២៧
សារ ប៉ូល ជិះ កាំប៉ាន់ ឡាំ ប៉ាគ់ មឿង រ៉ូម
១ ប៉ាគ់ ពូ អន់ ញឹន ជិះ កាំប៉ាន់ ឡាំ ប៉ាគ់ ប៉ាថេត អ៊ីតាលី កេះ ពូ មប ប៉ូល លូ មួត ថូត អន់ទៀគ ណាវ្គ អន់ កា ម៉ៃគ តាហាន សិច យូលៀ ក្រុំ តាហាន អ៊ែ ពូ អើ ផា ក្រុំ តាហាន អូគុះ។
២ ញឹន កា ជឹរ ជិះ កាំប៉ាន់ ឡាក់ ពឹះ ឡឹង មឿង អាត្រាមីត ឡាក់ ឃឹត ចឹង ឡាំ ប៉ាគ់ ចារ អន់ទៀគៗ អ្វៃ រហាង សាឡីគ សាឡាយ ខេត អាស៊ី។ កេះណោះ កាំប៉ាន់ ណោះ ចាក ហង។ អារីសាតាក ឡឹង មឿង ថេសាឡូនិក ខេត ម៉ាសេដូន កា ចាក អន់ឌូ លូ ញឹន ដេល។
៣ ប៉ាគ់ ដារ់ តាយ៉ាង័ ញឹន ទឹល ប៉ាគ់ មឿង ស៊ីដូន កា តាវ កាំប៉ាន់ ហះ ណោះ ហិ។ វគ័ យូលៀ ទី ពុត ដាគ់ កា ប៉ូល អ៊ែ អន់ ប៉ូល ឡាំ ចាចាក ប៉ាគ់ ហី គួប ចាង័ ភឿ អ្យក់ កាណាគ័ ពូ អន់ ឡាក់ អ៊ែ តងកាន។
៤ កេះណោះ ណាវ្គ ញឹន ឡាច់ ឡឹង មឿង ណោះ ចាក តឹ ខ្យាល ណោះ ហង បះ ញឹន ចាក រសានែង តាក្វាល់ គីប៉្រុះ ភឿ កាន់ទឹង ខ្យាល។
៥ ឡៃង ឡឹង ញឹន ឃ្លង សាឡីគ សាឡាយ ក្យាម័ ខេត គីលីគៀ លូ ខេត ប៉ាមភីលៀ កេះ ញឹន កា ទឹល ប៉ាគ់ មឿង មីរ៉ា ពឹង ខេត លូគៀ។
៦ ហះ ណោះ ម៉ៃគ តាហាន ណាំង ទី កាំប៉ាន់ ម៉ោញ ណាវ្គ ឡាក់ ពឹះ ឡឹង មឿង អាលេកសាន់ទ្រៀ ចឹង ឡាំ ប៉ាគ់ ប៉ាថេត អ៊ីតាលី។ អ៊ែ កា ជៀក ញឹន ជិះ កាំប៉ាន់ ណោះ ឡគ។
៧ កាំប៉ាន់ ណោះ ចាក ពឺកៗ ទុញ ដារ់ ញឹន កា ទឹល ប៉ាគ់ សាឡីគ សាឡាយ មឿង កានីដុះ ណោះ ទឹប ឡាំបាក ខាក់។ កេះណោះ ញឹន ចាក ឡាំ ប៉ាគ់ ហាង សាល់ម៉ូន ឡគ។ ញន ទី ខ្យាល តឹ ឡឹង ម៉ាត់ កាំប៉ាន់ ណោះ កា ចាក រគែង តាក្វាល់ គ្រែត ខង ដាគ់ កាន់ទឹង ខ្យាល។
៨ ផះ ចាក ទ្រង តាក្វាល់ ណោះ ទឹប ឡាំបាក កាខាក់ ញឹន កា ទឹល ប៉ាគ់ ចារ ម៉ោញ ឡាក់ ពូ អន់ សិច ផា ចារ កត់ កាំប៉ាន់ ដាគ់ ឡាយ៉ាម័ ឡាក់ ក្យាម័ មឿង ឡាសេ។
៩ ញន ចាក ទុញ ដារ់ ខាក់ កេះ កាំប៉ាន់ ចាក ឡាំ ប៉ាគ់ ម៉ាត់ ណាវ្គ កា ហ៊ែង ឡាំបាក ខាក់ ដេល ខង ដារ់ ប៊ុន ពូ អូ សា សាណា រ៉ាវ៉ាច់ កេះ ថុន ខ្យាល ក្យាម័ ចឹង ទឹល ហង។ ណោះ ប៉ូល រ៉ះ កា ពូ ផា
