30
Deibida Amaleki ikaiwe-gabaegili
Deibida me ana kilakaiwo silaulau kamwasa mena kabo kaliyate yaiyonana koina siyawatagili Sikilagi koina. Na tauna kona Amaleki tokaleyayao silaoma yo yanuwane kana tatao siunuili yo sinesineo me natuliyao sikwayaili. Kabo saugana Deibida me ana kilakaiwo siyawatagili silobai yanuwane Amaleki sigabu iwedoli. Na sinesineo kaloli mena Deibida wainenao Ainowami yo Abigaili. Deibida me ana kilakaiwo meuloili sivalam lalakina.
Tomna 1-5
6 Deibida ana kilakaiwo me ali nuwanae lalakina kaiwena waineliyao yo natuliyao nige simiyamiya yanuwane koina kabo simunamunai Deibida koina sibomamo siwaloba, “Deibida taunui veku mena iboita.” Deibida walone ibenalan mwa me ana katewakaka na iyamo ana meli ipei Yeoba koina kabo me ana katepatu.
7 Deibida iwalo topwaoli Ebayada koina iba, “Kam ipodi ukwalaiyama na Ulim yo Tamim tayapaisowa na Yeoba ana nuwatu taloyai.” Kabo iginauli besiele.
8 Kabo Deibida ineli Yeoba koina iba, “Gubesi, kani Amaleki yayamuli kusulili o nigele? Kani kalobaili o nigele?” Yeoba kainana iyamaisa iba, “O, kuyamuli kusulili, kani kulobaili yo sinesineo me natuliyao kuleboili.”
9-10 Kabo Deibida me ana kilakaiwo kali baibaiwa sikisi andeledi silau. Saugana siyawatagili Besol wailana koina kilakaiwo yoli tu andeledi nige silalauyoi na simiyamiya kaiwena kamnali sinaesosi nige sowana galogalowa mena silopanaisi yo koya sikawaili kabo Deibida me ana boda powa andeledi silauyoi.
Muli mena Itipita tomona silobai. Deibida ana wasa iwolena iba, “Yau tomo Amaleki ana topaisowa panpanna yabo. Yakasiebwa lalakina kabo silogabaegau. Tauna kona yanuwa Sikilagi kagabu.” Kabo Deibida ineliyan iba, “Sowasowana kamwasa kuyakenayagimai na Amaleki kalobaili.” Mwa italam.
Tomna 11-15
Kabo Itipita mena kamwasa iyakenayagili kabo Amaleki silobaili sikekakekan, sinumanuma, siseloselo me ali yaliyaya. Kabo Deibida me ana bodao sisagena yo Amaleki meuloili siunuili. Sinesineone me natuliyao siya Amaleki sikwayaili sileboili yo sipi yo gouti meuloili tabe.
Tomna 16-20
Kabo Deibida me ana kilakaiwo sipileyoi Besol wailana na yoli tu andeledi silobaili sisanasanaili. Na kilakai tupwali yoli powa andeledi kaloli mena siba, “Nige sowana gogo takalaili Amaleki kolili taolena yoli tu andeledi kolili kaiwena nige mekalakavao talalau.”
Tomna 21-22
23 Na Deibida kainali iyamaisali iwaloba, “Kaukavao, tabu mumugamiu besiele. Wagitai tawae Yeoba iyeyama kolila. Tabe igite-kalatagila yo Amaleki siya kala kaleyayao ipeili nimala mena.
24 Tabu walone bwaimwa tagiginauli besiele. Kaiwena siya simiyamiya na ala gogo sigitegite-kalatagili na kita talau takaleya Amaleki kolili. Sowasowana gogone tasoiyagili meuloila kolila.”
25 Mwa loinane bwaine Deibida ikabi-yakaiwe yo imiyamiya kanasiga kabona.
Saugana sipileyoi Sikilagi sipi yo gouti tupwali sikalaili Amaleki kolili Deibida iyawasali tautaubalao Yuda dedeina mena kaiweli, siya mwa sisagui saugana iya me ana kilakaiwo Saulo ana tokaleyayao siyabubu-gabaegili Yuda dedeina mena.
Tomna 26-31