32
Yes Israela tigharaat makau anunu inim maaron padi
Mose ineep mala izi lolooz Sinai daba. Tovenen yes Israela tisaŋani le maau, ghoro tila tiluvut Aron, ve tisaav pani tighaze: “Aron, ugharaat leed maaron eta! Leso imuuŋ pait ve iŋgin ghiit. Pasa, ŋgeu to igham ghiit tapul taan to yes Isipa ve tanim, yei nikankaan pani. Mbeb eta avaat ivot pani wa.”
Aron ilooŋ saveeŋ todi, ve isaav padi ighaze: “Poia. Yam ala aŋgoog pandood to ndizwamim ve ndinatumim to tigharaat di pa gol, ve agham di tinim.” Tovenen ival tiina tipas pandood todi tizi pa taliŋadi, ve tigham di tila to Aron. Ghoro ye igham gol todi tonowen, ve igharaata inim makau anunu. Ival tiina tighita makau anunu tonowen, ve tisaav tighaze: “Ai yam Israela, aghita. Nene maaron toit to igham ghiit tapul Isip ve tanim.”
Aron ighita ŋgar todi tonowen, ve igharaat artaal eez ila mbeb tonowen nagho, ve isaav padi ighaze: “Bozo, pale talup ghiit pa suŋuuŋ, ve tapait Yoova!”
Mboŋ le ndugizau, ghoro ival tiina timundig, ve tiyou mbeb todi pida tila, leso tigham watooŋrau pa maaron todi tonowen. Watooŋrau pida, yab ighan suvun di. Ve tigham pida, leso yesŋa maaron todi tonowen tilup di tinim ee moghon. Ghoro mboledi izi ve tighanghan. Tighanghan ve tighunghun, ve mala maau tipamundigin narogho, ve mogheraaŋ toman ŋgar samsamia naol tivot. 1Kor 10:7
Maaron ate yabyab kat pa yes Israela
7-8 Tighamgham tovene, ve Yoova isaav pa Mose ighaze: “Ai, rikia moghon uzila! Pasa, tamtoghon tiom to ugham di tipul Isip ve yamŋa anim, ŋgar todi isami, ve tiwaghamgham. Ataam to avog iyaryaaŋ padi naghaze titaghoni, nene tipuli wa. Ulooŋ. Tigharaat ledi makau anunu, ve tiput aghedi pani, ve tigham watooŋrau pani. Ve tisavsaav tighaze: ‘Yam Israela, aghita. Maaron toit to igham ghiit tapul Isip ve tanim, tau tonene!’ Ndiran tonowen, you nawatag di wa. Matadi zoraaŋ saveeŋ kat. 10 Tovenen ateg yabyab padi kat, ve aazne naghaze napasob di tilaledi. Ve yom uŋgalsekin ghou malep. Pasa, naghaze naghur yamŋa papaghu tiom agham inadi. You pale nagham gham amasa anim naol, ve izamim tintina.”
11 Eemoghon Mose itoova pa irab Maaron toni Yoova ate. Ighaze: “Aa Yoova, pughu vena to atem yabyab kat pa tamtoghon tiom? Yom taum to upatooŋ tapirim ve ugham mbeb gharatooŋadi tintina, tauto ugham di tipul Isip ve tinim. 12 Ighaze uwaghamun di, nene pale yes Isipa tisaav tighaze: ‘Laak, Maaron to yes Israela ighaze iwaghamun di ve ipasob di pa taan. Tauto itombaan di, ve igham di tipul ghiit ve tila ndug to bide lolooza, leso irab di tonowe.’ Tovenen uwaghamun di malep. Onoon, atem yabyab kat. Eemoghon utatan atem, ve utoor ŋgar tiom. Ukaria tamtoghon tiom malep. Lolom imuul padi.
13 “Matam iŋgal mbesooŋa tiom Abaram, Isak, ve Yakop. Muuŋ, yom umbua saveeŋ toman di, ve upariaaŋa le iyaryaaŋ kat ughaze yom pale ugham papaghu todi timasa tinim naol tinimale pitum to sambam paroŋania. Ve ugham taan Kanaan isob inim ledi, leso tineep pani itaghoni taghoni gha ila.” Mbnp 12:7, 17:8, Mbnp 26:3+, 28:13
14 Yoova ŋgar toni iyaryaaŋ ighaze iwaghamun yes Israela. Eemoghon Mose isuŋ ariaŋa, tauto Yoova itatan ate, ve itoor ŋgar toni, ve irab tamtoghon toni maau. Yona 3:10
15-16 Ghoro Mose igham yaam babaŋadi ru to Maaron iŋgeret tutuuŋ toni ila, ve imuul izila to yes Israela. Yaam ru tonowen, Maaron tau igharaat di, ve iŋgeret tutuuŋ toni ila. Ve bodeeŋ ineep ila digedi ru. Tutuuŋ tonowen, nene pa ipariaaŋ yes Israela, leso matadi kisin saveeŋ to yesŋa Maaron timbua, ve titaghon ataam toni. Igham 24:12
17 Yosua to ulaaŋa to Mose, ye isasaŋani izi lolooz luvuŋa. Mose izila ivot toni, ve yesuru malmalidi tizila. Tigharau ndug to ival tiina tinepneep pani, ghoro Yosua ilooŋ oroor tiina. Tovenen isaav pa Mose ighaze: “Wai, nowe avaat malmal eta?”
