Song 23
Bikpela em i wasman bilong mi
Devit i raitim dispela song.
1 Bikpela em i wasman
bilong mi.
Olsem na mi no inap sot
long wanpela samting.
2 Em i mekim mi i slip
long gutpela gras.
Na em i bringim mi i go
long ol liklik wara
na mi dring na mi malolo.
3 Em i givim mi nupela strong.
Na em i save bringim mi
long ol gutpela rot,
olsem em i tok bipo long mekim.
4 God, maski mi wokabaut
long ples nogut na bikpela tudak,
mi no ken pret
long samting nogut,
long wanem, yu stap wantaim mi.
Mi lukim yu i holim stik
ol wasman bilong sipsip
i save holim,
olsem na bel bilong mi i stap isi.
Mi no inap bagarap.
5 Yu redim gutpela kaikai bilong mi
long ples klia
na ol birua bilong mi
ol i lukim mi.
Yu kisim mi
i kam sindaun wantaim yu,
na yu lukautim mi gutpela tumas.
6 Bikpela, bai yu lukautim mi gut,
na olgeta de mi stap laip
bai yu marimari long mi.
Na bai mi stap oltaim oltaim
long haus bilong yu.