7
ⵜⴶⵢⵜ ⵜⵏ ⵎⵍⴾⵙⴹⵆ
1 ⵎⵍⴾⵙⴹⵆ ⵓⵏ ⵏ⵿ⵜⴰ ⵙ ⴾⵍⴰ ⴹ ⵎⵙ ⵎⵏⴾⵍ ⵏⵗⵔⵎ ⵏ⵿ⵙⵍⵎ ⵎⵙ ⵍⵎⵎ ⵏⵎⵛⵏⴰ ⴹⵢ ⵏⵎⴹⴾⵍ⵰ ⵏ⵿ⵜⴰ ⵙⵍⴾⴹⵏ ⵢⵏⵀⵢ ⵀⵔⵂⵎ ⵙⵗⴰ ⵓⴹ ⵔⵤⴰ ⵎⵏⴾⵍⵏ ⵜⵔ ⵢⵀⵔⵂⵎ ⴹⵙⴶⵏ ⵍⵀⵔⴾⴰ⵰
2 ⵏ⵿ⵜⵏ ⴹⴰ ⴾⴼⴰ ⵀⵔⵂⵎ ⵜⵎⵙⴹⴾ ⵏⵓⴰ ⵍⴰ ⴾⵍ⵰ ⵍⵎⵗⵏ ⵏⵙⵎ ⵓⵏ ⵎⵍⴾⵙⴹⵆ ⵎⵏⴾⵍ ⵏ⵿ⵜⵆⵜ ⵎⵙⵏ ⴹⵗ ⵎⵏⴾⵍ ⵏ⵿ⵙⵍⵎ ⵍⵎⵗⵏⴰ "ⵎⵏⴾⵍ ⵏⵍⵈⵔ"⵰
3 ⵓⵔⵎⴹ ⵍⴰ ⵀⴰ ⵓⵍⴰ ⵏⴰ ⵓⵍⴰ ⵍⵌⴹⵏ⵰ ⵜⵎⴹⵔ⵿ⵜⵏⵜ ⵓⵔ ⵜⵍⴰ ⵏⵜⵢ ⵤⴰ ⵓⵍⴰ ⵜⵤⵔⵙ⵿ⵜ⵰ ⵜⵓⵛⵛⵍⴰ ⴹⵀⵔⵔ ⵏⵎⵛⵏⴰ ⵆⵍ ⵍⵎⵎ ⵂⵔ ⴼⵓ⵰
4 ⵏ⵿ⵤⵔⵜ ⴹⵗ ⴹⴾⵍ ⵏⵍⵎⵎ ⵓⵏ ⵂⵔ ⵙ ⵀⵔⵂⵎ ⵎⵏⵜ ⵓⵏ ⵍⵌⴹⵏⵏⵗ ⵜⴾⴼⵏ ⵜⵤⵏ⵿ⵜ ⵜⵏ ⵎⵔⵓⵜ ⵏⵓⴰ ⴹⵗⴰ⵰
5 ⵍⵎⵎⵏ ⵓⵏ ⴾⵍⵀⵢ ⴾⴼⵏ ⵍⵓⵌⵀ ⵂⵏ ⵜⵓⵔⵜ ⵍⵈⵆ ⵏⴹ ⴶⵔⵓⵏ ⵛⵎⵙⴹⴾ ⵏ⵿ⵜⵎⵜⵢ ⵏⵙⵔⵢⵍ ⵎⵙⵏⵏ ⵎⴹⵔⵢⵏⵙⵏ ⴾⴹⵗ ⵙ ⵏ⵿ⵜⵏⵢ ⴹⴰ ⵂⵢⵓⵏ ⵏⵀⵔⵂⵎ ⵎⵙⵏ⵰
6 ⵎⵍⴾⵙⴹⵆ ⵎⵔⵏ ⵓⵔ ⵎⵙ ⵢⵏ ⴹⵗ ⴾⵍⵀⵢ ⵎⵛⵏ ⴶⵔⵓ ⵜⵎⵙⴹⴾ ⵏⵓⴰ ⵍⴰ ⵀⵔⵂⵎ⵰ ⵜⵤⵔ ⵜⵔ ⵎⵍⴾⵙⴹⵆ ⴶⵏ ⵍⵀⵔⴾⴰ ⵢⵀⵔⵂⵎ ⵙⵏ⵿ⵜⴰ ⵙ ⴶⴰ ⵎⵛⵏⴰ ⵔⴾⵓⵍⵏ⵰
