7
In Hanggatus Tagkaꞌpatan Tagꞌupat Ngaibu Tau Israil
1 Pagꞌubus yadtu nākitaꞌ na isab aku upat malāikat nagtitindug duun ha upat pidju sin ālam. Hiyahawiran nila in hangin huyup dayn ha upat pidju sin ālam, ha supaya diꞌ kugdanan sin hangin in ginlupaan iban dagat. Iban ha supaya isab diꞌ kugdanan in manga kakahuyan minsan hambuuk.
2 Iban awn isab kītaꞌ ku hambuuk malāikat guwaꞌ dayn ha subangan nagdarā sin hipagsasāp sin Tuhan, amu in buhiꞌ salama-lama. Giyasuran niya in manga upat malāikat, amu in kiyarihilan sin Tuhan kawasa magpakangīꞌ sin lupaꞌ iban dagat.
3 Laung biyaꞌ ha ini sin malāikat kanila, “Ayaw niyu na mulaha in lupaꞌ iban dagat. Ayaw niyu isab mulaha in manga kakahuy-kahuyan minsan hambuuk ha salugay namuꞌ diꞌ pa kasāpan in manga tuktuk sin manga tau daraakun sin Tuhan.”
4 Pagꞌubus diyungug ku in taud katān sin kiyasāpan. Awn hanggatus kaꞌpatan tagꞌupat ngaibu dayn ha katān pihak panubuꞌ sin bangsa Israil.
5 Dayn ha panubuꞌ hi Yudah awn hangpuꞌ tagduwa ngaibu in kiyasāpan,
dayn ha panubuꞌ hi Raubin hangpuꞌ tagduwa ngaibu,
dayn ha panubuꞌ hi Gad hangpuꞌ tagduwa ngaibu,
6 dayn ha panubuꞌ hi Asir hangpuꞌ tagduwa ngaibu,
dayn ha panubuꞌ hi Naptali hangpuꞌ tagduwa ngaibu,
dayn ha panubuꞌ hi Manassi hangpuꞌ tagduwa ngaibu,
7 dayn ha panubuꞌ hi Simiyun hangpuꞌ tagduwa ngaibu,
dayn ha panubuꞌ hi Libi hangpuꞌ tagduwa ngaibu,
dayn ha panubuꞌ hi Issakal hangpuꞌ tagduwa ngaibu,
8 dayn ha panubuꞌ hi Sibulun hangpuꞌ tagduwa ngaibu,
dayn ha panubuꞌ hi Yusup hangpuꞌ tagduwa ngaibu iban
dayn ha panubuꞌ hi Binjamin hangpuꞌ tagduwa ngaibu.
In Mahadjanaꞌ
9 Pagꞌubus yadtu nākitaꞌ na isab aku tau mabanus tuud nagtitipun. Diꞌ maitung in taud nila. In manga tau ini guwaꞌ dayn ha dugaing-dugaing pihak, hulaꞌ, bangsa, iban dugaing-dugaing in bahasa nila. Duun ku sila kītaꞌ nagtitindug ha alupan sin kursi iban sin amu in Anak Bili-bili. Nagjujuba sila katān putiꞌ iban nagdarā sila lukay pakaniya-pakaniya.
10 Pagꞌubus yadtu diyungug ku sila nagsuwara matanug, nagsama-sama. Laung nila,
“Sanglitun natuꞌ in Tuhan,
amu in limilingkud ha kursi,
iban sin amu in Anak Bili-bili sabab liyappas nila kitaniyu dayn ha manga dusa natuꞌ.”
11 Manjari, kītaꞌ ku in upat malāikat mahal-mahal in lupa, duun nagtitindug ha katilibut sin kursi, siyunuan sin manga nagtatau-maas, ubus ampa sin manga malāikat. Pagꞌubus, ampa in manga malāikat katān simujud simumba ha Tuhan, amu in naglilingkud ha kursi.
12 Laung nila biyaꞌ ha ini,
“Amin.
Pudjihun, sanglitun, lagguun
iban pagsarang-sukulan natuꞌ in Tuhan salama-lama,
amu in hambuuk-buuk makaingat sin unu-unu katān.
Siya in sangat-kawasa iban amu in tuburan sin kusug katān.
Amin.”
13 Sakali, iyasubu aku sin hambuuk nagtatau-maas. Laung niya, “Kaingatan mu ka bang hisiyu in manga tau yan nagjujuba putiꞌ? Iban kaingatan mu ka bang dayn hāin sila yan?”
14 Simambung aku kaniya. Laung ku, “Diꞌ ku sila kaingatan, Tuwan. Baytai kunuꞌ aku bang hisiyu sila sabab ikaw in makaingat.”
Siyambungan niya aku. Laung niya, “In sila yan amuna in manga bakas nakalabay sin kabinsanaan landuꞌ makalap. In manga juba nila maputiꞌ, pasal in duguꞌ sin Anak Bili-bili amuna in biyaꞌ sapantun tubig piyangdakdak nila sin manga yan.
15 Na, hangkan bihaun,
Yan sila duun nagtitindug ha alupan sin kursi sin Tuhan.
Dūm-adlaw wayruun paghali nila maghinang ha lawman sin Tuhan.
Iban in sila yan iyuukuman sin Tuhan, amu in limilingkud ha kursi.
16 Lāgiꞌ, in sila yan diꞌ na tuud hapdiun atawa uhawun saumul-umul,
iban diꞌ na sila tuud malūs sin suga atawa sin unu-unu na mapasuꞌ.
17 Sabab in amu in ngiyānan Anak Bili-bili, amu in yaun duun ha alupan sin kursi sin Tuhan, amuna in magꞌupiksaꞌ kanila.
Iban siya in magꞌūhan dumā kanila tudju pa tuburan sin tubig kalkawsal, amu in makarihil kanila kabuhiꞌ iban kasannyangan sin pangatayan nila.
Iban pahiran sin Tuhan in katān luhaꞌ nagtūꞌ dayn ha manga mata nila.”