១០ «អឺ អុះ ម៉ី ផា ពិន ចាក ឡាំ ប៉ាគ់ ម៉ាត់ ណាវ្គ អាញ់ ឃឹត ផា ចឹង ទី កាន ខូច័ ខាច ឡូត អូ ត្រគ់ ខូច័ ខាច ដឹង ឃឿង ខង លូ កាំប៉ាន់ ណោះ អុះ ឃឺ ខូច័ ខាច ទឹប ឡាកោ ពិន ដេល»។
១១ ហះកា ម៉ៃគ តាហាន ណោះ អូ សឿ ប៉ូល រ៉ះ អុះ អ៊ែ ម៉ឹង ប៉ាណូស បក់ ប៊ិត កាំប៉ាន់ លូ តាំងឡា កាំប៉ាន់។
១២ ចារ ណោះ អូ ដាគ់ អុះ សាំរ៉ាប់ កត់ កាំប៉ាន់ រ៉ាំងវ៉ាង ថុន ខ្យាល ណោះ ហង បះ កាំឡាំង អៀង ដូវ ប៉ិច ចាក ឡាច់ ឡឹង ចារ ណោះ ភឿ ប៉ិច កា ទឹល ស៊្រស ប៉ាគ់ មឿង ភេនីច ឡាក់ ចារ កត់ កាំប៉ាន់ ហះ តាក្វាល់ គ្រែត ឡាក់ ចារ កាន់ទឹង ខ្យាល ភឿ អ្វៃ រ៉ាំងវ៉ាង ថុន ខ្យាល។
សារ ខ្យាល តីស ទៀក រ៉ាំងក្លាច
១៣ ផះ ណោះ ទី ខ្យាល ផិរៗ ទឹល ឡឹង គែង តាបូង អន់ឌែ ឃឹត ផា ដាគ់ ឡាក់ ពុត ប៉ិច ហង អន់ឌែ កា ប៉ាណាំ គួប ទុង ហាវ តាឡង់ ប៉ាសយ់ ចាក ឡាំ រគែង តាក្វាល់ គ្រែត ណាវ្គ។
១៤ ហះកា បាប៊ែត ឡឹង ណោះ ផាឌី ទី ខ្យាល តីស កាខាក់ ទឹល ឡឹង តាក្វាល់ តឹ កាំប៉ាន់ ខ្យាល តីស ណោះ សិច អារ៉ាគ្លីដូន។
១៥ ញន កា ញឹន អូ ដាម័ គឹ កាំប៉ាន់ អន់ ចាក ដោគ ខ្យាល ញឹន កា អន់ កាំប៉ាន់ ចាក ពួយ ខ្យាល ណោះ ហង។
១៦ ប៉ាគ់ ទឹល តាក្វាល់ ថិ សិច ក្លូដេ ឡាក់ ចារ កាន់ទឹង ខ្យាល ញឹន កា លឺក ទូក ហាវ ចៃគ ពឹង កាំប៉ាន់ ទឹប ឡាំបាក ខាក់។
១៧ ប៉ាគ់ លឺក ទូក កត់ កេះៗ ពូ អ្យក់ កាស៊ែ សាន់ត្រាន័ តីស កត់ ទ្រែម ជុំ កាំប៉ាន់ កេះណោះ ពូ រ៉ីស ប៉ាឡិ សាំងយ៉ូវ អ្យូគ កា កាំប៉ាន់ ទួម ហះ ឡាពុក ចារ ទៀក ដាល កេះណោះ អន់ កាំប៉ាន់ ចាក ពួយ ខ្យាល នីណោ័ះ ហង។
១៨ ប៉ាគ់ ដារ់ តាយ៉ាង័ ញន កា ខ្យាល តីស តឹ កាំប៉ាន់ តាឡាម័ ពូ កា ប៉ាឡិ អ្លាត ឃឿង ខង អន់ដា។
១៩ ប៉ាគ់ ដារ់ យ៉ាង័ តោ ណាវ្គ មួត តាំងឡា កាំប៉ាន់ កា ប៉ាឡិ អ្លាត ឃឿង កាំប៉ាន់ អន់ដា ដេល។
២០ ញឹន អូ ប៉ប័ ដារ់ អូ ប៉ប័ សំឡង់ ទុញ ដារ់ ខ្យាល តីស កា អូ ស្វាស ឡក់ ញឹន កា អូ ម៉ឹង កា ចឹង អ្វៃ រ៉ីស អុះ។
