Song 140
Man i beten long God i was gut long em
Devit i raitim dispela song. Em i song bilong man i bosim musik.
1 Bikpela, yu ken helpim mi
bai ol man nogut
i no inap bagarapim mi.
Yu ken lukautim mi gut
bai ol man bilong pait
i no inap birua long mi.
2 Oltaim ol i save tingting
long mekim pasin nogut,
na oltaim ol i save kirapim kros
namel long ol manmeri.
3 Toktok bilong ol i sap tumas
olsem tit bilong snek,
na tok bilong bagarapim man
i pulap long maus bilong ol
olsem marasin bilong snek nogut.
4 Bikpela, yu mas lukautim mi gut
bai strong bilong ol man nogut
i no inap winim mi.
Banisim mi na ol man bilong pait
i tok long bagarapim mi,
bai ol i no inap mekim
wanpela samting long mi.
5 Ol bikhetman i putim umben i stap
bilong holimpas mi.
Dispela umben
ol i wokim long baklain
ol i taitim long rot bilong mi
bilong kisim mi olsem abus.
6 Mi tokim Bikpela olsem,
“Yu God bilong mi.”
Bikpela, helpim mi.
Harim singaut bilong mi.
7 Bikpela, God bilong mi,
yu strongpela man
bilong kisim bek mi.
Bipo, taim mipela i pait
long ol birua,
yu bin lukautim mi gut.
8 Bikpela, ol samting
ol man nogut i laik kisim,
em yu no ken givim long ol.
Yu no ken larim ol
i mekim pasin nogut
em ol i pasim tok long mekim.
9 Yu no ken larim ol birua bilong mi
i winim mi long pait.
Ol i tok kros bilong pinisim mi.
Tasol dispela samting
ol i laik mekim long mi,
yu ken mekim i kamap long ol yet.
10 Mobeta yu mekim paia
i pundaun antap long ol.
Na yu mas tromoi ol i go daun
long bikpela hul,
na bai ol i no inap
i kam antap gen.
11 Ol man i kotim nating
ol arapela man,
yu no ken larim ol i winim kot.
Na mi laik bai samting nogut
i mas kamap
long ol man bilong pait,
na pinisim ol tru.
12 Bikpela, mi save olsem
yu save helpim ol rabisman
na ol manmeri i sot
long ol samting,
taim ol man i mekim nogut
long ol.
13 Ol stretpela manmeri
bai i litimapim nem bilong yu,
na bai ol i stap wantaim yu oltaim.