Mepepelime mo Ufaru ma
Yahaya
Ucuɗuwu wa aatagada a nda
Yahaya ɗana ta̱ mpepelime n wawaꞌa aza a taꞌatsu a̱ tyo ama kokoꞌo. E mepepelime mo ufaru ma nda, u ɗe ta̱ a̱za̱ e ɗesununa̱ va̱ yi muwun ma̱ yi. Ana wo oꞌwoi Yahaya aajiya a ɗa waru zagbain va̱ a̱za̱ e Itoni a ɗa a mantsaꞌa, u ta dansa mepepelime ma nda za va̱ a̱za̱ e Itoni a ɗa suru.
A̱tsuma̱ a aatagada a nda, Yahaya yuwan ta̱ adanshi cine vuma a̱a̱ da̱na̱ zuzu na̱ A̱sula̱ a yuwusaan yi a̱ga̱nda̱. U yuwan ta̱ adanshi cine a̱a̱ da̱na̱ zuzu na̱ A̱sula̱ e re re. Ure wu ufaru a̱yi ɗa vuma isawan a̱tsuma̱ e ekan a̱ A̱sula̱. Ure we ire a̱yi ɗa vuma isawan a̱tsuma̱ e icigi ya̱ A̱sula̱.
Aatagada a nda a damma tsu ta̱ a na tsi isawan a̱tsuma̱ e ekan a̱yi ɗa tsu yuwan wuma cine A̱sula̱ a cigai, ne ɗa ili i ro ya̱a̱ da̱na̱ lo usokowu e ekere a ama ko uba̱ta̱ wa̱ A̱sula̱ shi. Aatagadaꞌa fo u damma ta̱ a na vuma isawan a̱tsuma̱ e icigi ya̱ A̱sula̱ a̱yi ɗa a cigalai pa a̱tsuma̱ o uvaɗi. O ukosu, u cuwaan tsu ta̱ na tsu ri na̱ a̱ba̱jini o ulyuwu wa aci na̱ tsu ri uɓolu na̱ Zamawawa.
Ili i na i ri pe a̱tsuma̱ a aatagada a nda
1. Adanshi a na a tsu ca Wuma (1:1-4)
2. A̱sula̱ ekan a ɗa waru Zamawawa ɗa iroci i tsu (1:5–2:6)
3. Wila̱ u Saꞌavu (2:7-17)
4. Nꞌyuwatan mu Zamawawa na̱ Muwun ma̱ A̱sula̱ (2:18–3:10)
5. Icigi ya̱ A̱sula̱ ni icigi i tsu (3:11–4:21)
6. Ulyuwu wa aci wu uvaɗi (5:1-21)
1
Adanshi a wuma
Za na da̱na̱i wuma diga a mantsa mo ufaru, a̱yi ɗa tsu uwwai adama a̱ yi, waru tse ene yi ta̱ ne esu a̱ tsu, reve tsu ka̱lyuwa̱ yi ulobonu, waru tsu juꞌwa̱n yi ta̱ ne ekere a̱ tsu. A̱yi ɗa Yesu Kristi Zamawawa, Adanshi a wuma. Za na a casu wuma ta̱wa̱ ta̱ uba̱ta̱ u tsu! Tse ene yi ta̱, waru a̱tsu esu e ili i na tse enei ɗa. Gogo tsu ta dansaa ɗu adama a wuma a babu ukotu za na da̱na̱i na̱ Dada reve u ta̱wa̱ uba̱ta̱ u tsu. Ili i na tse enei waru tsu uwwai i ɗa tsaa dansaa ɗu, tsa̱ra̱ a̱ɗu fo i yuwan nden m muwwulai oɓolo na̱ a̱tsu. Waru nden n tsu oɓolo na̱ Dada na̱ Mawun ma̱ yi Yesu Zamawawa ɗa. Tsu ɗanaa ɗu ta̱ ili i nda tsa̱ra̱ i da̱na̱ tapu na̱ ma̱za̱nga̱ oɓolo na̱ a̱tsu.
A̱sula̱ ekan a ɗa
Apa a nda ikaka i na tsu uwwai uba̱ta̱ wa̱ Yesu Zamawawa a̱yi ɗa gba tsaa dansaa ɗu gogo: A̱sula̱ ekan a ɗa, waru u ri ni irumbu shi, ko keꞌen. Na̱ tsu damma tsu ta̱ a̱ nden oɓolo na̱ A̱sula̱, agba a̱tsuma̱ e irumbu i ɗa tsu ri nden, epen a ɗa tsaa yuwusan, tsoo tono amayun shi. Amma na̱ tsu ri nden a̱tsuma̱ e ekan, ununa A̱sula̱ a̱ ri a̱tsuma̱ e ekan, tsu ta̱ a̱ nden m muwwulai. Waru mpasa m Mawun ma̱ yi Yesu n ta̱ za̱za̱ꞌusa̱ nusu tsu.
Na̱ tsu damma koto tsu yuwan unusu shi, aciya̱tsu a ɗa tsa̱a̱ lumusa̱, waru amayun a̱ ri pe a̱tsuma̱ a̱ tsu shi. Amma na̱ tsu damma nusu tsu, u ta yuwaan tsu gafura vu nusu tsu adama a na a̱yi za na tsu shiton nzuwulai n ɗa, waru a̱yi za na tsu yuwan ili na̱ a̱ɓula̱ a ɗa. A̱yi waru u ta̱ za̱ꞌwa̱ tsu diga a̱ nusu na tsu yuwain. 10 Na̱ tsu damma koto tsu yuwan unusu shi, tsu ta̱ ka̱mbuwusa̱ A̱sula̱ za ve epen, waru tsu to rocosu ikaka ya̱ yi i ri nu uba̱ta̱ wu nden o okolo a̱ tsu shi.