២១ ញឹន អូ ទី សា សាណា ញ៉ា ទុញ ដារ់ កេះ ដេល ណោះ ប៉ូល កា អ្យូវ អន់តាវ ហះ អន់តិគ័ កាំឡាំង កាណុង កាំប៉ាន់ កេះណោះ កាប ផា «អឺ អុះ ម៉ី ផា អន់ដីស សឿ អាញ់ ពិន អូ ឡាច់ ឡឹង តាក្វាល់ គ្រែត ណោះ ពែ ដាគ់ អន់ដីស អូ ទី កាន ខូច័ ខាច នីអៀ អុះ។
២២ ហះកា កិញអៀ អា អាញ់ ប៉រ់ រ៉ះ កា អន់ដីស ជែ អ្យូគ ហង កាណុង កាំឡាំង អន់ដីស អា ម៉ោញ ដូវ កា អូ តោ័ អុះ ឃឺ ដឹង កាំប៉ាន់ អា ហង ចឹង ត្រគ់ ខូច័ រ៉ាយ រ៉ាំ ណោះ។
២៣ អាញ់ អ្លុ អន់តគ់ ខង ម៉ាំង ពែ ប៉្រ័ះ ប៊កកាតយ័ ឡាក់ អាញ់ សឿ ប៉ានេ សាំប៉័ះ អ៊ែ ប៉្រើ ប៊យ អ៊ែ ពឹះ ប៉ាគ់ អាញ់ លូ រ៉ះ ផា
២៤ "អឺ ប៉ូល អីស ជែ អ្យូគ ខង អីស ត្រគ់ ឡាំ អន់តាវ ហះ ម៉ាត់ សាដាច់ តីស។ ហៃ ញន កា ប៉្រ័ះ ប៊កកាតយ័ ដាគ់ ពុត កា អីស អ៊ែ ចឹង តង័ ទិ បក់ ចាក អន់ឌូ លូ អីស អន់ រ៉ាវ៉ាច់ ឡឹង សារ តោ័ អា ដេល"។
២៥ ទឹល នីណោ័ះ អឺ អុះ ម៉ី ហគ់ ម៉ឹង ពិ ខង អាញ់ សឿ ផា ប៉្រ័ះ ប៊កកាតយ័ ចឹង ប៉្រគ័ ឡាក់ កា អ៊ែ រ៉ះ ណោះ តាទឹច។
២៦ ហះកា កាំប៉ាន់ ពិន អា ចឹង ទួម ពឹង តាក្វាល់ ម៉ោញ អ្លុ កា ហះ ចំ»។
២៧ ផះ កាំប៉ាន់ ញឹន ឡង់ ពឹង សាឡីគ សាឡាយ អាឌ្រៀ ទឹល ១៤ ម៉ាំង កេះ ប៉ាគ់ ទងតិគ័ ម៉ាំង មួត តាំងឡា កាំប៉ាន់ សាម៉គ័ ផា ក្យាម័ ចឹង ទឹល គោក កេះ។
២៨ អន់ឌែ អ្យក់ កាស៊ែ សាំរ៉ាប់ វ៉ាស ទៀក ប៉ាឡិ កាណុង ទៀក ប៉ប័ ផា អ្វៃ ជ្រុ ២០ ប៉្លាស ចាក ឡាំ ប៉ាគ់ ម៉ាត់ ណាវ្គ កេះណោះ ប៉ាឡិ កាស៊ែ កាណុង ទៀក ម៉ោញ ទង ណាវ្គ ប៉ប័ ផា ជ្រុ ១៥ ប៉្លាស។
២៩ ញន កា អ្យូគ កា កាំប៉ាន់ តឹ អំហ្មោ ពូ កា ប៉ាឡិ តាឡង់ ប៉ាសយ់ គែង ប៉ាអច់ ប៉្វាន់ កាតុ ជែ អន់ ចាក ប៉្រាល់ លូ អ្វៃ សាណាង ប៉្លៃង តារ។
៣០ មួត តាំងឡា កាំប៉ាន់ អន់ឌែ ប៉ិច សាតាក់ អ្លាត កាំប៉ាន់ អន់ឌែ កា ប៉ាណាំ គួប រ៉ីស ទូក ប៉ាហ្រូ ប៉ាឡិ ពឹង ទៀក លូ ប៉ាញ៉ា ផា ចឹង អ្យក់ តាឡង់ ប៉ាសយ់ ប៉ាឡិ គែង កល់ ឡគ។
៣១ ប៉ូល រ៉ះ កា ម៉ៃគ តាហាន លូ មួត តាហាន ផា «ផា តាំងឡា កាំប៉ាន់ អូ អ្វៃ ពឹង កាំប៉ាន់ អន់ដីស អូ រ៉ីស អុះ»។
៣២ មួត តាហាន កា កោះ កាស៊ែ ប៉ាឡិ ទូក ប៉ាឡង់ ពឹង ទៀក សាឡីគ សាឡាយ ឡូត។