7 ⴶⵎⴹ ⵛⴾ ⵙ ⵓⴰ ⴶⵔⵏ ⴹⴾⵍ ⵏ⵿ⵜⴰ ⵜⵜⵔⵏ ⴶⵏ ⵍⵀⵔⴾⴰ ⵢ ⵓⴰ ⴹⵙⵏ⵿ⴹⵔⵏ⵰
8 ⵍⵎⵎⵏ ⵓⵏ ⴶⵔⵓⵏⵏ ⵛⵎⵙⴹⴾ ⵏ⵿ⵜⵎⵜⵢ ⵢⵜⴹⵏ ⵎⵙⵏ ⵤⵀⴰ ⵤⵍ ⵢⵏ ⵎⵍⴾⵙⴹⵆ ⵎⵔⵏ ⵙⵜⴹⵏ ⵍⴾⵜⵀⵏ ⵙ ⴹⵔ⵰
9 ⵈⵙⵍ ⴾⵍⵀⵢ ⵎⵏⵙⵏ ⵙⵏ⵿ⵜⵏⵢ ⴶⵔⵓⵏⵏ ⵛⵎⵙⴹⴾ ⵔⵤⵎ ⴼⵍⵙⵏ ⵀⵔⵂⵎ ⵜⵎⵙⴹⴾ ⵙ ⵜⵂⴾⵢ ⵜⴰ ⵜⵜⴶⴰ ⵢ ⵎⵍⴾⵙⴹⵆ⵰
10 ⴼⵍⵙ ⵙ ⵙⵍⴾⴹ ⵎⵍⴾⵙⴹⵆ ⵢⵀⵔⵂⵎ ⵍⵀⵢ ⵓⵔ ⵂⵓ⵰
11 ⵏⵔ ⴾⵎⵍ ⵏⵤⵎ ⵓⵏ ⵍⵎⵎⵏ ⵓⵏ ⴾⵍⵀⵢ ⵙⵏ⵿ⵜⴰ ⵙⵀⴹⴹⵏ ⵍⵆⵏⵏ ⵓⴰ ⵙⵓⵔ ⵎⵛⵏⴰ ⵜⵎⵜⵢ ⵓⴹⵢ ⵓⵔ ⵜⵤⵎⵍ ⵍⵎⵎ ⵏ⵿ⵜⴶⵢⵜ ⵜⵏ ⵎⵍⴾⵙⴹⵆ ⴹⵗ ⴹⴶ ⵏⵍⵎⵎⵏ ⵏ⵿ⵜⴶⵢⵜ ⵜⵏ ⵂⵔⵏ⵰
12 ⵎⵔⵏ ⴹⴹ ⵤⵎⵙ ⵎⵜⵢ ⵏⵤⵎ ⵓⵏ ⵍⵎⵎⵏ ⵓⴹⵢ ⵍⵆⵏⵏ ⴹⴰ ⵍⵤⵎ ⴹ ⵎⵜⵢ⵰
13 ⵍⵎⵎ ⵓⴰ ⴼⵍ ⵎⴶⵔⴹⵏ ⵙⵍⵏ ⵓⵏ ⵏ ⵜⵓⵛⵜ ⵢⵜ⵰ ⵜⵓⵛⵜ ⵜⵏ ⵎⵔⵏ ⵓⵔ ⵜⵜⵂⴰ ⵓⴹⵏ ⵙ ⴾⵍⴰ ⴹ ⵆⵍ ⵍⵎⵎ⵰
14 ⵍⴾⵏ ⵙ ⵎⵍⵏⵏⴰ ⵜⵓⵛⵜ ⵜⵏ ⵢⵂⴹⴰ ⴹⴶⵎⴹ ⵜⵓⵛⵜ ⵜⴰ ⵎⵔⵏ ⵓⵔ ⴹⴹⴾⵍ ⵎⵙⴰ ⵀⵜⵏⵜ ⴼⴹⴰ ⴹⵗ ⵀⵜⵓ ⵏⵛⵗⵍ ⵓⵏ ⵜⵛⵜ ⵏⵍⵎⵎ⵰
