Song 63
Prea bilong man i laik bai God i stap wantaim em
Devit i raitim dispela song long taim em i stap long distrik Juda long graun i no gat man.
1 God, yu God bilong mi.
Mi wok strong long painim yu.
Spirit bilong mi i laikim tumas
long i stap wantaim yu.
Bodi bilong mi i laikim tru
long i stap wantaim yu,
olsem man i stap long ples drai
i no gat wara long en
na i dai long wara.
2 Mi laik lukim yu long haus bilong yu
na mi laik yu soim mi
bikpela strong bilong yu
na namba bilong yu.
3 Laip bilong dispela graun i gutpela,
tasol marimari bilong yu
i nambawan tru.
Olsem na mi litimapim
nem bilong yu.
4 Bai mi tenkyu long yu
na litimapim nem bilong yu
inap mi dai.
Bai mi litimapim han bilong mi
na prea long yu.
5 Spirit bilong mi
em i stap gutpela tru,
olsem man i kaikai
ol gutpela kaikai,
na em i kaikai inap pinis.
Na mi amamas
na litimapim nem bilong yu.
6 Taim mi slip long bet
mi save tingting long yu.
Long nait mi save tingting
long yu tasol.
7 Long wanem,
yu bin helpim mi oltaim.
Mi stap klostu long yu,
olsem pikinini kakaruk
i stap aninit
long wing bilong mama,
na mi singim song bilong amamas.
8 Mi save wokabaut wantaim yu,
na yu save was gut long mi.
9 Na ol man i laik kilim mi i dai,
bai ol i go
long ples bilong ol man i dai pinis.
10 Bai ol i dai long pait,
na bai ol weldok
i kaikai bodi bilong ol.
11 Tasol mi king,
bai mi amamas long yu, God.
Ol man i mekim promis
long nem bilong yu
long ol bai i bihainim yu,
ol i ken amamas tru.
Tasol bai yu pasim maus
bilong ol man bilong giaman.