63
1 Ko e holi ʻa Tevita ki he ʻOtua. 5 Ko e anga ʻo ʻene fakafetaʻi ki he ʻOtua. 9 Ko ʻene ʻamanaki ki he malaʻia ʻa hono ngaahi fili, kae moʻui pe ia.
Ko e Saame ʻa Tevita, ʻi heʻene ʻi he toafa ʻo Siuta.
‌ʻE ʻOtua, ko hoku ʻOtua koe;
te u kumi vave kiate koe:
ʻoku fieinu hoku laumālie kiate koe,
ʻoku holi hoku kakano kiate koe ʻi he fonua mōmoa mo fieinua, ʻaia ʻoku ʻikai ha vai ʻi ai;
Ke mamata ki hoʻo māfimafi mo ho nāunau,
ʻo hangē ko ʻeku mamata ai kiate koe ʻi he faletapu.
‌ʻOku lelei lahi hake ʻa hoʻo ʻaloʻofa ʻi he moʻui,
ko ia ʻe fakafetaʻi ai ʻa hoku loungutu kiate koe.
Ko ia ʻe pehē pe ʻeku fakafetaʻi kiate koe lolotonga ʻeku moʻui:
te u hiki hake hoku nima ʻi ho huafa.
‌ʻE mākona lelei hoku laumālie ʻo hangē ko e meʻa ʻi he ngako mo e meʻa momona;
pea ʻe fakafetaʻi kiate koe ʻa hoku ngutu ʻi he loungutu fiefia.
‌ʻI heʻeku manatu kiate koe ʻi hoku mohenga,
ʻo fakalaulauloto kiate koe ʻi he ngaahi lakanga leʻo ʻi he poʻuli.
Ko e meʻa ʻi hoʻo faʻa tokoni au,
ko ia te u fiefia ai ʻi he malu ʻo ho kapakau.
‌ʻOku pikitai maʻu pē hoku laumālie kiate koe:
ʻoku poupou au ʻe ho nima toʻomataʻu.
Ka ko kinautolu ʻoku kumi hoku laumālie ke fakaʻauha ia,
tenau ʻalu hifo ki he ngaahi potu ʻi lalo ʻi he fonua.
10 Tenau tō ʻi he heletā:
tenau hoko ko e ʻinasi ʻoe fanga fokisi.
11 Ka ʻe fiefia ʻae tuʻi ʻi he ʻOtua;
ko ia kotoa pē ʻoku fuakava ʻiate ia ʻe fiefia ia;
ka ʻe tāpuni ʻae ngutu ʻokinautolu kotoa pē ʻoku lea loi.