9
Sonoga yo yauyaule kaiweli
1 Sonoga ana nume ikabiyako yo nume manna mena tuki kali baibaiwa seben.
2 Kan lalakina ikatububunanako, bulumakau, wain yo teibele iyeseyako.
3 Kana tosagenawasa iyawasali silau yanuwa siya koya pwatali mena kolili,
4 siya meuloili nige ali nuwa-mayale yabo iwalowalo kolili iwaloba, “Meuloimiu nige ami katai kwalaoma koliyau,
5 kwalaoma na kanne yakatububu-nanako wakekan yo wainne yasuwai kwanuma.
6 Mumugana yauyaule kwalogabaen, kwalaoma na yawasimiu kwalobai kabo kwalokeikeile katai kana kamwasa koina.”
7 Tem totalawasi yabo kuwalo-yadudulai kani italawasi-yagiwo. Tem tonaenaena yabo kuyokoiyan kani imunamunai yo iwalo-naenae koliwo.
8 Tem totalawasi yabo kuyokoiyan kani ikalomagigi-lagiwo na tem tosonoga yabo kuyokoiyan kani iyakasisi-yagiwo.
9 Tem tosonoga yabo kuwalo-yadudulai kani ana sonoga kuetulan. Tem todudulai yabo kuyakatai kani ana katai ilalaki yoi.
10 Sonoga ana kaba yatubu bwaite, Yeoba kana matausi. Tem me am katai Yaubada iya tabutabuna kani me am nuwa-mayale.
11-12 Tem kowa me am sonoga kabo sonogane koina kani maisana kulobai, am bolime kani sibaibaiwa. Na tem kowa kuyamala totalawasi yabo kabo kubomayoi kani kuunuiwo.
13 Sinene esana “Yauyaule” iya totalawauwau, iedeedede bwagabwaga yo nige ana katai yabo.
14 Ana nume iyaele yanuwane koyana pwatana mena yo sinene imiyasio ana kaba miya mena ana nume kana gamwa koina,
15 iyogayoga tomo kolili siya silaulau kamwasa mena ali paisowa kaiwena,
16 siya meuloili nige ali nuwa-mayale yabo iwalowalo kolili iwaloba, “Meuloimiu nige ami katai kwalaoma koliyau,
17 waila kewakewalina iluviluvi, kan tomo sikekan wadam mena ikamna.”
18 Tomone bwaite siya waluwaluline nige sikakatai tomone bagubagunaline silusaeko sinene ana nume mena mwa siboitako yo sibowa besiele salai mena sikenokeno.