Song 100
Song bilong litimapim nem bilong God
Dispela song em song bilong tenkyu long God.
Yupela ol manmeri
bilong olgeta hap graun,
yupela i mas singim song
bilong amamas long God.
Yupela i mas belgut long Bikpela
na lotu long em.
Yupela singim song bilong amamas
na go klostu long em.
Yupela + i no ken tingting lus
long Bikpela,
em wanpela tasol i God tru.
Em wanpela tasol i bin wokim yumi,
olsem na yumi bilong em yet.
Yumi manmeri bilong en,
yumi olsem ol sipsip bilong en.
 
Yumi mas i go insait
long haus bilong en
na tenkyu long em
na litimapim nem bilong em.
Yumi tenkyu long em
na givim biknem long em.
Bikpela + i save mekim
gutpela pasin tasol.
Oltaim em i save laikim yumi tru.
Em i save bihainim
tok tru bilong em
oltaim oltaim.
+ 100:3 Sng 79.13, 95.7, Ese 34.30-31, Ef 2.10 + 100:5 1 Sto 16.34, 2 Sto 5.13, 7.3, Esr 3.11, Sng 106.1, 107.1, 118.1, 136.1, Jer 33.11