15 ⵔⵜ ⵓⵏ ⵙⵜⴹⵢ ⵓⵍⵏ ⵙ ⴹⵏⴼⵍⵍ ⵍⵎⵎ ⵢⵏ ⵍⵏ ⴹⵎⵍⴾⵙⴹⵆ⵰
16 ⵍⵎⵎ ⵓⴰ ⵓⵔ ⴹⴶⴰ ⴶⵤ ⵏⵏⵤⵎ ⵓⵏ ⵏⵎⴾⵙⴰ⵰ ⴾⵍⵔ ⴶⵤ ⵏ⵿ⵜⵔⵏⴰ ⵏ⵿ⵜⵎⴹⵔ⵿ⵜ ⵜⵗⵍⵍⵜ ⴹⴶⴰ
17 ⴼⵍⵙ ⵏⵏ ⵍⴾⵜⵀⵏ ⴹⵗ ⵀⵜⵏⵜ ⵍⵎⵎ ⵜⵎⵙⴰ ⵂⵔ ⴼⵓ ⴹⵗ ⵜⴶⵢⵜ ⵜⵏ ⵎⵍⴾⵙⴹⵆ⵰
18 ⵍⵆⵏⵏ ⵓⴰ ⵜⵍⵏ ⴾⵍⴰ ⴹⴰ ⵜⵓⴾⵙⵏ ⴼⵍⵙ ⵓⵔ ⵍⴰ ⵜⵔⵏⴰ ⵓⵍⵢⵜ ⵤⴰ ⵓⵔ ⵏ⵿ⴼⴰ ⵓⵍⴰ⵰
19 ⵍⵆⵏⵏ ⵓⴰ ⵓⵔ ⴹⵙⵈⵙⵍ ⵔⵜ ⵓⵍⵢⵏ ⴾⵎⵍⵏ⵰ ⵜⵎⴰ ⵎⵔⵏ ⵓⴰ ⴹⵏⵗⵜⵓⴾⴼⵏ ⴼⴰ ⵓⵏ ⵍⵆⵏⵏ ⵓⵏ⵰ ⵜⵎⴰ ⵓⴰ ⵏ⵿ⵜⴰ ⴹⵏⵗⵙⴼⵔⴶⵏ ⵏⵎⵂⵤ ⴹⵎⵛⵏⴰ⵰
20 ⵔⵜ ⵓⴰ ⴾⵍ ⵎⵛⵏⴰ ⵂⴹⵏ ⴹⵗ ⵀⵜⵏⵜ⵰ ⵍⵎⵎⵏ ⵓⵏ ⵂⴹⵜⵏⵏ ⵓⵔ ⵂⴹ ⵎⵛⵏⴰ ⴹⵗ ⵀⵜⵏⵙⵏ
21 ⵗⵢⵙⴰ ⵎⵔⵏ ⵎⵛⵏⴰ ⵂⴹⵏ ⴹⵗ ⵀⵜⵏⵜ ⴹ ⵍⴾⵜⵀⵏ ⵏⵏⵏ ⵎⵍⵢ ⵂⴹⵏ ⵎⵔⵏ ⵓⵔ ⵍⴾⵎ ⴹⵆⵍ ⴹⵗ ⵀⵜⵏⵜ⵰ ⵍⵎⵎ ⵜⵎⵙⴰ ⵂⵔ ⴼⵓ⵰
22 ⵎⴾⵏ ⴹⵗ ⵙ ⵜⵔⵢⵜ ⵜⵏ ⵗⵢⵙⴰ ⴼⵍ ⵏⴾⵙ ⵛⴾ ⵙ ⵏⴶⵔⵓ ⵔⴾⵓⵍ ⵏ⵿ⵜⵙⵆ ⴹⵎⵛⵏⴰ ⴼⵏ ⵓⴰ ⵔⵓⵏ⵰
23 ⵍⵎⵎⵏ ⴾⵏⵏⵏ ⴶⵜ ⵜⵎⵍⵏⵏ ⵙⵏⵎⴾⵙⴰ ⴼⵍⵙ ⵓⵔ ⵜⵏ⵿ⵜⵢⴰ ⵜⵎⵜⵏ⵿ⵜ ⵙⴹ ⵜⵎⵍⵏ ⵂⵔ ⴼⵓ⵰
