7
Yu lay ma'ta'an'ajlay an lapanak
(Mt. 15:1-20)
1 An fariseojnin chi ali'in xamaestrojnin lhamap'a'sin, yu ixtamintachalh la'acha'an Jerusalén, tala'cha'alhcha an Jesús.
2 Walh tala'ts'ilhi li an ali'in ixt'alhtanan an Jesús jantu ixtama'ch'a'ayi ixtalakwajin, pus yu'uncha tanajun li jantu oxi chuncha.
3 (Mu yu'uncha chi an judiojnin jantu ixtawajini li jantu ixtala'ma'ch'a'ay, tacha ixtanajun an laktatanin.
4 Li ixtakitasp'it'acha tiankis, yu'uncha ixtala'ma'ch'a'apalaycha akxni tu'u kata'uya'. Atumpaj yu wachu sawalhcha ixtalhismanita ixta'ilhtuy, li ixtala'ch'a'ay an vaso, chi jarro, chi yu de tsasnat pala'oxin chi putamat.)
5 Pus talhisakmiycha an Jesús an fariseojnin chi an xamaestrojnin lhamap'a'sin, tajuniy:
―¿Tasu li amint'alhtanan jantu ta'ilhtuyi tacha an tanajun an laktatanincha? ¿Tawajini masi jantu tala'ma'ch'a'ayi?
6 Yucha jajuniy:
―¡Uxitnan wa layat'itcha! Ts'ajwi talhichiwinin an Isaías, an tan ts'o'muk'akanta la ixchiwinti Dios, tan najunta:
Ani lapanakni oxi kintalhichiwiniy,
pero la ixjalhunutk'an jantu ixlisawalh.
7 Wa la'a'ijcha oxi kintalhipast'ak'a,
mu yu'uncha tamasuyi yu wa ixjatapast'ak'atchak'an lapanakni.
8 Tamakajuni an ixlamap'a'sin Dios, wa yucha an ixjatapast'ak'atchak'an lapanakni p'as tach'a'o'ay: [an ixla'ch'a'aka vaso, chi jarro, chi tanlhuncha ali yu wanajcha chun.]
9 Jajumpalay:
―An ixlamap'a'sin Dios lhimap'axayatcha wa milhamap'a'sinchak'an.
10 An Moisés nawlh: “K'a'asmatnini yu junan minpay chi minati”, chi nawpalay: “Yu xkayaj juniya ixpay chi ixnati kaniya'”.
11 Walh uxitnan nawnat'iti li jantu tani lay masi jantu kata'a'tayjulh ixlakpaynink'an an lapanakni, yu tama'lhtask'iniy la'a'tayjun. Mu li yu ixtaxta'nilh ixlakpaynink'an wa Korbán (nawputun xta'ni'okantacha Dios).
12 Jant'uch'a jamak'awniyat'iti li kata'a'tayjulh ixlakpaynink'an.
13 An ixchiwinti Dios lhimap'axayatcha an wa mijatapast'ak'atchak'an, lhuwi yu ch'unch'a ilht'uyat'it.
14 Wachuncha jat'asani'olhi an Jesús an lapanakni, chi jajuniy:
―Akila'asmatniw chi k'alhimach'a'xat'it minchuxk'an.
15 Jantu yu an yu ukani lhkilikiy an lapanak. Yu kalhkilikin yucha an tacha kilhtaxtukan chiwinti. [
16 Li xamati lhit'ajun ixpa'asmatna, ka'asmatlhi.]
17 Tala'xtinulhcha an tan ts'anaks ixlakyakalh tanulhcha laka cha'a', pus an ixt'alhtanan talhisakmiycha tuchini nawputuncha.
18 Yucha jajuniy:
―¿Wach'u jant'u lhimach'a'xayat'it? ¿Jant'u k'ats'ayat'iti li chux an yu uy an lapanak jantu layi katimama'lhta'alhinilhcha?
19 Mu jantu li sna la ixjalhunuti tanuy, la ixpalakni tanuy, chi ixli'astan maj'ancho'oycha.
Yucha nawputulh an Jesús li chux an yu ukan si laj'oxi.
