52
1 ʻOku fakalotoʻi ʻe Kalaisi ʻae siasi ke tui ki hono huhuʻi lahi. 7 Ke maʻu ʻae kau faifekau ʻo ia. 9 Ke fiefia ʻi hono mālohi ʻo ia, 11 Pea ke fakahaofi ʻakinautolu mei he fakapōpula. 13 ʻE hakeakiʻi ʻae puleʻanga ʻo Kalaisi.
Ke ke ʻā, ke ke ʻā; ʻai ho mālohi, ʻE Saione;
ʻai ho ngaahi kofu matamatalelei, ʻE Selūsalema, ʻae kolo māʻoniʻoni:
koeʻuhi ʻe ʻikai toe hū kiate koe ʻae taʻekamu mo e taʻemaʻa.
Tupeʻi koe mei he efu;
tuʻu hake, pea nofo hifo, ʻE Selūsalema:
vete koe mei he ngaahi haʻi ʻo ho kia, ʻE ʻofefine pōpula ʻo Saione.
He ʻoku pehē ʻe Sihova, “Kuo mou fakatau ʻakimoutolu taʻehatotongi;
pea ʻe huhuʻi ʻakimoutolu taʻehapaʻanga.
 
He ʻoku pehē ʻe he ʻEiki ko Sihova,
“Naʻe ʻalu hifo ʻi muʻa ʻa hoku kakai ki ʻIsipite ke nofo ai;
pea naʻe fakamālohiʻi taʻetotonu ʻakinautolu ʻe he kakai ʻAsilia.
 
“Pea ko eni,” ʻoku pehē ʻe Sihova, “Ko e hā ʻoku ou maʻu ni,
koeʻuhi ʻoku ʻave taʻehanoʻuhinga ʻa hoku kakai?
Ko kinautolu ʻoku pule kiate kinautolu ʻoku nau fakaioho mamahi ʻakinautolu, ʻoku pehē ʻe Sihova,
pea ʻoku kapea maʻu pe ʻi he ʻaho kotoa pē ʻa hoku huafa.
Ko ia ʻe ʻilo ai ʻa hoku huafa ʻe hoku kakai:
Pea te nau ʻilo ʻi he ʻaho ko ia, Ko au ia ʻoku folofola.
“Vakai, ko au ia.
 
Hono ʻikai fakaʻofoʻofa ʻi he ngaahi moʻunga ʻae vaʻe ʻo ia ʻoku ʻomi ʻae ongoongolelei,
ʻaia ʻoku fakahā ʻae melino;
ʻaia ʻoku ʻomi ʻae ongoongolelei ʻoe lelei,
mo ne fakahā ʻae fakamoʻui;
ʻaia ʻoku pehē ki Saione, “ʻOku pule ʻa ho ʻOtua!”
‌ʻE hiki hake ʻae leʻo ʻo ho kau tangata leʻo;
pea ʻe fakataha honau leʻo ʻonau hiva:
he te nau mamata ko e mata ki he mata, ʻoka toe ʻomi ʻe Sihova ʻa Saione.
Ke hā mai ʻi he fiefia,
hiva fakataha, ʻakimoutolu ʻae ngaahi potu lala ʻo Selūsalema,
he kuo fakafiemālieʻi ʻe Sihova ʻa hono kakai,
kuo ne huhuʻi ʻa Selūsalema.
10 Kuo fakahā ʻe Sihova ʻa hono nima ʻi he ʻao ʻoe ngaahi puleʻanga kotoa pē;
pea ʻe mamata ʻe he ngaahi ngataʻanga kotoa pē ʻo māmani ʻae fakamoʻui ʻa hotau ʻOtua.
 
11 ‌ʻAlu ʻakimoutolu, ʻalu ʻakimoutolu, mou ʻalu atu mei ai, ʻoua ʻe ala ki ha meʻa taʻemaʻa;
ʻalu ʻakimoutolu mei he lotolotonga ʻo ia;
ke maʻa ʻakimoutolu ʻoku mou fua ʻae ngaahi ipu ʻa Sihova.
12 Koeʻuhi ʻe ʻikai te mou ʻalu atu fakavave,
pe ʻalu ʻi he hola:
he ko Sihova ʻe muʻomuʻa ʻiate kimoutolu;
pea ko e ʻOtua ʻo ʻIsileli ʻe muimui ʻiate kimoutolu.
 
13 Vakai, ʻe fai fakapotopoto ʻa ʻeku tamaioʻeiki,
ʻe hakeakiʻi ia pea fakaongolelei,
pea te ne māʻolunga ʻaupito.
14 ‌ʻO hangē naʻe ofo ʻae tokolahi kiate ia,
he liliu ʻo kovi hono fofonga ʻo lahi hake ʻi he tangata kotoa pē, mo hono sino ʻo lahi hake ʻi he ngaahi foha ʻoe tangata.
15 Ko ia te ne taufuʻi ʻae ngaahi puleʻanga lahi;
ʻe tāpuni ʻe he ngaahi tuʻi honau fofonga kiate ia:
he ko ia naʻe ʻikai fakahā kiate kinautolu te nau mamata ki ai;
pea ko ia naʻe ʻikai te nau fanongo ki ai te nau tokangaʻi.