18 Eemoghon Mose isaav pani ighaze: “Maau. Oroor tonowen inimale pakuruuŋ to yes ndaaba to tilib pa malmal ne maau. Ve inimale taŋiiz to ndaaba to koiadi tilib padi, nene paam maau. Mbouŋ to nalooŋa we, tamtoghon avaat tinidi iza pa mbeb eta.”
19 Mose ivot todi izi lolooz pughu, ve ighita di titortor luvutin makau anunu, le ate yabyab kat. Tovenen ipiyaav yaam babaŋadi ru to ikiskis di ne, tizila taan le berberia. *
20 Ghoro ila igham makau anunu tonenen, ve ipiyaava izala yab ighani, ve itututi ila le imbiriis inim avab. Ghoro itiri izila ya, ve isaav ariaŋa pa yes Israela ve tighuni.
21 Ghoro iyaan Aron ighaze: “Laak, ndiran tonene tigham vena payom, to ulooŋ di, ve uweu di ve tigham sosor tiina tonene?”
22 Aron ipamuul aliŋa ighaze: “Wai, tiina tiou, atem yabyab payou malep. Yom uwatag: Ndiran tonene, moghon moghon lolodi ipapazaagh di pa ŋgar samsamia naol. 23 Yes tisaav payou tighaze: ‘Ugharaat leed maaron eta lak! Leso imuuŋ pait ve iŋgin ghiit. Pasa, ŋgeu to igham ghiit tapul taan to yes Isipa ve tanim, yei nikankaan pani. Mbeb eta avaat ivot pani wa.’ 24 Yes tisaav payou tovene, tauto nasaav padi naghaze: ‘Poia. Sei to ighaze ipambood tau pa gol, ghoro iduduuma izi ve ighami inim.’ Tovenen yes tila tiyou gol todi tinim tiou, ve nasuruuv di tizala yab, ve rikia moghon makau anunu ivot!”
25 Mose ighita ighaze Aron iŋgin poian yes Israela maau, ve ipul di tiwaghamgham, tauto tigham ŋgar samsamia naol. Tovenen imatughez: Ighaze koiadi tinim ve tighita di, nene pale tiveleg di ve tiŋiŋ padi. 26 Tauto ila iyoon ila ataam avo, ve imboob ighaze: “Alooŋ! Sei to ighaze itaghon Yoova, ghoro inim tiou!” Tovenen yes to rumai Levi tisob tila tilup di ila Mose mata, 27 ve Mose isaav padi ighaze: “Yoova to Maaron to iit Israela, aliŋa ilat payam ighaze agham buza tiam, ve alaagh taghon ndug lolo, ve ambut yes to tiput aghedi pa maaron kaarom tonenen, le tisob timatmaat. Ighaze toŋvetaz tiam, ma nditamim, ma yes to tineep tigharau gham, aghurghur di malep. Buza ighan di moghon.”
28 Tovenen yes Levia titaghon Mose aliŋa, ve sawa tonenen timbut nditamoot irau ndiŋndiŋ tol (3000) pa buza ve timatmaat. 29 Ghoro Mose isaav padi ighaze: “Yam rumai to Levi, alooŋ. Onoon, nene ipataŋan pa yam arab ndinatumim ve toŋvetaz tiam timatmaat. Eemoghon yam aghurghur di maau, ve ataghon katin Yoova aliŋa. Tauto aazne, ye igham gham anim uraata toni, ve ighur poia toni iza tiam.”
30 Mboŋ ndugizau, ghoro Mose isaav pa ival tiina ighaze: “Alooŋ! Sosor to yam aghami, nene tiina le tiina kat. Eemoghon you pale namuul nazala to Yoova, ve natoova pa nagharaat saveeŋ tomani, ve naghita: Pale irau ilooŋ ghou, ve ipul sosor tiam tonene, ma maau?” 31 Tovenen Mose imuul iza ila to Yoova, ve isaav pani ighaze: “O Yoova, ival tiina tonowen tigham sosor tiina kat payom. Pasa, tigharaat ledi maaron kaarom pa gol. 32 Eemoghon aazne, naghason ghom pa lolom isamin di ve upul sosor todi. Ighaze maau, ghoro izag to umbooda ila rau tiom, umusi ighau paam.” Mbo 69:28; Ro 9:3; Syg 3:5, 21:27
33 Yoova ipamuul aliŋa ighaze: “Vana maau. Tamtoghon to ighaze izoor ghou ve igham sosor payou, ye tonenen to pale namus iza ighau pa rau tiou. 34 Tovenen umundig umuul uzila todi, ve ugham di ve yamŋa ala pa ndug to muuŋ nasavia payam. Aŋela tiou pale imuuŋ payam, ve yamŋa ala. Eemoghon muri, you pale naghur atia padi pa sosor todi.”
35 Tauto muri, Yoova igham moroghooŋ samia ivot padi, ve iyat ŋgar todi to tizoorndug pa Aron tighaze igharaat ledi makau anunu inim maaron kaarom.
* 32:19 Sawa to Mose ipiyaav yaam babaŋadi ru tizila taan le berberia, ene inim ghilalooŋ pa yes Israela ighaze lupuuŋ todi toman Maaron, yes tireua wa.