៣៣ ប៉ាគ់ ក្យាម័ ប៉ាតារ កេះ ប៉ូល អន់តគ់ រ៉ះ កា កាំឡាំង ទិឌូ ប៉្រើ សា សាណា លូ កាប ផា «១៤ ដារ់ កេះ ឡាក់ អុះ ម៉ី ខំ អ្វៃ មត អូ សា សាណា ញ៉ា។
៣៤ ទឹល នីណោ័ះ អន់ដីស សា សាណា ឡគ ពិ ភឿ អន់ អ្វៃ រ៉ីស ខង កាណុង កាំឡាំង អន់ដីស អា យ៉័ះ សក់ ម៉ោញ កាស៊ែ កា ចឹង អូ ហ៊្យង ដេល»។
៣៥ អ៊ែ កាប នីណោ័ះ កេះៗ កា អ្យក់ ណុំ ប៉ាំង ប៉ានេ ប៉្រ័ះ ប៊កកាតយ័ ហះ ម៉ាត់ កាំឡាំង ទិឌូ កេះណោះ អ៊ែ គុ សា។
៣៦ កាំឡាំង អ្វៃ កាណុង កាំប៉ាន់ ទិឌូ កា ទី ពុត ហោក ហង អន់ឌែ កា សា សាណា ទិឌូ ដេល។
៣៧ កាំឡាំង ញឹន អ្វៃ កាណុង កាំប៉ាន់ ណោះ ទី ២៧៦ ដូវ។
៣៨ ប៉ាគ់ ពូ សា សាណា ផីគ កេះ ពូ កា លឺក កាប៉ោ ពៀ ប៉ាឡិ អ្លាត ពឹង ទៀក សាឡីគ សាឡាយ ភឿ អន់ ជឺច កាំប៉ាន់។
៣៩ ប៉ាគ់ តារ តាទឹច កេះ មួត តាំងឡា កាំប៉ាន់ ហៃ តាក្វាល់ ណោះ អូ អន់ហ្នាល់ អុះ ហះកា អន់ឌែ ប៉ប័ ម៉ាត់ ទ្រូង ម៉ោញ ឡាក់ ទី តេះ ឡាពុក អន់ឌែ ឃឹត ឡាំ អន់ កាំប៉ាន់ ទួម ហះ ណោះ ផា អ្លុ ប៉្រគ័ ទឹល។
៤០ អន់ឌែ កា រ៉ីស កាស៊ែ តាឡង់ ប៉ាសយ់ អ្លាត ពឹង ទៀក សាឡីគ សាឡាយ លូ រ៉ីស កាស៊ែ សាពឺ ភឿ គឹ កាំប៉ាន់ កេះណោះ អន់ឌែ លឺក សាំងយ៉ូវ គែង កល់ ភឿ អន់ ខ្យាល ត្រុត ឡាំ កាំប៉ាន់ ប៉ាគ់ ហាង។
៤១ ហះកា ផះ បើ ទឹល ប៉ាគ់ ហាង កាំប៉ាន់ ទួម ហះ ចារ ទៀក ដាល ណោះ ហង កល់ កាំប៉ាន់ កា ទួម ពឹង តេះ ឡាពុក តឹង ប៉ាអច់ កាំប៉ាន់ កា ប៉ាទុះ ប៉ាក់ រ៉ាយ រ៉ាំ កា ទៀក តឹ តាឡាម័។
៤២ ផះ ណោះ មួត តាហាន ប៉ិច ប៉ាន់តោ័ អ្លាត មួត ថូត ទិណោ័ះ អ្យូគ កា អន់ឌែ រែ ទៀក សាតាក់ រ៉ាវ៉ាច់ ឡាកោ។
៤៣ ហះកា ម៉ៃគ តាហាន ប៉ិច តង័ ប៉ូល អន់ អ្វៃ រ៉ីស ណោះ អ៊ែ អូ អន់ មួត តាហាន ប៉ាន់តោ័ អុះ។ អ៊ែ ប៉្រើ បក់ ចំ អ្លុ រែ ទៀក ប៉ូះ រែ ឡាំ ប៉ាគ់ តាក្វាល់ អន់ទ្រួល។
៤៤ កាប៉ាច់ បក់ អូ អ្លុ រែ ទៀក បក់ អន់ដា ក្វារ់ កាតារ បក់ អន់ដា ក្វារ់ តាំពៀក កាំប៉ាន់ ឡាក់ ប៉ាទុះ ណោះ រែ ឡាំ ពួយ ដេល។ ប៉្រគ័ នីណោ័ះ ញឹន ទិឌូ ទី រ៉ាវ៉ាច់ ឡាកោ ទឹល ប៉ាគ់ គោក។