20 Wachu jajumpalay:
―Yucha an ixchiwinti an lapanakcha yu mama'lhta'alhiniy.
21 Mu la ixpulakni an ixjalhunutk'an lapanakni taxtuy an lakmakxkay jatapast'ak'at: chi yu talat'atamay yu jantu talat'at'ajun, yu wa aya talay, yu jama'ninin,
22 yu ja'alhawanan, yu sawalhcha a'sputni, yu jalhitama'chapunun, yu ja'o'xcho'onun, yu ayajk'atsay, yu xkayaj najun, yu lhita'ayay tu'u, chi yu jantu ja'asmatnan.
23 Chux ani yu jantu laj'oxi tanlhun ixpulakni an jalhunuti minachalh, yucha yu mama'lhta'alhiniy an lapanak.
Ixjakiklaka'inti t'aku jamacha'a Sirofenicia
(Mt. 15:21-28)
24 An Jesús taxtuchalhcha Galilea alhcha xalakaat'un Tiro chi xalakaat'un Sidón. Tanuchalhcha lakatam laka cha'a'. Jantu ixlakask'in li xamati kala'ts'ilh, pero jantu lay tats'e'lhi.
25 Mu tichi t'aku ixlit'ajun istsi, wa ixlakpach'apata makxkay'un. K'atsaalhi li ancha t'ajun an Jesús, pus la'cha'alh chi tatso'ottatawlhnilhcha la ixjach'aja'.
26 Tapayniniycha li kak'uch'unilhi an istsi'. An t'aku lhigriegojo ixchiwiniy chi jamacha'a Sirofenicia.
27 An Jesús juniy:
―Kachajcha p'ulhnaj tita'o'atsalh an jas'at'an, mu jantu oxi xajachalh li ajkama'osunilhcha yu ta'ut'ajun chi ajkamaka'anilhcha an x'oyun.
28 Pus an t'aku juniy:
―Chuni, Jamach'alhkat, pero an x'oyun ta'usak'a masi wa ixtach'e'echak'an an jas'at'an an ixtan'api mesa.
29 Pus akxni juniy an Jesús an t'aku:
―T'ach'a an na'un chunchacha sawalh, chaway k'ap'inch'icha, an makxkay'un makawlhcha amintsi'.
30 Akxni cha'ancho'olhcha la ixcha'a an t'aku, an makxkay'un jantucha tu'u ixlakpach'apata an istsi', chi sa'cha ixmalhi an la ixputamat.
An Jesús k'uch'ulh lapanak yu wa a'atapa ixjunita chi jantu lay ixchiwiniy
31 Taxtucho'ochalhcha xalakaat'un Tiro an Jesús, la'puslicha xalakaat'un Sidón, chi pula'pus'alhcha xalakaat'un Decápolis, chi cha'alhcha la xalakxkan Galilea.
32 Talhicha'anilh pumatam lapanak yu jantu lay ixja'asmatnan chi jantu lay oxi ixchiwiniy. Tatapayniniycha an Jesús li kak'uch'ulh.
33 Mu lhilhuw, pus mala'xtinulh, tan wa ix'akstucha lhi'alh, lak'akatutamaknulhcha chi lhilakapuch'apanilhcha ixchuj'uti an isima'at.
34 Chi tala'st'alhcha an Jesús an lakt'iyan, jama'aninilh, najun:
―¡Efata! ―nawputun: ¡K'alakt'a'a'at'umix'at'icha!
35 Walh watukan la'ta'a'atumix'alh chi ta'oxinilhcha an isima'at, oxicha chiwinilh.
36 ―Jant'u xamat'i k'a'unit'it ―jajuniy an Jesús. Pero masi li chuncha ixjajuniy palay ixtalaknajun.
37 Chi sawalhcha ixtalhi'a'niy, ixtalaknajun:
―Sawalh oxi tacha an ilhtulh, layi jak'uch'uy masi an yu wa laj'a'atapan chi an yu jantu lay tachiwiniy.