Buk bilong Profet
Esekiel
Tok i go pas
Esekiel em i wanpela pris na profet i bin i stap long taim ol birua i bagarapim taun Jerusalem. Em i bin i stap wantaim ol lain manmeri ol birua i bin bringim i go kalabus long Babilon, na em i bin autim tok profet long tupela lain wantaim. Narapela lain em ol Juda i stap wantaim em long Babilon, na narapela lain em ol manmeri i stap yet long Jerusalem.
Long sampela hap Esekiel i givim strongpela tok lukaut olsem God bai i mekim save long ol lain Juda. Na long sampela hap em i tok olsem God bai i skelim pasin bilong ol lain manmeri i bin paulim ol Juda na em bai i givim hevi long ol dispela lain. Na long ol arapela hap tok, Esekiel i tok olsem God bai i mekim ol manmeri i stap bel isi. Em i tok long gutpela taim God bai i mekim i kamap bihain. Ol Israel bai i kirapim gen kantri bilong ol na bai i gat nupela haus bilong God.
Ol Juda i stap long Babilon ol i save tingting planti. Ol i no i stap moa long taun bilong God, na ol i stap longwe long haus bilong God. Olsem na ol i no klia, God i stap yet wantaim ol, o nogat? Esekiel i autim tok long ol bilong strongim bilip bilong ol na bilong soim ol olsem God i stap yet wantaim ol. Na em i mekim ol tok bilong kirapim ol wan wan man na meri long mekim gutpela pasin tasol.
Planti taim God i save givim tok long Esekiel long samting olsem driman, na Esekiel i save stori long ol dispela driman em i lukim. Sampela taim ol dispela tok bilong en i klia tru na yumi save amamas long harim, tasol sampela i no klia tumas na yumi save hatwok liklik long klia long as bilong tok.
God i givim wok profet long Esekiel
1
(Sapta 1-3)
Esekiel i lukim sia king bilong God
1 Mi Esekiel, mi stap wantaim ol Juda, klostu long wara Kebar, long kantri Babilon. Ol Babilon i bin kalabusim mipela na kisim mipela i kam long dispela hap. Na long de namba 5 bilong namba 4 mun bilong namba 30 yia, heven i op na mi lukim God long ol samting olsem driman.
2 Dispela samting i kamap long namba 5 yia bihain long taim ol Babilon i bin i go long Juda na pait na kisim King Jehoiakin long Jerusalem na bringim em i kam long kantri bilong ol.
3 Mi Esekiel, mi pikinini bilong pris Busi, mi stap long kantri Babilon, klostu long wara Kebar, na mi harim God i toktok long mi na mi pilim strong bilong God i kam long mi.
4 Mi lukluk i go antap na mi lukim bikpela win na klaut i kam long hap bilong not. Dispela klaut i lait strong moa yet olsem paia, na lait bilong klaut i sut i go nabaut. Namel long dispela paia i gat wanpela samting i lait tumas olsem bras.
5 Namel long dispela bikpela win na klaut mi lukim 4-pela samting olsem man. Bodi bilong ol i olsem bodi bilong man,
6 tasol olgeta wan wan i gat 4-pela pes na 4-pela wing.
7 Lek bilong ol i stretpela, na ol i gat kapa bilong pinga bilong lek i wankain olsem kapa bilong lek bilong bulmakau. Na lek bilong ol i lait moa yet olsem hap bras ol i bin polisim.
8 Na aninit long olgeta wing wan wan i gat han olsem han bilong man i stap. Na wing bilong ol i stap olsem.
9 Olgeta wan wan i opim tupela wing na arere bilong wing bilong wanpela wanpela i pas long wing bilong narapela narapela na ol i kamap olsem 4-pela sait bilong wanpela bokis. Na taim ol i laik go long wanpela hap, ol i stap olsem tasol na i go. Ol i no save tanim bodi bilong ol.
10 Olgeta wan wan i gat 4-pela kain pes. Pes long hap i kam i olsem pes bilong man, na pes long han sut i olsem pes bilong laion. Na pes long han kais i olsem pes bilong bulmakau, na pes long baksait i olsem pes bilong bikpela tarangau.
