5
1 Ko e hiva ʻa Tepola mo Pelaki.
1 Pea naʻe toki hiva ai ʻa Tepola mo Pelaki ko e foha ʻo ʻApinoami ʻi he ʻaho ko ia, ʻo pehē,
2 “Mou fakafetaʻi kia Sihova ʻi he langomakiʻi ʻo ʻIsileli,
ʻi he ʻatu fiemālie pe ʻakinautolu ʻe he kakai.
3 Mou fanongo, ʻae ngaahi tuʻi;
fakafanongo, ʻakimoutolu ʻae ngaahi houʻeiki;
ko au, ʻio, ko au, te u hiva kia Sihova;
te u hiva fakafetaʻi kia Sihova ko e ʻOtua ʻo ʻIsileli.
4 “ʻE Sihova ʻi hoʻo hāʻele atu mei Seia,
ʻi hoʻo hāʻele mei he ngoue ʻo ʻItomi,
naʻe tetetete ʻa māmani, pea naʻe tō ʻae ngaahi langi.
Naʻe tō foki ʻae vai mei he ngaahi ʻao.
5 Naʻe vela ʻo vai ʻae ngaahi moʻunga mei he ʻao ʻo Sihova,
naʻa mo Sainai naʻe pehē mei he ʻao ʻo Sihova ko e ʻOtua ʻo ʻIsileli.
6 “ʻI he ngaahi ʻaho ʻo Samikaʻa ko e foha ʻo ʻAnati,
ʻi he ngaahi ʻaho ʻo Saeli, naʻe lala ʻae ngaahi hala motuʻa,
pea naʻe ʻalu ʻae kakai fononga ʻi he ngaahi hala piko.
7 Naʻe ngaongao ʻae ngaahi potu kakai,
naʻa nau ʻosiʻosi ʻi ʻIsileli, ʻo aʻu ki heʻeku tuʻu hake au ko Tepola,
pea u tuʻu hake ko e faʻē ʻi ʻIsileli.
8 Naʻa nau fili ʻae ngaahi ʻotua foʻou,
pea naʻe toki hoko ʻa ʻetau ʻi he ngaahi matapā:
he naʻe hā mai ha fakaū pe ha foʻi tao ʻe taha ʻi he toko fā mano ʻi ʻIsileli?
9 ʻOku hanga atu hoku loto ki he kau pule ʻi ʻIsileli,
ʻaia naʻe ʻatu fiemālie pe ʻakinautolu kia Sihova fakataha mo e kakai.
Mou fakafetaʻi kia Sihova.
10 “ʻAkimoutolu ʻoku heka ʻi he ngaahi ʻasi hina, mou tokanga,
ʻakimoutolu ʻoku nofo ʻi he fakamaau,
pea ko kimoutolu foki ʻoku fononga ʻi he hala;
11 ʻI he tuku ʻae longoaʻa ʻoe kau tangata fana ʻi he ngaahi potu ʻoe fusi hake ʻoe ʻutu vai, tenau fakahā ʻi ai ʻae ngaahi ngāue māʻoniʻoni ʻa Sihova, ʻio, ʻae ngaahi ngāue māʻoniʻoni ki hono ngaahi potu kakai ʻi ʻIsileli: pea ʻe toki ʻalu hifo ʻae kakai ʻa Sihova ki he ngaahi matapā.
12 Ke ke ʻā hake, ʻā hake, ʻe Tepola: ʻā hake, ʻā hake, fai ʻae hiva: tuʻu hake, ʻe Pelaki, pea tataki fakapōpula ʻa hoʻo pōpula, ʻa koe ko e foha ʻo ʻApinoami.
13 Naʻa ne ngaohi ai ʻaia naʻe toe ke pule ia ki he houʻeiki ʻi he kakai: naʻe fakanofo au ʻe Sihova ke u pule ki he kau mālohi.
14 Naʻe ai ʻae aka ʻokinautolu mei ʻIfalemi naʻe tuʻu hake ki ʻAmaleki; ko Penisimani naʻe muimui ʻiate koe, mei hoʻo kakai: naʻe ʻalu hifo mei Mekili ʻae kau pule, pea mei Sepuloni ʻakinautolu ʻoku ala ki he peni ʻae tangata tohi.
15 Pea naʻe ʻia Tepola ʻae houʻeiki ʻo ʻIsaka; ʻio, ʻa ʻIsaka mo Pelaki foki: naʻe fekau ia ʻi hono vaʻe ki he teleʻa. ʻI he ngaahi mavahevahe ʻa Lupeni naʻe ʻi ai ʻae ngaahi fifili lahi ʻoe loto.
