fakangingila ʻae heletā ni
koeʻuhi ke ʻai ia ki he nima ʻoe tangata tāmate.” ’
12 Tangi mo ʻioho, ʻe foha ʻoe tangata:
koeʻuhi ʻe hoko ia ki hoku kakai,
ʻe hoko ia ki he houʻeiki kotoa pē ʻo ʻIsileli:
ʻe tō ʻae manavahē ki hoku kakai,
ko e meʻa ʻi he heletā: ko ia ke ke si tenga.
13 “Koeʻuhi ko e meʻa ʻahiʻahi ia; pea ko e hā ʻoka taʻemamae ʻae heletā ki he tokotoko?” ʻoku pehē ʻe Sihova ko e ʻOtua, “ʻe ʻikai toe ʻi ai ia.
14 “Ko ia foki, ʻe foha ʻoe tangata, kikite,
pea pasi ho nima,
pea tuku ke foki mai ʻae heletā ko hono liunga tolu,
ʻae heletā ʻoe tāmate:
ko e heletā ia ʻoe kau tau kuo tāmateʻi,
ko ia ia ʻoku hū atu ki honau ngaahi potu fale fakalilolilo.
15 Kuo u ʻai ʻae muʻa heletā ki honau ngaahi matapā,
koeʻuhi ke vaivai ai honau loto,
pea fakalahi ai honau maumauʻi:
ʻOiauē! Kuo fakangingila,
pea kuo fakamata ia ki he tāmate.
16 ʻAlu atu pe koe, ʻi ha hala,
ki he nima toʻomataʻu,
pe ki he toʻohema,
ha potu pe ʻoku fakahanga ki ai ho mata.
17 Te u pasi tataha ʻeau, hoku nima;
pea te u fakahoko kiate koe ʻa hoku tuputāmaki:
Ko au Sihova, kuo u lea ʻaki eni.”
18 ¶ Naʻe toe hoko foki kiate au ʻae folofola ʻa Sihova, ʻo pehē,
19 “Ko eni foki, ʻe foha ʻoe tangata, tuʻutuʻuni ʻe koe ʻae hala ʻe ua, koeʻuhi ke haʻu ai ʻae heletā ʻoe tuʻi ʻo Papilone; ʻe ʻalu atu fakatouʻosi mei he fonua pe taha: pea ke fili ʻe koe ha potu, fili ia ʻi he tefito hala ʻaia ʻoku fakatau ki he kolo.
20 Tuʻutuʻuni ha hala, koeʻuhi ke haʻu ai ʻae heletā ki Lapata ʻoe kau ʻAmoni, pea ki Siuta ʻi Selūsalema ʻaia kuo ʻāʻi.
21 He naʻe tuʻu ʻae tuʻi ʻo Papilone ʻi he mangaʻi hala, ʻi he tefito ʻoe hala ʻe ua, ke talotalo: naʻa ne ngaohi ʻae ngahau ngingila, naʻa ne fakaongo ki he tamapua, pea naʻa ne sio ki he ʻate.
22 Naʻe ʻi hono nima toʻomataʻu ʻae talotalo koeʻuhi ko Selūsalema, ke fokotuʻu ʻae ngaahi ʻeikitau, ke fakamanga ʻae ngutu ʻi he tāmate, ke hiki hake ʻae leʻo ʻo kalanga, ke fokotuʻu ki hono ngaahi matapā ʻae ʻuluʻi sipi, ke tanu puke, pea ke langa ʻae kolo.
23 Pea ʻe hangē ia kiate kinautolu ʻoku taʻaloʻalo loi, ʻi honau ʻao, kiate kinautolu kuo fai ʻae fuakava; ka te ne fakamanatuʻi ʻae angahala ka nau moʻua.
24 “Ko ia ʻoku pehē ʻe Sihova ko e ʻOtua; Koeʻuhi kuo mou fai ke manatuʻi ʻa hoʻomou hia, ko e meʻa ʻi he hā mai ʻa hoʻomou fai kovi, ko ia kuo ha hoʻo angahala ʻi he meʻa kotoa pē ʻoku ke fai; koeʻuhi, kuo manatuʻi ʻakimoutolu, ko ia ʻe puke nima ai ʻakimoutolu.
25 ¶ “ ‘Pea ko koe, ʻae ʻeiki fakalielia mo angahala ʻi ʻIsileli, ʻaia kuo hoko hono ʻaho, ʻoka kakato ʻae fai angahala,
26 ʻOku pehē ʻe Sihova ko e ʻOtua; “Toʻo ʻae pale, pea toʻo ʻo ʻave mo e tatā fakatuʻi: ʻe ʻikai kei pehē ni; ka ʻe hakeakiʻi ia ʻaia ʻoku māʻulalo, pea fakatōkilalo ʻaia ʻoku māʻolunga.
27 Te u fulihi, fulihi, fulihi ia: pea ʻe ʻikai kei ʻi ai ia, kaeʻoua ke hoko mai ia ʻaia ʻoku totonu ke ne maʻu; pea te u foaki ia kiate ia.” ’
28 ¶ “Pea ko koe, Foha ʻoe tangata, kikite pea ke pehē, ‘ʻOku pehē ʻe Sihova ko e ʻOtua, ko e meʻa ki he kau ʻAmoni, pea ʻoku kau ki honau manukiʻi; ʻio, ke ke pehē ʻe koe,
‘Ko e heletā, ko e heletā kuo unuhi;
kuo fakangingila ia ki ho tāmateʻi,
he fakaʻauha ʻi heʻene ulo:
29 Lolotonga pe ʻoku nau kikite vaʻinga kiate koe,
mo nau talotalo loi kiate koe,
koeʻuhi ke ʻomi koe ki he kia ʻonautolu kuo tāmateʻi, ʻae angahala,
ʻakinautolu kuo hokosia honau ʻaho ʻoka kakato ʻenau angahala.
30 He te u fakafoki ia ki hono ʻaiʻanga?
Te u fakamaauʻi koe ʻi he potu naʻe ngaohi ai koe,
ʻi he fonua naʻa ke fanauʻi ai.
31 Pea te u lilingi atu hoku houhau kiate koe,
te u ifi koe ʻi he kakaha ʻo hoku houhau,
pea te u tukuange koe ki he nima ʻoe kakai fai kakaha mo poto,
ke fakaʻauha koe.
32 Te ke hoko koe ko e fefie ki he afi;
ʻe ʻi he lotolotonga ʻoe fonua ho toto;
pea ʻe ʻikai ʻaupito toe manatuʻi koe:
he ko au ko Sihova, kuo u lea ki ai.” ’ ”