☰ 2 JON 1
Namba 2
Pas Jon i raitim
Tok i go pas
Wanpela hetman bilong sios i bin raitim dispela pas. Planti man i ting em i bin raitim pas i go long ol manmeri bilong wanpela sios. Em i laik bai ol i mas laikim tru ol arapela na ol i mas lukaut long ol man bilong giaman, em ol man bilong paulim tok bilong God.
Yumi mas holim strong tok tru bilong God
na lukaut long ol man i autim narapela kain tok
1
1 Mi + hetman bilong sios, mi raitim dispela pas long yu meri wantaim ol pikinini bilong yu.* God i bin makim yu bilong em yet, na mi tok tru tumas, mi laikim yupela tru. Na i no mi tasol. Nogat. Olgeta manmeri i save long tok tru, ol i laikim yupela tru. 2 Tok tru em i stap long yumi, na em bai i stap long yumi oltaim oltaim, olsem na mipela i save laikim yupela tru. 3 Long pasin bilong tok tru na long pasin bilong laikim tru ol arapela, God Papa wantaim Jisas Krais, em Pikinini bilong Papa, bai i mekim pasin bilong marimari na sori na bel isi i kamap strong long laip bilong yumi.
Yumi mas bihainim pasin bilong laikim tru ol arapela
4 Mi + amamas tru long harim tok long sampela pikinini bilong yu ol i save bihainim tok tru, olsem Papa i bin tok long yumi mas bihainim. 5 Tasol + meri, mi gat wanpela tok mi laik bai yu mas bihainim. Em i olsem, yumi wan wan i mas laikim tru ol arapela. I no olsem mi givim nupela lo long yu. Nogat. Bipo tru yumi kisim dispela lo. 6 Pasin + bilong laikim tru ol arapela, em i olsem. Yumi mas bihainim ol lo bilong God. Olsem na dispela lo bipo tru yupela i harim, em i olsem, yupela i mas bihainim pasin bilong laikim tru ol arapela.
Yumi mas holim strong tok bilong Krais
7 Harim.+ Planti man i laik giamanim yumi, ol i raun nabaut long graun. Ol i no bilip olsem, Jisas Krais em i bin kamap man.† Dispela kain man, em i man bilong giaman, na em i birua bilong Krais. 8 Olsem + na yupela i mas lukaut gut, nogut yupela i lusim ol samting yumi bin hatwok long kisim. Yupela i mas sanap strong, na bai yupela i kisim olgeta pe bilong yupela. 9 Sapos + wanpela man i no holim strong tok bilong Krais, na em i kalap i go long narapela tok, orait God i no i stap wantaim em. Tasol sapos wanpela man i holim strong tok bilong Krais, orait Papa wantaim Pikinini tupela i stap wantaim em. 10 Sapos + wanpela man i kam long yupela, na em i no bringim dispela kain tok i kam, orait yupela i no ken givim gude long em, na yupela i no ken kisim em i go long haus bilong yupela. 11 Man i givim gude long dispela kain man, em i helpim em long wok nogut bilong em.
Hetman i laik lukim ol
12 Inap + mi raitim planti tok moa long yupela, tasol mi no laik putim dispela tok long wanpela pas. Mi ting mi mas i kam lukim yupela, na bai yumi toktok wantaim na yumi amamas tru.
13 Ol pikinini bilong susa bilong yu, em dispela susa God i makim bilong em yet, ol i tok gude long yu.‡
+ 1:1 Jo 8.32, 1 Pi 5.1, 1 Jo 3.18, 3 Jo 1.1 * 1:1 Sampela man i ting dispela pas i go long wanpela meri tru. Na sampela i ting dispela “meri” em i wanpela sios, na ol pikinini bilong en, em ol manmeri bilong dispela sios. Sapos em i wanpela sios, orait dispela susa bilong en lain 13 i tok long en, em tu i wanpela sios. + 1:4 3 Jo 1.3 + 1:5 Jo 13.34, 15.12, 15.17, 1 Pi 4.8, 1 Jo 2.7-8, 3.11, 3.23 + 1:6 Jo 14.15, 14.21, 1 Jo 2.5, 2.24, 5.3 + 1:7 1 Jo 2.22, 4.1-3 † 1:7 Lukim tok i stap long 1 Jon 4.2. + 1:8 Mk 10.29-30, Ga 3.4, Hi 10.32, 10.35 + 1:9 1 Jo 2.23 + 1:10 Ef 5.11, 2 Te 3.6 + 1:12 Jo 17.13, 1 Jo 1.4, 3 Jo 1.13-14 ‡ 1:13 Lukim tok i stap long 2 Jon 1.1.
☰