50
Saimon
1 Long taim em i stap hetpris, Saimon, pikinini bilong Onias, i bin stretim bek haus bilong Bikpela na em i mekim dispela haus i kamap gutpela gen.
2 Em i strongim ol bikpela banis bilong haus bilong God, na antap long ol dispela banis em i sanapim ol liklik taua.
3 Taim Saimon i stap, ol i brukim graun bilong wokim wanpela hul wara, na bikpela bilong en i olsem wanpela raunwara.
4 Na tu, em i wari planti long ol manmeri bilong em, nogut ol i bagarap. Na em i strongim ol banis bilong taun, nogut ol birua i kam insait.
5 Taim Saimon i lusim Rum Tambu Tru, em i luk smat moa, na ol manmeri i kam bungim em.
6 Em i luk olsem sta bilong moning i lait antap long skai, na olsem mun i kamap bikpela olgeta.
7 Em i olsem san i lait antap long haus bilong Bikpela, na olsem renbo i kamap naispela tru namel long ol waitpela klaut.
8 Saimon i luk olsem naispela plaua i kamap nupela, na olsem purpur i stap klostu long wara. Em i olsem nupela kru i kamap long ol diwai bilong maunten Lebanon.
9 Em i naispela olsem paia na smok i gat gutpela smel i stap antap long alta, na em i olsem wanpela kap ol i wokim long gol na ol i bilasim long ston i dia tumas.
10 Em i luk olsem diwai oliv i karim planti pikinini na olsem diwai saipres i sut i go antap long skai.
11 Saimon i putim ol naispela klos wantaim ol kain kain bilas bilong em, na taim em i go long alta bilong Bikpela, em i kamap naispela moa.
12 Em i kisim ol liklik ofa long han bilong ol pris, na em i sanap wantaim ol lain bilong em long ples bilong kukim ol abus. Em i luk olsem wanpela yangpela diwai sida bilong maunten Lebanon.
13 Em i sanap namel, na ol pris, em ol lain bilong Aron, ol i sanap raunim em olsem ol han bilong diwai pam. Ol i holim ol ofa bilong Bikpela long han bilong ol, na ol i sanap wantaim ol bilas bilong ol long ai bilong olgeta lain bilong Israel.
14 Taim Saimon i pinisim lotu long alta, em i redim ofa bilong Bikpela I Gat Olgeta Strong.
15 Em i kisim kap na i kapsaitim ofa bilong wain. Em i kapsaitim dispela ofa long as bilong alta, bai gutpela smel i kamap long Bikpela Antap, em King bilong olgeta samting.
16 Orait nau olgeta pikinini bilong Aron i singaut strong na ol i winim ol biugel bilong ol. Na ol i mekim traipela nois bai ol manmeri i ken tingim Bikpela Antap.
17 Na kwiktaim olgeta manmeri i pundaun pes i go daun long graun, na singsing bilong ol i krai naispela tru.
18 Na wanpela lain i kisim ol gita na i singsing amamas, na singsing bilong ol i krai naispela tru.
19 Na ol manmeri i singaut long Bikpela Antap Tru na ol i prea long ai bilong God bilong marimari inap long taim ol i pinisim lotu bilong ol.
20 Orait Saimon i kam daun na i litimapim han bilong em antap long olgeta lain bilong Israel. Em i amamas long kolim nem bilong God, na em i autim blesing bilong Bikpela.
21 Na ol manmeri i pundaun pes i go daun long graun namba 2 taim na ol i kisim blesing bilong Bikpela Antap.
Prea amamas long Bikpela
22 Orait nau yupela i tok amamas long God, em i Papa bilong olgeta manmeri. Oltaim em i save wokim ol bikpela samting. Em i save lukautim yumi long taim mama i karim yumi i kam inap nau, na em i save marimari na mekim gut long yumi.
23 Mi prea, bai Bikpela i ken mekim yumi i amamas. Na em i ken givim gutpela taim nau long ol Israel olsem em i bin mekim bipo.
24 Mi prea tu, bai em i ken marimari long yumi na em i ken rausim olgeta samting nogut long yumi.
Tripela lain pipel nogut
25 Mi no laikim tru tripela lain pipel, na wanpela bilong ol i rabis olgeta.
26 Narapela lain i stap long ples maunten bilong Seir, na narapela em ol lain Filistia. Na ol longlong lain tru i sindaun long hap bilong taun Sekem.
Las tok bilong Sirak
(Sapta 50.27—51.30)
27 Mi, Jisas Sirak, tumbuna pikinini bilong Eleasar, mi man bilong Jerusalem. Mi laik autim olgeta gutpela tingting bilong mi, olsem na mi bin raitim dispela buk bilong givim skul na save na gutpela tingting long ol manmeri.
28 Ol manmeri i tingim gut ol dispela tok, ol bai i kisim gutpela save.
29 Na sapos ol i bihainim ol dispela tok, ol bai i gat strong bilong mekim olgeta wok bilong ol. Long wanem, ol bai i wokabaut long lait bilong Bikpela.