16
Ana urana wa Ashibi u ka̱ra̱i, a̱vu Meri Magadaliya na̱ Meri mma va Yakubu na̱ Solomi a tsula itana i ma̱guru, adama a̱ ta̱wa̱ a sukuma lipu va̱ Yesu. A̱vu a̱ ta̱wa̱ na̱ wasasa o urana wa Aladi, cina usana u tawa ɗaɗa a̱ ta̱wa̱i a aasoꞌon. A̱vu a dammulai, “Zane ɗa ee keɓe tsu aatali o ndolo o una̱ wa aasoꞌon?” Ana a̱ ꞌya̱sa̱in esu e le, a̱vu a cina e keɓe ɗe aataliꞌi agba aatali a gbain a ɗa a̱ da̱na̱i. Ana a uwai a aasoꞌon, reve e ene ulobo u ro nden o ukere usaꞌani, ni itana i uꞌuri. Reve a uwa asalama.
A̱vu u damma le, “She i uwa asalama wan. N reve ta̱ i te izami ya̱ Yesu za va Nazara, za na a varai a akpata. Wu pa shi. U ꞌyon ta̱. Ka̱lyuwa̱i uba̱ta̱ u na u da̱na̱i. ꞌYa̱wa̱i i damma ojoro a̱ yi na̱ Bituru u ta̱ ɗe elime a̱ ɗu a̱ ꞌya̱wa̱ Ga̱lili. I te ene yi ununa u damma nɗu.”
Ana o uta̱i, a̱vu a suma ni ilaɗi. Reve e reme asalama na̱ mejeꞌen ma̱ lipu. A damma za shi, adama a na wovon u reme nle.
Yesu ꞌya̱wa̱ ta̱ uba̱ta̱ wa̱ Meri Magadaliya
(Mat. 28:9-10; Yah. 20:11-18)
[Nu usana u na Yesu ꞌyoyin o urana wa Aladi, Meri† Magadaliya ɗa fara ene niyi, za na wu uta̱yi otoni a̱ lima̱ e cindere a̱tsuma̱ a̱ yi. 10 U ꞌya̱wa̱ ta̱ damma otoni a̱ yi, aza a na a̱ da̱na̱i a saali na̱ a̱tsumola̱ngu. 11 Ana a uwwai u ta̱ wuma, hali we ene yi, reve a ꞌyuwan a̱ usu.
Yesu roco ta̱ aciya̱yi uba̱ta̱ wo ojoro e re
(Luk. 24:13-35)
12 Ana addama o ndolo o kotoi, a̱vu Yesu ta̱wa̱ uba̱ta̱ wa ama e re a̱tsuma̱ e le no oroci o ro, ele a mmalu o ure a̱ tyo a̱ ma̱lyuci. 13 A̱vu a̱ ꞌya̱wa̱ a damma akapiꞌi, agba a̱ usu shi.
Yesu damma ta̱ ojoro a̱ yi ili i na aa yuwan
(Mat. 28:16-20; Luk. 24:36-49; Yah. 20:19-23; Ajy. 1:6-8)
14 Na̱ a̱ca̱pa̱ a ɗa u ta̱wa̱i uba̱ta̱ wo ojoro kupa na̱ za ta̱ꞌa̱, ele nden a alya e ilyalya. A̱vu u yuwaan le nla̱ngi adama o okolo o ugbamu u le nu ulambu u na a cayi okolo. Adama a na a ꞌyuwain a̱ usu ili i na aza a na e ene niyi a damma nle cina u ꞌyon.
15 A̱vu u damma le, “ꞌYa̱wa̱i a̱tsuma̱ o uvaɗi suru i yuwaan ama alajiya a Alabari a Saꞌani. 16 Za na usuyi a̱ rumbu niyi waru, a ta wawa yi. Amma za na usuyi shi, wa̱a̱ tsura̱ wuma u babu ukotu shi. 17 Aza a na a̱ usuyi a ta gura yuwan iroci yi ili ya asalama i nda: A̱tsuma̱ a ala† a̱ va̱ a̱ to uta̱a̱ otoni a̱ lima̱, waru a ta yuwan adanshi ne elentsu o ro, 18 a ta tara yo, agba ko no o sowo yaza, waa yuwan ili ne ele shi ko keꞌen, a̱ ta̱ juꞌwa̱n a̱za̱ o ubanakun a̱vu a̱ tsura̱ lafiya.”
Uka̱ru wa̱ Yesu zuva
(Luk. 24:50-53; Ajy. 1:9-11)
19 Ana Yesu† yuwain adanshi ne ele, a̱vu a tara yi a̱ tyo zuva, tsa̱ra̱ u da̱nu o ukere usaꞌani wa̱ A̱sula̱. 20 Ele gba a̱ ka̱ra̱ a yuwan alajiya a Alabari a Saꞌani ko te ɗa, A̱sula̱ a yuwusan ulinga ne ele. Ulinga wa asalama a na a yuwusain, u roco ta̱ Alabari a Saꞌani e le amayun a ɗa.]