3
Pumatam lapanak yu jantu lay ixlak'anuy ma'atam ixmaka'
(Mt. 12:9-14; Lc. 6:6-11)
1 A'tam tanupalhi an Jesús an tan ixtata'ayxt'o'a an lapanakni, walh ancha ixtanun pumatam lapanak yu jantu lay ixlak'anuy ma'atam ixmaka'.
2 Chi mu akxni jantu ixtapatsakan wilhchan, an yu ixtaxkajiy an Jesús sawalhcha ixtalhist'ak'a li katapujuya kamajk'uch'uya an lapanak, para li katapu'alhtasulh.
3 Walh an Jesús juniy an lapanak:
―K'at'aycha, tan'ajnich'a k'at'ay.
4 Chi jalhisakmilhcha an ali'in an Jesús, jajuniy:
―¿Oxi li ka'ilhtukalh yu oxi tu'u akxni jantu tapatsakan wilhchan? ¿U ani wilhchan ixpu'ilhtuka yu jantu oxi? ¿Ani wilhchan layi akma'alhtaxtunilh jatsukunti, u akma'nilh?
Jantu xamati alhtaylh.
5 Pus talh'amancha jala'ts'in an Jesús chi lhita'oxila'alhiycha li yu'uncha jantu talhakapu'ani li kataja'a'tayjunulh, juniy an lapanak:
―K'alats'awalat'icha amimaka'.
Walh lats'awalalhcha, tamaj'oxilhcha.
6 Wachuncha tataxtulhcha an fariseojnin ta'alhcha lhilakchiwinin ali an herodianojnin tani katalhima'nilhcha an Jesús.
An ixpiktu lakxkan lhuw lapanakni tacha'alh
7 Walh an Jesús chi an ixt'alhtanan ta'alhcha ixpiktu an lakxkan, lhuw lapanakni tama'alh. Jamacha'an Galilea, chi Judea,
8 chi Jerusalén, chi Idumea, chi ixlitapiktutamcha an ayxkan Jordán, chi la ixtuntala'acho'ocha an la'acha'an Tiro, chi Sidón, lhuw lapanakni tala'cha'alh, mu ixta'asmat'acha li laj'ay tanlhuni ix'ilhtuy.
9 An ixt'alhtanan jajuniy li katamala'asijninilh la'atam barco, para li jantu katapa'asilh, mu wanajcha lhilhuwi ixjunkanta.
10 Ixluwchak'ani ixjak'uch'uta pero an ali'in yu wachu ixtata'an'ay ixtalakask'in wachu masi wa kaxta'aych'apachalhcha, wa ixtaputamacho'oycha.
11 An lapanakni yu ixtalakpach'apata makxkay'un akxni ixtala'ts'incha an Jesús ixtata'a'tso'ottaniycha chi p'ascha ixtachiwiniy, ixtanajun:
―Uxint'i isTs'alh Dios.
12 Pero yucha sawalhcha ixjalaj'aymayi para li jantu katanawlhi tichini yuchacha.
Jasakxtukan ixpumakawt'uyk'an yu talhichiwiniy ixchiwinti Dios
(Mt. 10:1-4; Lc. 6:12-16)
13 Xli'astan alhcha a'stitawk'a an Jesús, chi anchacha jat'asanichalh yu yuchacha jat'asaniputulh, pus tala'cha'alhcha.
14 Ixpumakawt'uychak'ani jasakxtulh yu katat'alhtanana chi kajamak'anacha kata'ana lhichiwinin ixchiwinti Dios.
15 Ja'ilhtulhcha li layi katatamakxtuya lakmakxkay'un:
16 An ixpumakawt'uyk'an chunchuniya ixjajunkan: Simón, yu wachu junikalh Pedro,
17 chi Jacobo, chi Juan, ists'alan tichi lapanak junkan Zebedeo, yu'uncha jalhimapa'a'ulh Boanerges, nawputun ists'alan xalapanak xkan,
18 chi Andrés, chi Felipe, chi Bartolomé, chi Mateo, chi Tomás, chi Jacobo, ists'alh Alfeo, chi Tadeo, chi Simón yu ma'partido Cananista,
19 chi Judascha Iscariote, yu an ma'axta'lhi Jesús.
Yu wa aya lhichiwiniy an ixtakuwin Dios
(Mt. 12:22-32; Lc. 11:14-23; 12:10)
Xli'astan ta'alhcha lakatam laka cha'a'.
20 Wanajcha lhilhuwi jumpalakalh, jantucha layi masi wa katitalakwaylhcha.
21 Akxni an ixt'alalhila'ts'inin Jesús tak'atsaalh, ta'alhcha puxkawnini an Jesús para li katalhi'alhcha, mu ixtalaknajun ma wa lokojlaycha.
22 Ixpulaknicha ch'a'a an xamaestrojnin lhamap'a'sin, yu ixtamintachalh Jerusalén ixtanajun:
―Xliyu lay jalhitamakxtuy an lakmakxkay'un mu yucha an Beelzebú xapay makxkay'uni t'atapatsay.
23 Pus jaxa'alalhi an Jesús, chi tsukulhcha jajuniya tacha laycha talhimacha'xay, jajuniy:
―¿Tasicha lay kalhitamakxtukana wa ix'akstucha an Satanasi?
24 Li la'atam lhich'alhkat wa lapu'aykan, yucha jantu a'tam oxi katitaylhi'alh,
25 chi lakatam laka cha'a, li wa siya yu'unchacha wachu tala'ajiy, katatalakt'ilhitawla'.
26 Chi mu li an Satanás wa ix'akstucha t'ala'aykan, jantu layi katitaylhi'alh, yucha ixputs'an'ancha.
27 Jantu xamati lay an tanunu la ixcha'a xamati lapanak yu k'ut'ilh, li jantu p'ulhnajcha ma'ch'imay chi xli'astan ka'alhawniyacha an ixtanlhun.
28 Klajunaw yu sawalh, watuchicha tala'alhin kamak'akxanikana an lapanak, wa tani lhichiwinintacha an Dios.
29 Pero watichicha yu wa aya lhichiwiniy an ixTakuwin Dios, jantu a'tam katimala'mixinikalh, yucha ixpujun'alhincha kajuna tach'in.
30 Chuncha jajunilh mu ixtajuniy li ma makxkay'uni ixlakpach'apata.
An ixnati Jesús chi an ixjat'ala'awnin
(Mt. 12:46-50; Lc. 8:19-21)
31 Akxni tacha'alhcha an ixnati Jesús chi an ixjat'ala'awnin an tan ixtanumalh, tamala'achalhcha pumatam li ka'alh t'asanini'.
32 Pus tacha an ixtala'acho'owilananilh, tajuniy:
―Ma tapuxkawyan an mijat'ala'awnin chi an minati.
33 Yucha ja'alhtaylh jajuniy:
―¿Tisiyuchacha kinati chi kijat'ala'awnini?
34 Pus sa'cha jala'ts'ini an ixtala'acho'owilananilh, jajuniy:
―Uxitnani tacha kinati chi tacha kijat'ala'awnin,
35 mu wa tichicha yu ilhtuyi tacha an najun Dios, yucha kint'ala'ajun, kijamatsan chi kinati.