24 ⵗⵢⵙⴰ ⵎⵔⵏ ⵍⵢ ⵂⵔ ⴼⵓ⵰ ⵓⵏ ⴹⵗ ⴼⵍⵙ ⵜⵛⵜⵏⵜ ⵍⵎⵎ ⵓⵔ ⵜⵜⵎⵜⵢ⵰
25 ⴹⵗ ⴹⵢ ⴼⵔⴶ ⵜⵂⴾⵢ ⵏⵍⵗⵍⵙ ⴾⵎⵍⵏ ⵢⵢⵜⴹⵏ ⵓⵏ ⴹⵏⵤⵂⵤⵏⵏ ⵎⵏⵙⵏ ⵎⵛⵏⴰ ⵙ ⵜⵔⵢⵜⵏⵜ ⴹ ⴹⵔ ⵂⵔ ⴼⵓ ⵢⴹ ⵛⵓⵍ ⵢ ⵎⵛⵏⴰ ⵙⵙⵎⵏⵙⵏ⵰
26 ⵗⵢⵙⴰ ⵏ⵿ⵜⴰ ⵎⵙⵏ ⵍⵎⵎ ⵓⴰ ⵤⵓⵔⵏ ⵓⵙ ⵏⴹⵔⵔ ⴹ ⵤⴹⴶ ⵓⵔ ⵜⵓⵔ ⵍⵂⵏ ⵓⵍⵢⵏ ⵓⵔ ⴾⵍⴰ ⴹ ⴶⴰ ⵀⴾⴹ ⵓⵔ ⵍⴰ ⴹⵏⵙⵀⴾⴹⵏ ⵍⵈⵍ ⵎⴹⴾⵍ ⵎⵍ ⴹⵏⴶ ⵌⵏⵓⵏ⵰
27 ⵍⵎⵎⵏ ⵓⵏ ⵂⴹⵜⵏⵏ ⵤⵓⵔⵏⵏ ⵍⵤⵎ⵿ⵜⵏ ⴶⵢ ⵏ⵿ⵜⴾⵜⵓⵏ ⴾ ⵤⵍ ⴼⵍ ⴹⵍⵍ ⵏⵀⴾⴹⵏ ⵓⵏⵙⵏ ⵎⵏⵙⵏ ⵜⵤⵔ ⴹⴼⵔ ⴹⵢ ⵓⵏ ⵜⵎⵜⵢ⵰ ⵗⵢⵙⴰ ⵎⵔⵏ ⵏ⵿ⵜⴰ ⵓⵔ ⴹⵔⵔ ⵙⵓⵏ ⴼⵍⵙ ⵜⴾⵜⵢ ⵢⴹⴰ ⴶⴰ ⴶⵜ ⵛⵢⵜ ⵙ ⵜⵂⴾⵢ ⵜⴰ ⴶⴰ ⵎⵏⵜ⵰
28 ⵍⵎⵎⵏ ⵓⵏ ⵤⵓⵔⵏⵏ ⵙⵏⴼⵔⵏ ⵜⵓⵔⵜ ⵢⵜⴹⵏ ⵎⵙⵏ ⵔⴾⵎⵏⵏ⵰ ⵎⵛⵏ ⵓⴰ ⵙⵏⴼⵔⵏ ⵎⵛⵏⴰ ⴶⵢ ⵍⵎⵎ ⵓⴰ ⵤⵓⵔⵏ ⵙ ⵜⵂⴹⵢ ⵜⴰ ⴶⴰ ⴹⵗ ⵀⵜⵓ ⵜⵏ ⵓⴹⵢ ⵀⵔⵔⵏⵜ ⵎⵙ ⴶⵔⵓⵏ ⵍⴾⵎⵍⵜ ⵂⵔ ⴼⵓ⵰ ⵜⵂⴹⵢ ⵜⵏ ⴶⵜ ⵎⵛⵏⴰ ⴹⴼⵔ ⵙ ⵤⵔⵤ ⵏⵤⵎ ⵓⵏ ⵜⵓⵔⵜ⵰