Rau To Paulus Imbooda Ila To Yes Tesalonika Muuŋ
1 Tesalonaika—1 Thessalonians
1
You Paulus. Yeru Silas ve Timoti nimbood rau tonene ilat to lupuuŋ to Krisi to aneep izi ndug Tesalonika. Yam tamtoghon to aneep tuŋia ila to Tamaan Maaron ve Tiina toit Yesu Krisi. Mbaŋ 17:1-13
Maaron ighur poia toni iza tiam, ve iŋgin gham aneep pooi toman lolomim luuma. Onoon.
Yes Tesalonika tipatooŋ ghurla todi ivot ighazooŋ
2-3 Sawa isob, yei nipapait Tamaan Maaron pa yam asob toman lolomai poia kat, ve nighurghur gham ila suŋuuŋ tiei, ve matamai iŋgalŋgal ŋgar popoia to yam aghamgham di. Pasa, yam aghur ila to Krisi ariaŋa, tauto ipamundigin gham pa ghamuuŋ uraat popoia naol. Ve lolomim pa tamtoghon ve aghaze agham poian di, tauto aghamgham uraat tiina pa ulaaŋ di. Ve yam awatag aghaze Tiina toit Yesu Krisi pale imuul inim ve igham mulin gham. Tauto ayoon ariaŋa pa badooŋ pataŋani, ve aghurghur matamim pa mulaaŋ toni. 1Kor 13:13; Kol 1:4+; 1Tes 4:14+
Yam toŋvetaz, yei niwatag: Maaron lolo payam kat, ve isia gham anim le wa. 2Tes 2:13
Pasa, sawa to ninim ve nivotia varu poia payam, nene saveeŋ moghon to ilat ne maau. Sawa tonenen, Maaron ipatooŋ tau tapiri payam, ve Avuvu Patabuaŋ igham uraat ila lolomim. Ve aghilaal aghaze saveeŋ to nisavia payam, nene yei nighur ila kat. Ve yam taumim awatag: Sawa to nineep toman gham, yei nipatooŋ ŋgar to Krisi payam, leso niuul gham pa ataghoni. Ro 1:16+; 1Kor 2:4+, 4:20
Onoon, sawa to yam alooŋ saveeŋ tiei ve aghur ila, tamtoghon tigham pataŋani tiina payam. Eemoghon Avuvu Patabuaŋ igham gham lolomim poia le poia kat. Ve yam ataghon katin ŋgar tiei, ve ŋgar to Tiina toit Krisi paam.
Tovenen yam anim patoŋaaŋ poia eez pa tamtoghon tisob to Masedonia ve Akaia to tighur ila to Krisi. 1Tes 4:10
Yam anim belo to tiyati ve avolutu irau ndug. Pasa, yam agham saveeŋ to Tiina toit, ve asakia ila irau taan suruvu to Masedonia ve Akaia. Ve tonene moghon maau. Ghurla tiam to iŋarua Maaron, nene varu ilaan irau ndug tisob. Tovenen lemai saveeŋ eta pa nisavia padi muul maau. Pasa, varumim to tilooŋa wa. Ro 1:8
Tovenen ival tiina tisasavia varumim tighaze sawa to nilat ve nineep toman gham, yam alooŋ saveeŋ tiei, ve apul murimim pa maaron kaaromŋa, leso ambees pa Maaron tau. Ye Maaron to ineep mata iyaryaar irau sawa isob. Mbaŋ 14:15
10 Ve tisavia gham tighaze yam asasaŋan Maaron Natu to ye ipamundigini pa mateeŋ. Ye pale ipul sambam ve izi inim pa igham mulin ghiit pa mbalmbali to Maaron to muri pale ivot. Ro 5:9; Pil 3:20; 1Tes 5:9; Tit 2:13