11 Em pasin bilong pes bilong ol. Olgeta i opim tupela wing, na arere bilong wing bilong wanpela wanpela i pas long arere bilong wing bilong narapela narapela. Na long arapela tupela wing bilong ol, ol i karamapim bodi bilong ol.
12 Olgeta wan wan i gat 4-pela pes i lukluk i go long ol 4-pela hap. Olsem na sapos ol i laik i go long wanpela hap, ol i no inap tanim pes bilong ol. Ol i go tasol.
13 Em pasin bilong ol dispela samting.
Mi lukim ol samting i lait olsem paia o bumbum na i go i kam namel long ol dispela 4-pela samting olsem man. Na paia i save kamap bikpela, na lait bilong klaut i save kamap long paia na i wok long sut i go nabaut.
14 Na ol dispela 4-pela samting olsem man i save go i kam hariap, olsem lait bilong klaut.
15 Mi wok long lukim ol dispela samting olsem man, na mi lukim olgeta wan wan i gat wanpela wil i sanap long graun klostu long lek bilong ol.
16 Olgeta dispela wil i wankain tasol na i lait moa yet olsem ol yelopela ston i dia tumas. Olgeta dispela wil wan wan i gat narapela wil i sanap i stap insait long ol na i lukluk i go long narapela hap.
17 Olsem bai ol wil i ken i go i kam long olgeta 4-pela hap.
18 Mi lukim ol dispela wil i traipela nogut tru na mi pret. Na ain long arere bilong olgeta wil wan wan i gat planti ai bilong lukluk i stap.
19 Taim ol dispela samting olsem man i go i kam, orait ol wil tu i save go i kam wantaim ol. Na sapos ol dispela samting i lusim graun na i go antap, orait ol wil tu i go antap.
20 Ol dispela samting i laik i go long wanem hap, orait ol i save go. Na ol wil tu i save go wantaim ol, long wanem, ol 4-pela samting i save bosim ol wil.
21 Sapos ol dispela samting i laik i go long wanpela hap, orait ol wil tu i go. Na sapos ol dispela samting i stap long wanpela hap, orait ol wil tu i sanap i stap. Na sapos ol dispela samting i kirap i go antap, orait bai ol wil tu i mekim olsem, long wanem, ol 4-pela samting i save bosim ol wil.
22 Na mi lukim wanpela samting olsem traipela dis ol i bin tanim na as bilong en i kam antap. Mi lukim dispela samting i lait tumas olsem gutpela glas na mi pret. Dispela samting i stap antap long ol dispela 4-pela samting olsem man.
23 Ol dispela 4-pela samting i stap aninit long dispela bikpela raunpela samting, na ol i opim tupela wing bilong ol. Na arere bilong wing bilong wanpela wanpela i pas long arere bilong wing bilong narapela narapela. Na ol i karamapim bodi bilong ol yet long arapela tupela wing bilong ol.
24-25 Long taim ol i flai mi harim wing bilong ol i pairap olsem pairap bilong biksi i bruk, na olsem nois bilong bikpela lain soldia i stap long kem. Na pairap bilong wing bilong ol i olsem singaut bilong God I Gat Olgeta Strong. Taim ol i sanap long wanpela hap ol i pasim wing bilong ol. Tasol nau i gat nois i kamap antap long dispela raunpela samting i stap antap long ol dispela 4-pela samting.
26 Antap long dispela raunpela samting i gat wanpela samting olsem sia king ol i wokim long blupela ston i dia tumas. Na wanpela samting olsem man i sindaun long dispela sia king.
27 Hap bodi antap bilong dispela man i lait olsem wanpela hap bras i stap insait long paia. Na hap bodi daunbilo i olsem paia i lait. Na bikpela lait i raunim em.
28 Na dispela lait i gat planti kala olsem renbo long skai. Dispela lait mi lukim, em i olsem bikpela lait i kam long God yet.