13
1 ʻOku valokiʻi ʻe Siope ʻa hono ngaahi kāinga ʻi heʻenau taʻefaitotonu. 14 ʻOku ne fakahā ʻene falala ki he ʻOtua. 20 Ko e kole ke ne ʻilo ʻene hia ʻaʻana, pea ko e hā ʻae finangalo ʻoe ʻOtua ʻi heʻene fakamamahi ia.
Vakai, kuo mamata ʻe hoku mata ʻa eni kotoa pē,
kuo fanongo pea ʻilo ia ʻe hoku telinga.
Ko ia ʻoku mou ʻilo, ʻoku ou ʻilo foki ia:
ʻoku ʻikai te u siʻi hifo au ʻiate kimoutolu.
 
“ʻAmusiaange ʻeau ke u lea ki he Māfimafi,
pea ʻoku ou fie alea mo e ʻOtua.
Ka ko e kau fakatupu loi ʻakimoutolu,
ko e kau faitoʻo taʻeʻaonga ʻakimoutolu kotoa pē.
Taumaiā ke mou mātuʻaki longo pē!
Pea ko hoʻomou poto ia.
Fanongo eni ki heʻeku fakamatala,
pea fakafanongo ki he ngaahi lea ʻa hoku loungutu.
He te mou lea kovi maʻae ʻOtua?
Pea lea fakakākā maʻana?
He te mou lavaʻi ia?
Te mou fakakikihi maʻae ʻOtua?
‌ʻE lelei ke ne ʻekea ʻakimoutolu?
Pe te mou kākaaʻi ia, ʻo hangē ko e kākaaʻi ʻe he tangata ʻe taha ʻae tokotaha?
10 Ko e moʻoni ʻe valoki ʻe ia ʻakimoutolu,
ʻo kapau te mou filifilimānako fufū pe ʻae kakai.
11 ‌ʻE ʻikai fakamanavahēʻi ʻakimoutolu ʻe heʻene ʻafio?
Pea tō kiate kimoutolu ʻene fakailifia?
12 Ko hoʻomou ngaahi lea fakamanatu ʻoku tatau mo e efuefu,
ko e fokotuʻu na ʻo hoʻomou ngaahi lea, ʻoku tatau mo e ngaahi ʻesi ʻumea.
 
13 “Tuku hoʻomou lau, pea tuku ai pe au, koeʻuhi, ke u lea,
kae hoko kiate au ʻaia ʻe hoko.
14 Ko e hā ʻoku ou ʻūtaki ai hoku kakano,
pea ʻai ʻeku moʻui ki hoku nima?
15 Neongo ʻene tāmateʻi au,
te u falala pe kiate ia:
ka te u fakamatala hoku ngaahi hala ʻi hono ʻao.
16 ‌ʻE fakamoʻui au foki ʻe ia:
ka ʻe ʻikai ha mālualoi ʻe haʻu ki hono ʻao.
17 Fanongo lelei ki heʻeku lea,
fanongo ʻaki homou telinga ʻa ʻeku fakamatala.
18 Vakai eni, kuo u teu ʻeku fakamatala;
ʻoku ou ʻilo ʻe fakatonuhiaʻi au.
19 Ko hai ia te ne talatalaakiʻi au?
He ko eni, kapau te u fakalongo pe, te u mate.
 
20 “Ko e meʻa ʻe ua pe, ke ʻoua naʻa fai kiate au:
ko ia ʻe ʻikai ai te u fufū au ʻiate koe.
21 Ke toʻo atu ke mamaʻo ho nima ʻiate au:
pea ʻoua naʻaku puputuʻu ʻi hoʻo fakailifia.
22 Pea ke toki folofola mai, pea te u talia;
pea te u lea atu, ka ke talia au.
23 ‌ʻOku fiha ʻeku ngaahi hia mo ʻeku angahala?
Fakaʻilo mai kiate au ʻeku talangataʻa mo ʻeku angahala.
24 Ko e hā ʻoku ke fufū ai ho fofonga,
mo ke lau au ko ho fili?
25 He te ke pakiʻi ʻae louʻakau kuo feʻaveʻaki?
Pea te ke tuli ʻe koe ʻae mohuku mōmoa?
26 He ʻoku ke tohi ʻae ngaahi meʻa fakamamahi kiate au,
pea ʻoku ke fakahoko kiate au ʻae ngaahi hia ʻo ʻeku kei siʻi.
27 ‌ʻOku ke ʻai hoku vaʻe ki he ʻakau fakamaʻu vaʻe,
pea ke vakai pau hoku ʻalunga kotoa pē;
ʻoku ke ʻai ʻae fakaʻilonga ki hoku muivaʻe.
28 Pea ʻoku fakaʻaʻau ia ʻo hangē ha meʻa popo,
pea tatau mo e kofu kuo kai ʻe he ane.