16 Ko e hā naʻa ke nofo ai ʻi he ngaahi ā sipi, ke fanongo ki he tangi ʻae fanga sipi? ʻI he ngaahi mavahevahe ʻa Lupeni naʻe ʻi ai ʻae ngaahi fifili lahi ʻoe loto.
17 Naʻe nofo ʻa Kiliati ʻituʻa Sioatani,
pea ko e hā naʻe nofo ai ʻa Tani ʻi he ngaahi vaka?
Naʻe nofo pe ʻa ʻAseli ʻi he matātahi,
pea nofo pe ia ʻi he ngaahi kolo.
18 Ko e kakai ʻo Sepulone mo Nafitalai naʻe siʻaki ʻenau moʻui ki he mate,
ʻi he ngaahi potu fonua māʻolunga.
19 “Naʻe haʻu ʻa e ngaahi tuʻi ʻo tau,
pea tau ai ʻae ngaahi tuʻi ʻo Kenani ʻi Tenaki ʻo ofi ki he vai ko Mekito;
naʻe ʻikai tenau toʻo ha paʻanga totongi.
20 Naʻa nau tau mei langi;
ko e ngaahi fetuʻu ʻi honau ngaahi ʻaluʻanga naʻa nau tauʻi ʻa Sisela.
21 Naʻe ʻauhia ʻakinautolu ke mole ʻi he vaitafe ko Kisone,
ʻae vaitafe muʻa ko ia,
ʻae vaitafe ko Kisone.
ʻE hoku laumālie, kuo ke malakaki hifo ʻae mālohi.
22 Naʻe toki maumau ʻae ngaahi ʻaofivaʻe ʻoe fanga hoosi ko e meʻa ʻi he lele vave,
ko e lele vave ʻae ngaahi manu mālohi.
23 ‘Mou fakamalaʻiaʻi ʻa Melosi,’ ʻoku pehē ʻe he ʻāngelo ʻa Sihova,
‘Mou fakamamahi ʻae kakai ʻo ia;
koeʻuhi naʻe ʻikai te nau haʻu ke tokoni ʻa Sihova,
ke tokoni ʻa Sihova ʻo tuʻu hake ki he mālohi.’
24 “ʻE monūʻia lahi taha ʻi he kau fefine ʻa Saeli,
ko e uaifi ʻo Hepa ko e Kena,
ʻe monūʻia lahi taha pe ia ʻi he kau fefine ʻi he fale fehikitaki.
25 Naʻe kole ʻe ia ʻae vai,
pea ne ʻange ʻe ia ʻae huʻahuhu;
naʻa ne ʻomi ʻae pota ʻi he ipu ngalingali ʻeiki.
26 Naʻe mafao ʻe ia hono nima ki he faʻo,
mo hono nima toʻomataʻu ki he hamala ʻae tufunga;
pea ne taaʻi ʻaki ʻa Sisela ʻae hamala,
naʻa ne tā ʻaki ia hono ʻulu,
ʻi heʻene tui ke ʻasi hono manifinifihanga.
27 Naʻe punou hifo ia ʻi hono vaʻe, naʻa ne tō hifo, pea tokoto hifo:
naʻe punou hifo ia ʻi hono vaʻe, pea tō hifo:
ʻi he potu naʻa ne punou hifo, naʻe tō ai ia ʻo mate.
28 “Naʻe fakasiosio ʻe he faʻē ʻa Sisela ʻi he matapā sioʻata,
pea kalanga ia mei he tupa,
“Ko e hā ʻoku tuai pehē ai hono saliote ʻi heʻene haʻu?
Ko e hā ʻoku tatali ai ʻae ngaahi meʻa teka ʻo ʻene saliote?’
29 Naʻe tali ia ʻe heʻene kau fefineʻeiki poto,
ʻio, naʻe tali ʻe ia ia ʻa ʻene lea,
30 ‘ʻIkai kuo nau lavaʻi? ʻIkai kuo nau vahevahe ʻae vete?
Ko e taʻahine ʻe tokotaha pe toko ua ki he tangata taki taha kotoa pē;
ko e koloa maʻa Sisela ko e meʻa lanu kehekehe,
ʻae meʻa lanu kehekehe ʻoe ngāue tuitui,
ʻae meʻa lanu kehekehe ʻoe ngāue tuitui fakapotu ua, ʻo ngali mo e kia ʻokinautolu ʻoku maʻu ʻae vete?’
31 “Ke ʻauha pehē pe ʻa ho ngaahi fili kotoa pē ʻe Sihova: ka ke tatau ʻakinautolu ʻoku ʻofa kiate ia mo e laʻā ʻi heʻene ʻalu hake ʻi hono mālohi.”
Pea naʻe fiemālie ʻae fonua ʻi he taʻu ʻe fāngofulu.